Foto’s Elza Cooper | Stilering Amanda van Wyngaardt

WIE WOON HIER? Teresa Dalton

WAAR Craighall Park, Gauteng

Grootte [82 m²]

Die warm elemente van die huis se buitekant – beton, hout, swart aluminium en bakstene – word in die kombuis herhaal. Die kombuiskaste en die groen van die bamboes reg buite die stapelvensters bring die natuur by die klein ruimte in.

’n Bal-en-klou-dientafel wat eers op die stoep gestaan het, het nou nuwe nut as eetkamertafel. Deur dit teen die kombuiseiland te skuif, spaar dit ruimte, maar dien tegelykertyd as toonbank. Vir etes kan dit weggeskuif word.Teresa het die stoele, wat haar ma s’n was, laat herstoffeer in lap van Arthur Bales.

Hanglampe van Amatuli

Dis in die detail
Sonder bokaste voel die oopplan-kombuis-en-leefarea heerlik ruim.

In die verwoestende brande wat die Tuinroete in 2017 lamgelê het, het Teresa Dalton en haar destydse man alles verloor. Soos baie ander op 7 Junie daardie jaar kon hulle net hulpeloos toekyk hoe die vlamme hul huis verswelg.

“My huis was my toevlug,” onthou Teresa. “Dit was vol spesiale herinneringe, foto-albums, skaars boeke, antieke ware en meubels wat ons met sorg en liefde bymekaargemaak het in die 14 jaar dat ons daar gewoon het. Alles het tot op die grond afgebrand.

“Dit was die ergste ding wat ek nog beleef het. Ek is ’n keramiekkunstenaar en buiten ons huis het ek ook my ateljee met al my werk daarin verloor. Ons moes so skielik ontruim dat ons nie eens ons kat, Stripel, kon opspoor nie! Gelukkig het sy oorleef; my man het haar 32 dae later gekry en sy is nou weer terug by my.”

Met net die klere aan haar lyf, en nadat haar huwelik boonop tot ’n einde gekom het, moes Teresa van nuuts af begin.

Haar dogter en skoonseun het voorgestel hulle vergroot die gastesuite by hul huis in Craighall Park in ’n woonplek vir haar. Teresa was radeloos, en het die geleentheid aangegryp om ’n nuwe lewe in Johannesburg te maak.

Teresa het hul aanbod aanvaar en Debbie Luke van Designed by Debbie se hulp ingeroep, wat saam met haar span kenners ’n leefarea van 52 m² by die gastesuite aangebou het. Vier maande later kon Teresa intrek.

Teresa se liefde vir wildekatte word weerspieël in baie van die materiaal en plakpapier in haar huis.

Strooikussings en plakpapier van Ardmore Design

 

Debbie Luke het die houthortjies voor die kombuis se skuifdeure ontwerp vir skadu en privaatheid.

Debbie en haar span het die betonblaaie en -sye op die plek gegiet.

Vandat ek by my lieflike huis ingetrek het, het my hart weer begin heel word. – Teresa

Dié fokusmuur, wat Teresa haar “Royal Gallery” noem, spog met afdrukke van adellikes uit die geskiedenis, Alex Hamilton-kuns en erfstukke van haar ma.

Koffietafel met marmerblad van Block & Chisel; rusbank van Classic Bond

Stoel van Re-Trend

Teresa het Debbie gevra om dié buffetkas, ’n erfstuk van haar ma, donkerblou te spuitverf om by die fokusmuur te pas.

Die slaapkamer en sy badkamer was voorheen die huis se gastesuite.

Plakpapier-motief van Shutterstock

Elegant en eklekties

Teresa en haar dogter het self ingespring met die binneversiering. “Ons is voëls van eenderse vere,” sê Teresa. “Sy is ’n modeontwerper en met haar ateljee nou reg agter my vleuel bring ons baie gelukkige ure saam deur.”

Buiten ’n nuwe mosterdkleurige fluweelbank in die sitkamer en ’n paar kleiner stukke is alles tweedehandse kopies of geskenke van familie, vriende en selfs vriende se vriende!

Teresa se ma is in Maart 2018 oorlede en sy het baie van haar hartsgoed geërf – onder meer Persiese matte, kunswerke en kosbare breekgoed. Dit alles word nou in haar huis gebruik en is ’n soete herinnering aan haar ma.

Met ’n palet van grys afgevlakte vloere, ontblote baksteenmure, verf en plakpapier in juweelkleure het Teresa ’n boeiende, eklektiese ruimte geskep wat ook weelderige teksture, treffende motiewe en titsels blieng insluit.

Debbie, wat die ma-en-dogterspan dopgehou het terwyl hulle die huis versier het, sê: “Teresa en haar dogter meng en pas met ongelooflike selfvertroue en al kontrasteer alles, werk dit eenvoudig saam in dié ruimte. Dis was ’n bevrydende avontuur en welkome afwisseling van my gewone monochroom, minimalistiese en simplistiese projekte.

“Hulle het hulle nie deur die reëls laat voorskryf nie en ek het telkens ’n bietjie ligter en vroliker van hulle af weggery nadat ek met al daardie kleure en patrone gewerk het.”

Teresa se nuutste keramiekwerke pryk ook teen die mure. Sy het vier jaar gelede verfwerk op keramiek begin doen as stokperdjie.

Teresa wou ’n barok-gevoel in die badkamer hê en het die mure in ’n ryk goudkleur geverf.

Verfkleur
Mure geverf met Fired Earth Liquid Metal in die kleur Old Gold

Lampkap van shop.vladimirtretchikoff.com

My kleinkinders noem my ‘Glammy’ en het my nuwe huis ‘The Glammy Palace’ gedoop. Dis vir my ’n groot bron van vreugde om so baie tyd saam met hulle te kan deurbring. – Teresa

“Ek wou ’n intieme ruimte hê; daarom het ek donkerblou gekies vir kontras met die baksteenmuur,” sê Teresa. ’n Versameling spieëls in swierige goue rame saam met die mosterdkleurige en rooi fluweel van die meubels staan lieflik uit teen dié donker kleur.

Muur geverf met Plascon Blackbeard; spieëls van Hadeda en tweedehandswinkels

Die binnehof se mure eggo die kleur van die aksentmuur in die leefarea – ’n slim plan om samehang tussen twee ruimtes te kry. Die smeeysterstoele is uit Teresa se huis in Knysna gered en gerestoureer. Sitplekke gestoffeer met lap van Arthur Bales, buffetkas van Ikea

Kleurryke keramiekware gee trefkrag teen die binnehof se blou muur; Teresa het die twee kleiner vase gemaak.

Groot vaas van Hadeda; meerminne van Cart

’n Swewende betonblad buite die kombuis se stapelvenster bied ekstra kuierplek.

Op die dak bied ’n skerm van wit geverfde sintelblokke privaatheid vir ’n kuierarea in die Marokkaanse styl wat nog hier ingerig word. 

Waar Teresa se blyplek nou is, was voorheen ’n stuk tuin.

KONTAK EN VERSKAFFERS

Amatuli 011 440 5065

Ardmore Design 011 268 5757

Arthur Bales 011 888 2401

Block & Chisel 021 691 0878

Cart 084 560 5852

Classic Bond 011 440 7489

Designed by Debbie 082 555 4965

Hadeda 011 788 5774

Re-Trend 011 888 2593