Lindie was ’n deelnemer aan ons Rookie Stylist 2019- kompetisie in vennootskap met MRP Home.

Foto’s Karl Rogers | Stilering Marian van Wyk

WIE WOON HIER?

Lindie en Erick Senekal en hul kinders, Cara (12), Lisa (10) en Bella (7)

WAAR Lemoenkloof, Paarl

GROOTTE 240 m²

Voorfoto Maryna Pretorius

Die werkbank wat nou kombuistafel is, was so vol splinters, Lindie moes ’n industriële skuurder huur om dit af te skuur. Uiteindelik moes hulle spesiale stoeltjies koop sodat die kinders kon bykom by die hoë blad. Die winkeltoonbank was ’n skat wat Lindie in die Seychelle raakgeloop het; Erick het gedink sy was van haar sinne beroof toe sy dit wou saambring Suid-Afrika toe. Maar hier is dit nou! Stoeltjies van Decofurn; horlosie van Bali Trading

Die Art Deco-stoele is erfstukke wat Lindie met linne van Hertex oorgetrek het. Die kas het sy iewers in Voortrekkerweg, Bellville, gekry en wit geverf; so ook die staanlamp. Die goiingmat het sy by Decorex raakgeloop. Blou kussings van Volpes; koffietafel van Family Farmstall

Die “blou huis in Olyvenstraat” het aanhoudend oor hul pad gekom. “Ek sal nooit vergeet toe ek die huis die eerste keer op ’n foto in ’n eiendomsagent se kantoor gesien het nie,” vertel Lindie Senekal. Want op daardie oomblik het sy geweet dis haar droomhuis daar teen die kennisgewingbord.

Maar vir lank het dit gelyk asof dit hulle nie beskore sou wees nie. Die gesin het vyf jaar in die Seychelle gewoon, en toe dit tyd word vir terugkom, wou hulle hulle in die Paarl vestig.

“My man, Erick, is ’n projekbestuurder en was betrokke by die Eden Island-ontwikkeling. Dit was ’n heerlike tyd, maar niemand het vir my cocktails aangedra nie,” vertel sy. Want dié ma van drie moes ook daar op die eiland al die gewone ma-dinge doen.

Maar sy kon darem die eiland se natuurskoon geniet. Terwyl die kinders op skool was, het sy en ’n vriendin in die see op hul “SUP”-planke gaan roei. “Smiddae het ons weer op die strand ontmoet, dan saam met ons kinders. Dis maar wat jy doen daar. Die weer is altyd lekker, en die water is altyd warm.”

Hul dogters was in die internasionale skool. “Maar ons wou vir hulle hê wat ons gehad het – ’n skoollied, skoolklere, spansport,” vertel Lindie. “Ná vyf jaar van strand toe gaan, soek ’n mens darem ander opsies ook!” En dis waar hul reis terug na hul hartland begin het...

Die voorportaal, nou sonkamer, was die oorspronklike voorstoep. Lindie het die kopstuk uit ’n tweedehandswinkel aan die bed laat vassweis en die kapstok is gemaak van ou vensterhortjies. Die trommel, tafeltjie en swart koffieroosterpot is erfstukke. Die seemeeu en mat kom uit die Seychelle. Geel mandjie van Pizzazz Interiors

Die Union Jack-mat in die studeerkamer was ’n afskeidsgeskenk van vriende in die Seychelle.

’n Ander hoek van die sonkamer met die oorspronklike voordeur links. Die tafel, stoel en hoedetrommel is erfstukke. Die skildery was ’n afskeidsgeskenk van vriende in die Seychelles en die hasie het sy by ’n verkeerslig gekoop.

Die versameling op die kaggel is erfstukke en snuisterye wat oor die jare versamel is. “Ek is mal oor engele en glo hulle bring ’n sekere mate van rustigheid op hulle stil manier,” vertel Lindie.

