Erfeniswoning in Drieankerbaai kry ’n verjongingskuur met glas

Foto’s Greg Cox l Produksie Marian van Wyk

Uit die kombuis sien ’n mens die sitkamer waar prentrakke bydra tot ’n byderwetse gevoel. Die prente daarop het Leán jare gelede by Ikea in Nederland gekoop en die ou spieël is ’n erfstuk van haar ouma. Die koperlampie is ook ’n erfstuk, maar met ’n moderne gloeilamp. Bank en mat van Weylandts; koffietafel en groen ottoman van @home; kanttafeltjies gemaak deur House2Homesa; kussings uit die Jan-reeks van Hertex

St. Bedes Cots No. 1, 1895. Só staan dit op die marmersteentjie by die voorhek van dié huis in Drieankerbaai, Kaapstad. As die eerste eienaars vandag voor die hekkie sou kon staan, sou hulle hul huisie van ouds aan sy vooraansig herken – maar dis ook al, want anderkant die voordeur wag daar ’n gesig uit ’n ander wêreld...

Weg is die donker gang met al die deure wat na ewe donker vertrekke daaruit gelei het. Nou kyk jy van die drumpel dwarsdeur ’n liggevulde ruimte tot heel agter waar die huis in ’n glasoordekte atrium en ’n buite-binnehof eindig.

Dis een van die kenmerke waaroor Leán en Michael Muller, wat tans die huis verhuur, die blyste was.

Kunsgras in die binnehof lyk altyd mooi en is lekker dik en sag vir kinders om op te speel.

Ella speel op die stoep met sy lieflike oggendson. In die somer was dit die gesin se gunsteling-plek onder die twee groot Ficus-bome, waar hulle die vars reuk van die see en ’n lekker koppie koffie kon geniet.

Die oorspronklike Oregon-dennehoutvloer word met ’n trappie geskei van die nuwe vinielteëls. Die boekrakke was “hand me downs” wat die Mullers swart geverf het om by die interieur te pas. Agter is die binnehof sigbaar; dit bied ’n oase teen die buurt se verkeersklanke.

Verjongingskuur

“Die atrium bring fantastiese lig die huis in,” sê Leán. “Dis ’n ou Victoriaanse huis en daar was baie min lig, maar nou maak die atrium en glasdeure ’n ongelooflike verskil. Hier leef ’n mens naatloos van binne na buite. Die kinders het pal buite gespeel.”

Die Mullers het die opknap in twee dele aangepak. Ella was sewe maande oud toe hulle in Januarie 2019 ingetrek het en die eerste werk is teen die einde van daardie jaar gedoen. Kort ná Jamie se geboorte in Februarie 2020, was dit tyd vir die tweede deel.“Dit was omtrent ’n storie!” vertel Leán. “Alles het maar so stuk-stuk deur die grendeltyd en rondom ons gebeur.”

En toe die restourasie uiteindelik klaar is, kon die Mullers hul pragtige plek net vier maande lank geniet: Michael het ’n werkgeleentheid in Amsterdam gekry. Die gesin het sak en pak verhuis en St. Bedes in die hande van huurders gelaat.

Die ingeboude kaste in die hoofslaapkamer is (soos in die ander kamers) gemaak van Supawood en gespuitverf. Die handvatsels is spesiaal laat maak om ’n delikate gevoel te gee. Die wit kwilt is lank gelede by Woolworths gekoop en die deken by Mr Price Home. Mat van H&M Home Die Pierneef-afdruk langs die bed het Leán se ma jare gelede by ’n tweedehandswinkel gekoop.

[Leán se wenke vir opknappers]

• Woon eers in die huis voor jy dit opknap of restoureer, want wat jy aan die begin dink gaan werk of mooi lyk, is nie noodwendig waar nadat jy ’n paar maande (of selfs deur al die seisoene) daar gebly het nie.

• Kry goeie raad by kenners – van die buurmense wat al self gerestoureer het, tot argitekte, bouers en agente. Jy wil waarde toevoeg, maar nie meer bestee as wat jy gaan terugkry wanneer jy later verkoop nie.

• Maak seker jy en die kontrakteur verstaan mekaar 100%. Ons het oor alles seker gemaak voor die bouwerk begin het, en was deurentyd baie betrokke. Natuurlik duik daar altyd iets onbepland op, daarom is dit belangrik dat ’n mens goed met jou kontrakteur kan kommunikeer; ook dat jy hulle kan vertrou om goeie raad te gee. 

