Foto’s Francois Oberholster l Stilering Marian van Wyk

DIE HUISEIENAARS

Warrick en Theodora Raubenheimer

WAAR Ongegund Village, Riebeekvallei 


Die voordeur, ’n dubbele staldeur, is gemaak van 100 jaar oue wynvate van Franse eikehout wat by die KWV-wynkelder uitgegooi is. Dis ’n imposante 2,5 m hoog en 1,8 m breed. Gruis was die ideale keuse vir die oppervlakke buite – dis kostedoeltreffend, maklik om te lê en verleen tekstuur.

Franse eikehout verskaf en houtdeure gemaak deur Cape Dutch Joinery; staalwerk deur De Langekloof Ysterwerke

Met die ontwerp van sy eie huis het die argitek Warrick Raubenheimer hom telkens vasgeloop: sy planne op papier was net te bekend, ’n herinnering aan iets wat hy al voorheen gesien of ontwerp het – hoewel hy vir hom en sy gesin bitter graag iets nuut en vars wou bou.

Dit was eers toe hy en sy vrou, Theodora, begin speel het met die idee van staalraamvensters dat die stukke van die legkaart in mekaar begin pas het. Dié vensters is niks nuuts nie, maar ander ontwerp-elemente soos dik houtbalke en plafonne van rou beton het gevolg. Gou het sy droom begin vorm aanneem, en al hou Warrick vol dat hul huis nie ’n spesifieke styl het nie, verleen die treffende swart staalraamvensters beslis ’n industriële gevoel aan die struktuur.

Die paartjie het in 2017 met bouwerk begin nadat hulle ’n groot erf op die rand van die Ongegund Village aan Riebeek-Wes se buitewyke gekoop het. “Die erf kyk uit op wingerde en die lengte van die Kasteelberg, en dit was dié fantastiese ligging wat die trekpleister was,” sê Warrick. Ongegund Village was voorheen ’n myndorp van PPC Cement, maar nadat nuwe intrekkers die bestaande huise begin opknap het, is dit deesdae ’n gewilde blyplek.

In Mei 2018 kon die Raubenheimers intrek by hul nuwe huis met sy drie slaapkamers (almal en suite) ’n oopplankombuis-eet-en-sitkamer, opwaskamer, TV-kamer, gastetoilet en motorhuis met plek vir vier rygoed. “Ons grootste struikelblok was die begroting. Nogtans was dit ’n opwindende uitdaging om iets ongewoons met imposante proporsies binne ’n begroting te skep,” sê Warrick.

Al die kragpunte in die hoof-leefareas word gekenmerk deur ontblote gegalvaniseerde geleipype en industriële skakelaars van gietyster en koper.

Die tuin by die huis se ingang, wat na die voordeur lei, skakel met die binnehof waarop die kinders se TV-kamer oopmaak.

’n Oopplan-leefarea beteken almal kan saamkuier – of jy nou in die kombuis, voor die TV, by die braaiplek of met ’n koppie koffie op die stoep sit. Dakbalke van Chestnut Grove Sawmills

Ek geniet hoe die natuurlike lig by die vensters van uiteenlopende vorms en groottes instroom. – Warrick


Die kombuis het ’n praktiese ontwerp en omdat die gesin graag kook, maak dit deel van die leefruimte uit. Dieselfde 100 jaar oue eikehout wat vir die voordeur gebruik is, is in die kombuis gebruik vir die eiland en ’n werkblad daaragter. Die mandjies en borde teen die muur is kopies wat hulle op reise deur Afrika, waaronder Marokko, gekoop het.

Groot hoekvensters omraam die uitsig op die berg en wingerde. Die twee Art Deco-stoele het aan Warrick se ouma van Colesberg in die Karoo behoort, en die drie houtligte, gemaak van die uitgedroogde stamme van sisalbome, is die handewerk van ’n Malawiese vakman van Wildernis. Staalvensterrame deur Klapmuts Windows

Argitektoniese elemente

As die argitek van sy eie huis kon Warrick ’n slag self besluite neem oor die keuse van materiale en afwerkings. “Wanneer jy vir ’n kliënt werk, word jy dikwels beperk deur moontlike konstruksie-risiko’s,” verduidelik hy. “Daarom was dit ’n welkome verandering om die vryheid van my eie besluite te smaak.”