Vir my hoef iets nie heeltemal prakties te wees nie – solank dit net mooi is! – Lindie

Die dagbed in die kombuis is nog ’n vonds uit Voortrekkerweg; Lindie het die kussing met Biggie Best-lap oorgetrek. Sy het die plantstaander by die Milnerton-mark gekry en die mat – ook tweedehands – in Istanboel gekoop. Die skilderye is Lindie se eie handewerk.

Lindie het die rakke van steierplanke vir Erick se boekversameling laat insit as ’n verrassing terwyl hy weg was vir sake.

Die foto’s teen die muur in die TV-kamer is van die gesin toe die dogters nog klein was en van die vyf jaar wat hulle in die Seychelle gebly het. Lindie het die rame deur die jare versamel en in tweedehandswinkels uitgesnuffel. Grys ottoman en gras-ottoman van Incanda; kussings van Volpes

Drie keer is skeepsreg

Lindie het in Mei 2015 haar ouers se huweliksherdenking kom bywoon en terselfdertyd begin huis soek in die Paarl. Sy het foto’s van die Olyvenstraat-huis per e-pos vir Erick aangestuur en hy het dadelik laat weet: “My vrou, as budget nie ’n kwessie was nie, het ons dit nóú gekoop!”

Maar hulle kon dit nie bekostig nie en het besluit om te huur. Teen die tyd dat hulle na huurhuise begin kyk het, was Erick ook terug in die land. En dis toe dat die huis ’n tweede keer oor hul pad gekom het – want sowaar, daar neem die agent hulle na die einste blou huis in Olyvenstraat, wat toe weer in die mark was.

“Ek het trane in my oë gekry, maar Erick het gesê: ‘My vrou, nee.’ Weer moes ek wegstap van my droomhuis.”

Maar drie maal is skeepsreg. ’n Familielid het uit Angola laat weet hulle het vriende wat ’n huis in die Paarl wil verkoop – wéér die blou huis! Toe het Lindie geweet die huis is vir hulle uitgesoek.

En so kon hulle in November 2016 intrek in ’n huis wat so perfek was dat hulle niks daaraan hoef te gedoen het nie.

“Ek het net hier en daar geverf,” vertel Lindie. “Selfs die tuin was net reg. Dit was soos Kersfees. Al ons meubels was vyf jaar lank in ’n pakhuis en ek kon nie eens meer onthou wat ek alles het nie. Soos hulle dit indra, het ek gedink: Haai ja, hier’s dit, ek het al vergeet daarvan. Alles het perfek gepas.”

Saam met elke meubelstuk het elkeen se storie ook die huis kom vul. “Behalwe dat ek lief is vir tweedehandswinkels, markies en veilings, is ek boonop nostalgies. En dis omtrént ’n resep vir ’n oorvol huis!”

Foto Jan Ras | Stilering Misi Overturf

Die bal-en-kloustel was ’n Gumtree-kopie wat Lindie laat oortrek het; die nestafeltjies is ’n erfstuk. 

Die Senekals het die vuurput en die afdakkie twee jaar gelede laat bou, een van die min toevoegings wat hulle gemaak het. Die tuinbankie van Mica is geel geverf en die blou stoele kom uit ’n winkel op Kleinbaai toe hulle jare gelede daar gekuier het. Ou houttafel en -stoele van Family Farmstall

2008 se nuwe baadjie

Die goeie toestand waarin die Senekals se huis was, is te danke aan die argitek Maryna Pretorius wat die huis vir haar ouers, Keet en Ella Pretorius, vernuwe het. Hulle het van 2008 vir sowat sewe jaar hier gewoon.

“Die huis is volgens my ouers se behoeftes ingerig as aftreehuis, maar moes met die oog op herkoopwaarde ook funksioneel bly vir ’n jong gesin,” verduidelik Maryna.

“Die inbring van natuurlike lig en son was baie belangrik. Dit is bewerkstellig deur die ‘konyn-nes’ van gangetjies en klein vertrekke aan die noordekant – alles latere toevoegings tot die oorspronklike huis – te sloop. Deel van die oplossing was die toevoeging van ’n ruim oopplan-leefarea en veranda.

