Foto’s Stephané van Eck l Produksie Marian van Wyk

WIE WOON HIER?

Vicky Zigras

WAAR Kaapstad

GROOTTE 42 m²

Ná ’n verblyf van 17 jaar in Londen se grou omgewing was Vicky Zigras meer as gereed vir sonskyn en die skoon, blou lug toe sy in 2019 na Suid-Afrika terugkeer. Sy het die perfekte klein ateljeewoonstel in die Kaapse middestad gevind in ’n woonstelblok met lowerryke tuine, ’n ryk voëllewe, ’n swembad gevoed deur ’n fontein en die mooiste uitsig. 

“Ek het in Desember 2019 ingetrek en geniet dit werklik om hier te woon – selfs gedurende die inperking!” sê Vicky met ’n glimlag. “Die gebou, wat in die 1960’s deur die Duitse argitek Pius Pahl van die Bauhaus-skool ontwerp is, kan dalk strak lyk van buite, maar ek is mal oor die goed deurdagte ontwerp met sy sentrale binnehof, swembad en oorgenoeg lig en privaatheid.” 

Hoewel Vicky se blyplek skaars 42m² beslaan, bak dit in die wintermaande heerlik in direkte sonlig danksy ’n noordoostelike oriëntasie. In die somer kry dit weer glad nie namiddagson nie. Ongelukkig het die interieur veel te wense oorgelaat. “Dit is klaarblyklik dekades laas verfris en daar was ’n hele mengelmoes van style,” sê sy. “Dit was donker en het soos ’n grot gevoel.” 

Ekstra sluitbare kasspasie is bo die klerekas geskep, terwyl ’n toeklap-lessenaar tussen die slaap- en leefdeel baie plek spaar. Lessenaar van MySpace.CT Furniture

Blou, groen en spatsels geel in die sit-area eggo die loof van die plante in die woonstel en die bome anderkant die balkon. Die afdruk bo die bank is deur ’n vriend van Vicky, die ontwerper/illustreerder Anton Fernandes van Kornershop. Bank van @home; rottangkoffietafel van MRP Home

Oop en helder

’n Houttoonbank tussen die kombuis en leefruimte is verwyder ter wille van ’n oopplan-voorkoms. Die ou kombuiskaste is uitgebreek en die nuwe uitleg is sorgvuldig beplan om die natuurlike lig ten beste te benut. “Ons het die stoof langs die venster geplaas vir ventilasie en sodat ek die uitsig kan geniet terwyl ek kosmaak,” verduidelik Vicky. “Ons kon ook ’n tafel en twee stoele inpas sodat die hele leefruimte se vloer oop kon wees en ek ’n onbelemmerde uitsig op die tuin uit die slaapkamer kan geniet.”

Hoewel die oorspronklike blokkiesvloer van rooshout in die leefvertrek nog in ’n goeie toestand was, het dit die ruimte donker en beknop laat voel; ’n kleurverskil tussen die kombuisteëls en die houtvloer het ook ’n ongemaklike verdeling geskep. “Ek het aanvanklik die hout laat skuur en wit geverf, maar daar het vlekke op die vernis verskyn,” sê Vicky. “Uiteindelik het ek maar ’n gelamineerde vloer in ’n kleur wat aansluit by dié van die kombuisteëls bo-op laat lê. Ek hou van hoe dit nou lyk – dit weerkaats die natuurlike lig mooi en maak maklik skoon.” 

Eie oase

Vicky was nog altyd gefassineer deur die Hawaise voorkoms, veral die plantasiestyl gekenmerk deur ’n kombinasie van vintage-meubelstukke, rottang of hout hier en daar, asook tropiese plante. “Ek wou die gevoel van ’n lugdeurdrenkte, eksotiese en tropiese oase hier skep,” verduidelik Vicky. 