• Besluit waarop jy ekstra geld gaan uitgee. Ons het byvoorbeeld teëls, sanitêre ware, vensters en deure van topgehalte ingesit, en kwarts in die kombuis. 

Lieflik oopgemaak

Toe die Mullers huis gesoek het, was dit dié een se houtvloere, voorstoep, hoë plafonne en die houtafwerkings en -deure wat hul hart gesteel het. Hulle het groot drome vir die huisie gehad.

“Ons wou die ou Victoriaanse karakter behou,” vertel Leán, “maar ook lig inbring in die tipies donker skakelhuis. Die grootste uitdaging was die huis se uitleg – amper U-vormig, met feitlik geen lig van die kante af nie. Ons wou ’n oopplan-leefruimte hê wat op die binnehof oopmaak, en ’n tweede badkamer byvoeg.

“Verfkleure was ook belangrik om die huis se klassieke karakter uit te bring, maar dit terselfdertyd vars en modern te maak.”Hoewel Leán en Michael goed geweet het wat met hul huis moes gebeur, het hulle om professionele hulp gaan aanklop by Kyle Coetzee en Stacey Russell van House2Homesa, wat in interieur-ontwerp en projekbestuur spesialiseer.

Hul opdrag aan Kyle en Stacey was hoofsaaklik dat hulle van die donkerte ontslae wou raak en ’n meer oopplan-huis wou hê. Dit was presies wat hulle gekry het.

“Die huis is op die koop toe vergroot danksy die atrium en nuwe deure,” verduidelik Leán. “Die nuwe kombuis en badkamers – ook die ingeboude kaste – was uitstekende byvoegings.”

Die slimste van die vernuwing?

“Beslis die manier waarop die atrium ontwerp is en ’n ekstra badkamer bygevoeg is – dit was nie ’n eenvoudige oplossing nie. En die uitstekende benutting van ons beskikbare ruimte.” Al woon hulle nou in romantiese Amsterdam, onthou Leán goed “hoe naby dit aan Rocklands-strand en Groenpunt se pragtige park is, en hoe lekker vars die see soggens ruik”.  

Plant van @home; kers van Woolworths

Teëls in ’n visgraatpatroon versier die hoofbadkamer. Wasgoedmandjie van Weylandts

Kennersraad

Kyle Coetzee van House2Homesa gee raad oor hoe jy ’n beknopte woning kan rek:

“Ons het die ruimte onder dak met net sowat 5m² vergroot. Deur egter binnemure te verwyder het ons die bruikbare spasie so veel moontlik uitgebrei vir ’n moderne gesinsleefstyl.” 

 In die agterste deel is twee reuse-staalbalke ingesit, wat dit moontlik gemaak het om heelparty mure te verwyder. “Hierdeur is die ruimte nie net verdubbel nie, dit het ook die nodigheid van ’n pilaar in die middel van die oopplanvertrek uitgeskakel,” verduidelik hy. Die klein vertrekkies is dus vervang met een oop ruimte wat ingerig is vir sit, eet en kos maak. 

“Danksy die stewige balke kon ons baie meer glas – en dus lig en warmte – inbring in die voorheen donker, koue huis. Die baie glas laat ook die huis groter lyk en voel as wat dit is.” ’n Skoon palet van wit en neutrale kleure help om dié illusie te versterk.

Wat die dekor aanbetref het Kyle die volgende wenke:

“Om lekker te leef in ’n kleinerige huis moet ’n mens onthou minder is meer. Hou dinge eenvoudig en hou jou ruimte so oop moontlik. ‘Goeters’ laat ’n plek kleiner lyk.

“Knap op volgens jou begroting. Kies een ruimte op ’n slag en doen dit ordentlik deur die beste gehalte van die noodsaaklike dinge te koop. Vermy die fout om te veel ontwerpdetail en dekoritems in te bring, selfs al het jy ’n ruim begroting.” 

KONTAK 084 580 5158, house2homesa.co.za

Prent en mat van Mr Price Home

Al die plafonne en Oregon-dennehoutvloere in die voorste deel van die huis is behou ter herinnering aan St. Bedes se geskiedenis. Die halfmaanvormige loodglasvenster in die gang en marmerkaggel in die sitkamer is ook oorspronklike elemente van die huis.

Leán en Michael met Ella en Jamie. Die voordeur is pienk geverf ter ere van die twee dogtertjies.