“Die verwantskap tussen die huis en die tuin was ook belangrik, en baie aandag is gegee aan die tuinuitleg en definisie van verskillende ruimtes daar, insluitend ’n swembad.”

Die eenvoudige vooraansig van die huis, wat in die veertigerjare gebou is, verklap nie die nuwerwetse binne- en agterkant nie. “Respek vir die straatkonteks is belangrik. Ek het ’n groot liefde vir erfenisgeboue van enige ouderdom en glo in ’n ligte hand met die vernuwing daarvan. Die enigste verandering aan die straataansig hier was die toebou van die oorspronklike voorstoep met herwinde vensters ten einde ’n beskutte ingang na die huis te skep. In kontras hiermee het die nuwe aanbouings ’n eie identiteit.

“Onderskeid tussen oud en nuut is ’n belangrike benadering tot so ’n projek, anders bestaan die gevaar van ’n afwatering van die oorspronklike deur die blote nabootsing van stylkenmerke.” 

Lindie het die kopstuk vir die hoofslaapkamer self gemaak en oorgetrek met materiaal wat Erick as Kersgeskenk vir haar gegee het. Springbokvelle dien as bedmatjies. “Ek wou ’n handsak daarvan laat maak het, maar dit gaan nie meer gebeur nie!” Kandelabers van MRP Home; Franse streepsak vir kussing van Koöperasie Stories

Die wêreldkaart in Erick se studeerkamer was ’n geskenk. Die lessenaar is eenvoudig ou steierplanke op gesweiste pote. Daaronder bêre Lindie al haar ou uitgawes van Tuis.

Die paspop in die hoofslaapkamer se badkamer kom uit ’n dekorwinkel wat Lindie voor die kinders se geboorte gehad het. Sy het die kassie ook êrens uitgesnuffel, blou geverf en lapinsetsels in die deurtjies gesit. Handdoeke van MRP Home

Lindie en Lisa met Jasper die kat.

Lindie se dekorraad

As eienaar van die dekorsaak Pizzazz Interiors het Lindie raad vir ander wat hul huis met stories wil vul: 

• Hou groot, duur items soos banke en gordyne neutraal, want jy sal dit nie gereeld wil vervang omdat dit nie meer in die mode is nie. Maak kleur eerder ’n fokuspunt, soos ’n geel kas of stoel en herhaal die kleur in ’n strooikussing of deken.

• Dis nie nodig om altyd nuwe goed te koop nie. Gebruik wat jy in jou huis het, en grawe die ou skatte uit jou kaste uit.

• Gaan snuffel rond by tweedehandswinkels en markies – jy sal verbaas wees hoe ’n ander man se rommel jou skat kan word met ’n bietjie aandag en liefde.

• Speel met teksture as jy nie van kleur hou nie en bring plante in; hulle dra by tot die atmosfeer in jou huis en bring die natuur binnetoe.

• Stal uit! As jy uitstallings (“table scapes”) op rakke of tafeltjies maak, groepeer uiteenlopende voorwerpe van wisselende groottes en hoogtes saam. Ek glo “meer is meer” – dikwels kort daar net nog ietsie om die “Jislaaik!”-effek te kry. Gebruik ou silwerware of koppies, of ou trofees of glasware en sit dit op ’n silwerskinkbord om ’n eenheid te vorm.

KONTAKTE EN VERSKAFFERS

Bali Trading 021 875 5663

Decofurn 087 740 1800

Family Farmstall 021 872 4854

Hertex 0860 437 839

Incanda 021 863 1965

Koöperasie Stories 076 303 9336

Maryna Pretorius (argitek) 082 377 4098

MRP Home 0800 212 535

Mica 021 871 1929

Pizzazz Interiors 082 873 3533

Volpes 021 555 4140