Sy het by haar suster, die binneontwerper Nikki Zigras van Studio Do Cabo, gaan aanklop om planne en tegniese tekeninge vir die nuwe voorkoms op te trek, waarna Vicky self die opknapprojek bestuur het. “My bouer, Simba Kasu, en skrynwerker, Wilson Chirikumarara, het ook voorstelle gemaak, verduidelik wat gedoen kan word en al my vrae met eindelose geduld beantwoord!” vertel sy.  

[SLIM TRUUK]

Al is die woonstel hoe klein, het Vicky dit reggekry om by haar voordeur ’n portaaltjie te skep wat met ’n glasdeur van die oopplan-leefruimte afgesluit word. “Dit verminder die geraas van die gemeenskaplike gang aansienlik en is die perfekte plek vir my serpe, handsakke, hoede en skoene. Só hou ek dié soort losgoed ook uit my leef- en slaapplek,” verduidelik sy.

“Dis vir my lekker om tuis te kom, my skoene by die deur uit te skop, my sleutels en handsak op te hang en my sloffies aan te trek voor ek die leefarea betree en die wêreld uitsluit.”

Die Ercol-leunstoel uit die middel van die vorige eeu is geverf met Creative Talents Craft Paint No.46 Olive. Stoel van Myrtle’s Vintage Bazaar; kussing van Ark Paper Studio; deken van H&M

Die tropiese voorkoms strek tot in die slaapkamer met ’n versameling loofbedrukte kussings en mat. Vouskerm van Myrtle’s Vintage Bazaar; kopstuk van Tafelberg Furnishers; antieke eikehoutbankie van CollectMeaStory; ronde mat van Airloom; deken van Woolworths

Ek sou nie sê my skilderwerk beïnvloed my dekor nie – dis eerder andersom! Ek hou van kleur rondom my. – Vicky

Slaap- en badkamer 

Vicky sou aanvanklik skuifdeure tussen die slaapkamer en leefvertrek insit, maar het later daarteen besluit. Dit was nie nodig nie en sy gebruik ’n vintage-skerm om die slaapkamer snags effens af te skort en die skerp oggendson te vermy.

“Ten einde ’n bed van koningingrootte met genoeg beweegruimte rondom te akkommodeer, het ek die hoek waar twee van die badkamermure by mekaar aansluit laat uitbreek en die deur geskuif,” vertel Vicky. “Die bietjie badkamerspasie wat ek moes prysgee laat die slaapkamer nou soveel ruimer voel.” 

Al die oorspronklike badkamertoebehore is verwyder en die groot 150-liter-geiser vervang met een van 75 liter, netjies agter ’n klein deur weggesteek. Om plek te bespaar en vir beter vloei is die wasbak se betonblad reg langs die stort. “Dit herinner my aan die eenvoudige, organiese Griekse eiland-argitektuur,” sê sy.

“Die blad is bedek met mediumgroot mosaïekteëls en daar is genoeg plek vir ’n wasgoedmandjie onder die wasbak. Omdat die badkamer te klein is vir glasdeure of -skerms, is ’n geboë reling wat die stortvloer se kurwe volg, aangebring vir ’n stortgordyn.”

[KALEIDOSKOPIES TROPIES]

Vicky beskryf haar dekorstyl as “kaleidoskopies tropies” en haar woonstel spog met ’n pragtige versameling huisplante. “My passie vir plante het in Londen posgevat. Die beroemde Columbia Road-blommark was net ’n kort stappie van my blyplek en ek het elke Sondag vars blomme en plante daar gaan koop,” vertel sy. “Ek skep graag ’n buiteluggevoel in my woonruimte. ’n Kombinasie van inheemse plante werk goed hier in die sonkolle voor die venster, terwyl subtropiese plante perfek is vir plekke wat nie direkte son kry nie.

 “Ek verkies min-moeite-plante – daardie outjies wat nie omgee as jy af en toe vergeet om hulle nat te gooi nie,” sê Vicky. “Na my mening is ’n geraamteplant ’n kanniedood wat jaar ná jaar die mooiste blare sal voortbring!”

