Foto’s Elza Cooper l Stilering Amanda van Wyngaardt

WIE WOON HIER?

Cillié van Rooyen, Andries le Grange, hul seuns Dries (18) en Phillip (16), Mama Ndlovu en haar dogter Katy (20)

WAAR Ruiterhof, Randburg

GROOTTE 364 m²

Die rooi stoel is ’n erfstuk van Cillié se oupa Johannes de Wet. Sy en Andries het die kas met die glasdeure langs die kaggel op Robertson raakgeloop. Daarbo hang ’n skildery deur Marinda Combrinck en ’n ets deur Alpha Greeff. Rooi ketel van Dassiesfontein

Hul huis was eintlik ’n doodgewone, “kommin” dorp-huis, sê Cillié van Rooyen. Toe pak sy dit vol skatte uit die verlede, elkeen met sy eie storie van familie en geliefdes. Deesdae gloei die mure in juweelkleure; dis behang met kunswerke, en soeweniers word oral uitgestal. Só omskep sy dit in ’n heiligdom van alles wat kosbaar is. En skep sy ’n kuierplek vir inwaai, agteroorsit en strykdeur kuier.

“Dis vir my heerlik wanneer mense sê my huis voel gesellig en vriendelik,” sê Cillié. “As jy hier instap moet jy welkom voel, jou skoene uitskop en begin lag en eet. Mense voel tuis hier, want my huis is kleurvol, eklekties en vol stories en herinneringe. Meeste van my goed kom saam met ons oor die jare en herinner my aan my lewensreis.” 

Die kussing met ’n afdruk van Vermeer se Meisie met oorbel pas perfek by die kleur van die stoel.

Blou stoel gestoffeer deur SHS Office Furniture & Upholstery; hanglig van The Lighting Warehouse

Cillié is gek na die leerbank se skoon lyne in die gesellige sitkamer met sy ryke verskeidenheid kleure, teksture en mooigoed – so te sê elkeen met ’n storie.

Douglas-bank van Incanda; kussings van Mr Price Home; Crater-koffietafel van Weylandts; leunstoele oorgetrek met lap van Sullies Fabrics

Vernuwings

Cillié en Andries is oud-Kapenaars wat al jare in Johannesburg woon. “Ons sou ná ’n jaar terugtrek Kaap toe, maar teen daardie tyd was ons al lief vir dié stad,” vertel dié voormalige bibliotekaresse. “Die huis is in die sewentigerjare gebou en het ’n gevoel van die tagtigs, maar ons het hom die nuwe eeu ‘ingeklap’.” Hulle het die muur tussen die kombuis en TV-kamer uitgebreek vir ’n oopplanleefvertrek en die stoep, die seuns se badkamer en die kombuis vernuwe. Die ander badkamer moes wag tot later.

“Al was dit ’n yslike taak, het ek en my vriendin Hanneli Rood die werk binne ses weke afgehandel. Wanneer iemand sê hulle bouer is al maande besig om ’n badkamer op te knap, dink ek hulle het die verkeerde projekbestuurder en kontrakteurs.”

Die teëlvloere in die leefareas, kombuis en badkamer het ’n sement-afvlaklaag bo-oor gekry wat gekleur en geseël is. “Dis tydloos, bly mooi, maak maklik skoon en is nie so koud soos teëls nie,” sê Cillié. “Onder die mat in die seunskamer was ’n blokkiesvloer wat ons afgeskuur en geseël het.”

In die hoofslaapkamer het hulle die ou koningsblou mat opgetel en ’n vloer van Supawood bo-oor die sementbasis gelê. “Die hout is eers swart geverf, toe roomkleur bo-oor en daarna plek-plek afgeskuur vir ’n ingeleefde voorkoms.”

Op die stoep is hoë balke aangebring vir ruimte en lig. “Ons eet meestal daar; baiekeer sit al twaalf stoele om die tafel vol. Hoe meer siele, hoe meer vreugde – ek maak in elk geval kos,” glo sy. “Op koue dae eet ons binne. Waar ek dek maak nie saak nie, ek doen dit volgens my geit en koskook-styl van die dag.

“Ons huis is nou perfek vir ons gesin. Aan die een kant werk en kuier ons en aan die ander kant slaap en was ons. Ons woon in ’n lekker straat en het gesellige bure. Die kinders kan skool toe stap. Al is dit in die stad, voel dit soos die platteland,” sê Cillié tevrede.

Cillié het die blou Delft-borde by ’n vriendin gekoop; die kleinbordjies is handgemaak deur Lize Rossouw van Hartspotteri op Montagu. Messegoed van Mr Price Home

Wanneer dit te koud is om op die stoep te eet, dek Cillié haar kuiertafel in die eetkamer.

