Foto’s Francois Oberholster l Stilering Marian van Wyk

WIE WOON HIER?

Catherine Crawford

WAAR Nuweland, Kaapstad

GROOTTE 340 m2

Boë afgerond met klompiestene is gebou om die huis ’n sagter, vrouliker gevoel te gee in kontras met die skoon lyne van die res van die gebou.

Catherine Crawford was nie eintlik op soek na eiendom toe sy ’n ou huis in Nuweland koop nie. Maar nadat sy verneem het dat ’n huis in dié lowerryke buurt binnekort op die mark sou kom, het die idee om naby haar tweelingsuster in Newlands Village te bly, al hoe aantrekliker geraak.

Die kothuis in die Kaaps-Georgiaanse styl, gebou in die 1950’s, het klein, donker vertrekke gehad wat uit die ingangsportaal gelei het, met die badkamers in die middel van die huis. Catherine wou die ruimte vernuwe met behulp van oopplan-leefareas en meer natuurlike lig.

Haar swaer Yoram Shabat is ’n argitek, en sy het by hom aangeklop om die huis vir haar in ’n funksionele gesinshuis te verander. Catherine het haar idees op ’n Pinterest-bord bymekaargesit en ’n gedetailleerde opdrag opgestel met al haar voorkeure vir die nuwe huis: hoë plafonne, baie natuurlike lig en tekstuur.

“Aanvanklik het ons gedink ons kon net die uitleg aanpas,” sê Yoram. Maar nadat hulle elke opsie oorweeg het, het hulle besef as hulle haar visie wou realiseer, sou hulle moes oorbegin. “Ek sou met te veel goed tweede prys moes aanvaar,” sê Catherine.

Eers is alles buiten die voorste muur en die oorspronklike motorhuise, een aan elke kant van die huis, afgebreek. Daarna is ’n nuwe boonste verdieping aangebou ter wille van meer leef- en kuierruimte op grondvlak; bo is daar drie slaapkamers, badkamers en ’n studeerkamer.

Die projek het van Januarie tot September 2018 geduur en die eindproduk is die helder, ruim huis van haar drome, en perfek vir onthaal!

In aanbou

Fasade ’n Waterwys binnehof met ’n Kei-appelboom lei na die voordeur. Die nuwe vlak het skuifraamvensters gekry om by die grondvloer se klassieke Kaaps-Georgiaanse styl te pas.

Verfkleur
Plascon Midland’s Marsh

'n Trap is ’n geleentheid om ’n speelse element in te bring,” sê die argitek, Yoram Shabat, wat die geboë beton-balustrade ontwerp het. Structaform, kontrakteurs wat spesialiseer in in situ-oplossings met beton, het die ontwerp uitgevoer omdat die geronde vorm ’n tegniese uitdaging is.

Vloere van vervaardigde eikehout van Lalegno; matte van Coirtex

Die buite-kuierarea, wat reg buite die kombuis is, het ’n lieflike uitsig op die agterkant van Tafelberg, maar is beskut teen die suidooster. Dakvensters in die latte-plafon sorg dat die ruimte oorgenoeg natuurlike lig kry, en die gepoleerde betonvloer verskaf tekstuur.

Mat van MRP Home

Dis in die detail
Yoram het die vuurmaakplek met sy Kaaps-Hollandse mantel ontwerp – dit kan gebruik word vir braai of vir warmte in die winter.

Die natuurlike elemente en teksture bring ’n tikkie warmte in die huis se skoon lyne.
– Catherine

Nadat Catherine jare lank in Sydney, Australië, gewoon het, het sy dié blou-en-wit houttafel en -bankies saam met haar teruggebring Suid-Afrika toe.

Rusbank van Ercol

Op ’n ander vlak

Die uitdaging met elke ontwerp, veral dié van ’n huis, is om iets te skep wat vanuit ’n praktiese én estetiese oogpunt aan die kliënt se behoeftes en ambisies voldoen, sê Yoram Shabat van YS Commercial Projects.

“Cathy het aanvanklik nie ’n groot opknap beplan nie. Toe sy die huis koop, het sy gedink sy sou net ’n paar klein interne veranderinge aanbring, soos ’n muur of twee uitkap en ’n nuwe kombuis en badkamer inrig – nie geheel en al herbou nie!” sê hy.