Wat meubels betref hou Vicky daarvan om nuwe nut aan ou stukke te gee. “Ek is dol oor meubels met kurwes – om estetiese sowel as praktiese redes,” verduidelik sy. “Die Weense kunstenaar Hundertwasser het gesê daar is nie so iets soos ’n reguit lyn in die natuur nie. Kurwes het ’n vroulike energie wat help om ’n vorm wat andersins net ’n harde boks sou wees, te versag. Dalk is dit hoekom ek soveel van die 1960’s se meubels met hul elegante pote en kontoere hou.

 “Dis boonop prakties in ’n klein ruimte waar jy maklik in meubels kan vasloop; die ronde hoeke en rande kan jou nie so seermaak soos skerpes nie. Ek het dit in gedagte gehou toe ek die kombuistafel, koffietafels en stoele gekies het.”

Vicky was van plan om metro-teëls teen die badkamermure te gebruik, maar het haar hart op hierdie Delicious Monster-teëls verloor wat perfek by haar tropiese voorkoms pas. Bloekomblare en ander groenigheid dra by tot die woudgevoel én laat die vertrek boonop soos een ruik ook.  Teëls van Tiletoria

As oudbibliotekaris is Vicky dol oor haar uitsig op die indrukwekkende koepel van die Sentrum vir die Boek (heel regs), ’n Eduardiaanse gebou wat deel van die Suid-Afrikaanse Nasionale Biblioteek uitmaak.

Danksy ’n uittrekbare droograk onder die kombuisvenster op die balkon is wasgoed nie van buite sigbaar nie. Met vyf lyne is dit ook ’n goeie plekbespaarder.

Plascon Fortune’s Prize op die kombuiskaste sluit aan by die gebou se wortels in die middel van die vorige eeu; dit verfris die ruimte sonder om dit te oorweldig en skakel in by die planttema. Kombuistafel en spieël van Decofurn

Voor

Oop rakke met maklike toegang tot noodsaaklike artikels en plek vir plante werk goed in ’n klein ruimte. Kruideniersware, breekgoed en plastiekware word agter deure gebêre. Metro-teëls van Tiletoria

[Vicky se dekorwenke]

• Hou die vloer- en werkruimte so oop moontlik deur die mure te gebruik: Hake vir hangplek, ’n muur-gemonteerde lessenaar en skoenerak, asook kaste van die vloer tot die plafon, werk baie goed. 

• Kies veeldoelige meubels. Hier dien kanttafels ook as stoeltjies vir ekstra sitplek langs die kombuistafel. Nog ’n stoel word by die lessenaar geleen en tafel toe gedra indien nodig. 

• Laat lig in! Klein ruimtes kan maklik donker wees as gevolg van die skaduwees wat groot meubelstukke vorm. Tafels en stoele met dun pote laat meer lig deur en lyk eleganter in ’n klein ruimte.

• Benut al die moontlike natuurlike lig in jou ruimte met behulp van weerkaatsende oppervlakke soos glasblaaie op tafels, geraamde prente en skilderye, blink teëls en spieëls.

• Maak seker daar is genoeg laaie en kaste waarin jy alledaagse gebruiksgoed, kruideniersware, skoonmaakmiddels en -toerusting kan wegpak, en gebruik rakke en horisontale oppervlakke as uitstal-plek vir ornamente wat by jou dekor inskakel. 

VERSKAFFERS EN KONTAKTE

@home 0860 834 834

Airloom 021 932 6318

Anouk Furniture 079 489 4206

Anton Fernandes 073 424 2868

Ark Paper Studio 

CollectMeaStory 076 639 0652

Creative Talents 016 427 1030

Decofurn 087 740 1800

 

H&M 

MRP Home 0800 212 535

Myrtle’s Vintage Bazaar 072 848 4457

MySpace.CT Furniture 079 749 9752

Simba Kasu 074 526 7109

Studio Do Cabo 063 161 8578

Tafelberg Furnishers 021 944 3330 

Tiletoria 021 511 3125

Wilson Chirikumarara 078 314 9546