Warrick het die volgende materiaal vir ouwêreldse industriële trefkrag gebruik en dit afgerond met skoon lyne: Standaard-kleibakstene is ideaal vir ’n effens verweerde voorkoms; dis redelik bekostigbaar en lyk ál mooier hoe ouer dit word. Boonop is dit geskik vir gebruik binne en buite. Industriële staalvensters van verskillende groottes en vorms speel ’n groot rol in die huis se sjarme.

Omdat die meeste vensters so hoog oopmaak, is dit nie maklik bereikbaar van buite nie, wat dit redelik veilig maak. Vierkantige hout-dakbalke met ruwe houtplafonne in sekere areas dra by tot die industriële gevoel van die huis. Die plafonne van vooraf gegote bekiste beton op die tweede verdieping balanseer die gladde betonvloere deur die hele huis.

Muurgemonteerde kraggeleidings en ouwêreldse skakelaars bring ’n besonderse industriële element in, terwyl gladgepleisterde binnemure keer dat die huis “te industrieel” lyk. Buite het die stoepe staaldakke; daar is ook ’n kombinasie van I-balke, ontblote dakplate en muurgemonteerde kragpype, skakelaars en waaiers.

Die gebou skakel pragtig in by sy omgewing aan die voet van die berg. Hoewel groot, is dit nie oorweldigend nie, danksy ’n hoë dennebos in die agtergrond. Die windpomp werk nie, maar verskaf ’n speelse plaas-element.

Die argitek en huiseienaar Warrick Raubenheimer.

Die oop trap versterk die gevoel van ruimte en omdat daar nie jong kinders in die huis is nie, is veiligheid nie ’n probleem nie.

Natuurlike dekor

Theodora, wat die dekor behartig het, sê die huis het nie veel “tradisionele” afwerkings nie. “Ons het alles so natuurlik en skoon moontlik gehou deur geen teëls en vloerlyste in te sit nie, die hout onafgewerk te los en ongepoleerde graniet en ongeverfde beton te gebruik,” verduidelik sy. “Ons wou hê alles moet natuurlik en eg lyk en inskakel by ’n gevoel van ‘minder is meer’. Ons het hout, staal, katoen, leer en beton gebruik vir ’n aardse voorkoms.”

Vir die kleurskema het Theodora inspirasie gekry in die skakerings van die omringende wingerde, berge en veld met sagte groene en gryse, en ’n moderne titsel swart. Die meubels is ’n kombinasie van oud en nuut, en elke stuk is noukeurig uitgesoek vir ’n gemaklike, praktiese atmosfeer in pas met die Raubenheimers se leefstyl. “Ons is gaande oor Afrika en ’n mens kan dit in ons huis sien. Ons het houtmeubels, geweefde sitsakke, matte en kussings gekoop by plaaslike vervaardigers soos Eco Furniture Design en Ashanti Design, wat ongelooflike werkskeppingsprojekte in Kaapstad bedryf.”

Die tieners het hul eie spesifieke vereistes vir hul kamers se verfkleure gehad, en die hoofslaapkamer en sy en suite het ’n wit palet wat pragtig lyk saam met die houtafwerkings. “Dis lig en helder en die warm houtaksente gee dit ’n knus gevoel,” verduidelik Theodora. “Ek kan die ruimte inkleur en opkikker met kussings, dekens en matte.”

’n Groot opening tussen die hoofslaapkamer en sy badkamer versterk die gevoel van ruimte; die idee is dat hulle dit later met ’n houtskerm kan toemaak indien hulle so voel. Die houtblad bied staanplek vir persoonlike items.

Vloerplan


Warrick se wenke vir groentjie-bouers

• Ontwerp binne jou begroting en wees eerlik met jou argitek oor jou finansiële beperkings.

• Kry raad by kenners in die bedryf.

• Moenie te veel kortpaaie kies met belangrike elemente soos die hoofstruktuur, dak, vensters en deure nie.

• Skep ’n huis wat nommerpas is vir jou en jou gesin, en sluit met trots persoonlike items in wat julle na aan die hart lê.


KONTAK & VERSKAFFERS

Ashanti Design 021 461 0367, ashantidesign.com

Cape Dutch Joinery 022 487 1254, capedutchgroup.co.za

Chestnut Grove Sawmills 083 489 2878, chestnutgrove-sawmills.co.za

De Langekloof Ysterwerke 082 784 4004

Eco Furniture Design 021 838 2441, ecofurnituredesign.com

Klapmuts Windows 021 875 5885, klapmutswindow.co.za

Warrick Raubenheimer 082 460 6635, wraubenheimer.co.za