“Die bestaande huis was ’n ou kothuis waarby oor die jare aangebou is en wat in die proses in ’n beknopte doolhof met ongemaklike gange en donker badkamers ontaard het – nie juis bevorderlik vir die ligte, moderne, oopplan-voorkoms wat Cathy beoog het nie. Daar was wel ’n sjarmante Kaaps-Georgiaanse fasade wat die toon aangegee het vir die algehele styl, wat baie ooreenstem met wat Cathy wou hê.”

Met die tweede verdieping het hulle ook baie ruimte vir ’n tuin gewen. Enigeen wat dit oorweeg om ’n vlak aan te bou, moet die volgende in gedagte hou, sê Yoram:

1 Ligtestaal- en houtraam-konstruksie is vinniger en skoner as tradisionele bakstene-en-sement. Onthou, alle aanbouings wat ’n tweede verdieping aan ’n bestaande huis behels, vereis munisipale goedkeuring, ongeag watter materiale gebruik word.

2 ’n Struktuuringenieur moet altyd die strukturele lasdraende komponente in die ontwerp vir enige hoër verdieping – hetsy bakstene, ’n ligtestaal- of houtraam – spesifiseer.

KONTAK yoram@yscp.co.za 

Hulle sê jy moet nooit saam met familie werk nie, maar in dié geval was hulle verkeerd! Dit was op die ou end ‘n uiters suksesvolle en aangename projek. – Yoram

Die sitkamer met sy hoë plafon voel steeds knus; ligte voile-gordyne versag die ander meer kontemporêre afwerkings. Catherine het die muur agter die kaggel ongepleister gelaat vir nog tekstuur. Sierade en tydskrifte kry plek op ingeboude boekrakke.

Gordyne uitgesoek deur Jean-Pierre de la Chaumette Interior Design

Pasgemaakte skuifdeure van RA Woodcraft maak oop op die TV-kamer en gastesuite.

Die sitkamer, eetkamer en kombuis, als in een oop plan, is heerlik ruim. Balke teen die plafon help met die skaal en om verskillende ruimtes af te baken. 

’n Dakvenster in die kombuis laat genoeg lig in en skep die gevoel van ’n glashuis.

Eetkamertafel van Saks Corner; hanglamp uitgesoek deur Jean-Pierre de la Chaumette Interior Design; kombuiskaste gemaak deur Core Interiors; groen en wit terrazzo-tee¨ls van Lovric Dittberner Terrazzo Tiles; stoele van Guideline Design

Dis in die detail
Die herd bo die stoof is ontwerp om soos ’n outydse vuurmaakplek te lyk. “Ek het nie geweet hoe dit sou werk nie, maar op ’n manier bring dit die geheel bymekaar,” se^ Catherine.


Die kopertoebehore in die kombuis en al die badkamers is van Victorian Side Bathrooms.

’n Pienk wasbakkas van The New Modernist is ’n speelse element in die tweede badkamer.

Teëls van WOMAG; handdoek van Mungo

Catherine het besluit op drie slaapkamers – almal bo – ter wille van herverkoopwaarde. Daar is ’n aparte gastesuite en badkamer op grondvlak. Die militêre kas in die hoofslaapkamer het aan Catherine se pa behoort.

Deken van The Alpaca Loom; mat van Coirtex; gordyne uitgesoek deur Jean-Pierre de la Chaumette Interior Design 

Die wasbakkas in die hoofslaapkamer se en suite het oorgenoeg pakplek. Wasbakkas van Saks Corner; koperkraan van Victorian Side Bathrooms

Vloerplan

Tuis


VERSKAFFERS & KONTAKTE

Coirtex 021 762 2227

Core Interiors 021 712 6147

Ercol

Guideline Design 021 534 0334

Jean-Pierre de la Chaumette Interior Design 021 461 1549

Lalegno 021 851 0054

Lovric Dittberner Terrazzo Tiles 084 547 1410

MRP Home 0800 212 535

Mungo 021 201 2374

RA Woodcraft 082 327 0588

Saks Corner 021 447 2966

Structaform 021 795 0204

The Alpaca Loom

The New Modernist 082 414 0317

Victorian Side Bathrooms 021 982 0461

WOMAG 021 447 6161