Groen vaas van Decade Midcentury Modern; beeld van Lifestyle Home Garden; bakkie deur Richard Pullen; klippe met hekelwerk van Matchbox

Cillié en Andries het dié blou verf spesiaal laat meng by Universal Paints.

Rooiwynglas van CRS; waterglas van Checkers

Porseleinkaktusse van Lifestyle Home Garden; geverfde houtkaktusse van die Boerevintagemark op George

Prentlyste bied ’n oplossing vir te min hangplek teen mure. “Die rakke verf ek in die muurkleur sodat dit lyk asof hulle wegsmelt.”

[CILLIÉ SE MOOIMAAKWENKE]

Groepeer uitstallings. “Ek bêre sommige items en verander elke paar maande my groeperings,” is haar raad.

• Hou jou oë oop vir mooi strooikussings of lap wat ’n strooikussing kan word. Verander jou strooikussings volgens die seisoen. “En moenie almal by dieselfde winkel koop nie; hou die voorkoms interessant.”

• Met die lieflike weer in Johannesburg moet jy ’n stoep hê, glo Cillié. “Ons bring baie tyd op ons stoep deur; dis van lag, kuier en lekker kos aanmekaargesit.”

Moenie jou mooiste goed wegbêre nie. Gebruik dit, herwin dit, gee weg of leen dit uit.

• Trek groot meubelstukke oor met dienlike kleedstof en hou duurder lap vir kleiner items.

Staan- en tafellampe gee atmosfeer. “In my sitkamer hang ’n daklig laag genoeg dat dit as staanlamp dien!”  

Dié prent in Cillié se werkkamer het sy in kruissteek geborduur op ’n patroon van Etsy.

Verfkleur op stoel: Plascon Lavish Lemon

In dié huis is geen kaal muur te sien nie. “Ek koop billike rame en kan die inhoud na hartelus vernuwe, net soos die gier my pak.

Cillié versamel brilrame op haar reise en laat dan plaaslik lense insit. Uitstalraam gemaak deur The Picture Frame

Nostalgie en orde

Maak nie saak op watter wonderlike plek sy vakansie hou nie, dis altyd vir Cillié lekker om tuis te kom. “Ek hou van mooi dinge en van orde, en in my huis is albei.

“Ek glo elke ding en soort moet sy plek hê,” sê sy. “Neem die ou skoolkas in my kombuis, ’n verjaardaggeskenk van Andries. Hy het kliphard gelag toe hy sien dis binne vol hokkies, want dis so in my kraal. Ordeliker as hierdie kas kry jy nie sommer nie.”

Die mooi in haar huis is die ene nostalgie. “Ek dek my tafel met servette van my ouma, Cillié de Wet, wat my ma, Jacomi van Rooyen, laat borduur het. En ek het al van my woonstelbly-jare ’n houtkassie met ’n glasdeurtjie wat my oupa Johannes in 1956 op ’n veiling gekoop het. En teen my muur is ’n foto-kaartjie van ’n ou huis op Montagu in die Klein-Karoo, waar ek vandaan kom.”

Sterk, helder kleure is deel van Cillié se unieke styl. “Pastelle is vir my te effentjies,” sê sy. “Is die vertrek warm, gebruik ek koel kleure soos groen of blou. Is dit kouer, hou ek by warm kleure soos rooi of geel. Ek gebruik kleure uit ’n mat of ’n skildery wat vir my mooi is.”

Stillewes word gereeld deur die jaar verander, soos met ’n seisoensverandering of tydens ’n spesiale tyd soos Pase. “Ook as ek iets nuuts gekoop het, of lus is vir speel. Die inhoud van die rame verander ook gereeld. Ek vra net die ramer, Philip Botha, dat hy die monteerbord se grootte weer pasmaak. ’n Monteerbord gee flair aan die eenvoudigste werk.”

Die paartjie se eerste eetkamertafel, in 1999 op Magaliesburg gekoop, is nou die kombuistafel. Metaalstoele van Chair Crazy; hanglig van The Lighting Warehouse; bont teëls van CTM

Verfkleur: Plascon Sherwood (teen muur)

Ander se huise

Cillié span haar flair vir binneversiering ook vir ander in. “Ek en Hanneli het jare gelede besef daar is ’n behoefte aan projekbestuurders vir huisvernuwings. Ons het Novel Idea Interiors begin en ses jaar lank kontrakteurgedrewe projekte bestuur. Ons het ook binneversiering gedoen.

“Ons sterk punt was om aan bestaande meubels ’n nuwe funksie of lewe te gee. Ek herwin graag ou meubels – soos ’n stoel wat my pa, Flip van Rooyen, gemaak het kort ná my ouers getroud is. Ek het dit geel geverf en teen die muur gehang met ’n blompot daarop.”

Sy bestuur steeds projekte en doen ook konsultasies. “Ek werk op verwysings – dis goeie advertensie en verseker jy kry betaling,” verduidelik sy. “Soms gee ek net raad en skryf ’n verslag; ander kere vra kliënte dat ek my voorstelle uitvoer. Ek hou van rande rek en gebruik altyd dieselfde kontrakteurs.”

Cillié sê sy stap deur baie winkels op soek na die regte stukke vir kliënte. “Ek gaan op ’n bepaalde sending, anders gee jy geld uit wat jy nie het nie, op goed wat jy nie nodig het nie. Die goue reël oor ’n kopie bly: Dit moet jou hart laat sing.”

Cillié het die prent bo haar servetkas (’n ou skoolkas wat Andries vir haar gegee het) self gemaak van Skinny laMinx-, Design Team en shweshwe-lap.

Jou huis hoef nie soos jou buurvrou s’n te lyk nie, dit moet net mooi en prakties wees vir jou gesin. – Cillié

Dries stal sy hoede en kinderskatte uit op ’n rak wat deur ’n Tuis-projek geïnspireer is.

Verfkleur: Universal Paints Canvas

My ma sê altyd: ‘Jou pleister gaan afval met al die goed wat jy teen die muur hang.’Dan wil my liewe vriendin Hanneli weet ‘Waa’voor anders is die mure as om die dak regop te hou? Behang dit!’ – Cillié

Cillié het die kwilt op Dries se bed gemaak. Kopstuk oorgetrek deur Paraphernalia Trading met lap van Design Team; grys stoeltjie van Mr Price Home; blinding gemaak deur The Cover Girls met lap van Chamdor Faktry Sales

Verfkleur: Universal Paints Yacht Blue

In Phillip se kamer hou ’n beesskedel van blik (by ’n straatverkoper gekoop) wag. Geel rakkies is ’n vrolike element teen die grys mure. Kubusse en kort sweefrak van Leroy Merlin; kombi van Mr Price Home; deken van Sheet Street; grys kissies van West Pack Lifestyle

Verfkleure: Plascon Rhine Castle (grys) Plascon Golden Daffodil (geel)

 ¸

’n Lieflike ou kas, lank gelede gekoop in Albertskroon, het ’n ereplek in die en suite-badkamer gekry. Blinding gemaak deur The Cover Girls met lap van Chamdor Faktry Sales; pootjiesbad van Bathroom Bizarre

Verfkleur: Universal Paints Concrete White

In die hoofslaapkamer skep ’n pienk muur ’n rustige atmosfeer. Die bed was ’n trougeskenk en Cillié en Andries slaap nou al 23 jaar daarop. Laaikas van Milnerlaan, Albertskroon; beddegoed, donkerblou kussing en wit rame van Mr Price Home; lig van The Lighting Warehouse; mat van Hertex

Verfkleur: Fired Earth Thrill of Brazil

Aalwyne uit die tuin maak ’n aardse tafelversiering.

Die stoep is die gesin se gunstelingplek vir lang kuiers en aansit vir lekker eet. Hier raak dit so gesellig, selfs voëls probeer gereeld in die draad-lampkap nesmaak.

Horings van Amatuli

Verfkleur: Plascon Bovine

Sitplekkussing van Paraphernalia Trading

Draad-lampkap van Weylandts; strooikussings gemaak deur Paraphernalia en The Cover Girls; bedrukte kussing regs van Design Team

VERSKAFFERS EN KONTAKTE

Alpha Greeff

Amatuli 011 440 5065

Boerevintage-geskenkmark 083 398 0205

Chair Crazy 021 465 9991

Chamdor Faktry Sales 011 762 1401

CRS 011 791 7470

CTM 0800 010 810

Dassiesfontein 028 214 1475

Decade Midcentury Modern 011 482 3059

Design Team

Hartspotteri 072 225 7613

Hertex 0860 437 839

Incanda 012 348 4975

Leroy Merlin 010 493 8000

Lifestyle Home Garden 011 792 5616

Marinda Combrinck  

Matchbox 028 754 1445

Midek Paint 011 791 6328

Mr Price Home 0800 212 535

Paraphernalia Trading 082 335 3745

Rialheim 079 898 3120

Richard Pullen’s Studio 072 325 1432

Sheet Street 0800 212 535

SHS Office Furniture & Upholstery 011 791 5186

Skinny laMinx 021 424 6290

Sullies Fabrics 011 830 2834

The Cover Girls 083 301 6287, thecovergirls@telkomsa.net

The Lighting Warehouse 0861 5444 8464

The Picture Framer 083 294 1542

Universal Paints

West Pack Lifestyle

Weylandts 0860 103 400