Foto’s Francois Oberholster Stilering Marian van Wyk

Stapeldeure hou die bobbejane uit die Duckitts se kuierstoep. “Die argitek het dit eintlik as ’n oop boks ontwerp, maar ek het sommer reguit vir hom gesê ‘sodra jy loop, sit ons deure in!’ Hy het net sy hande in die lug gegooi. Wat kon hy nou eintlik doen?” sê Carla en lag. Die sementsitplekke het sy jare gelede by ’n kwekery gekoop. Met die nuwe sinkbekleding is die huis “Blikbox” gedoop. Selfs die jacuzzi het ’n sinkdeksel.

WIE WOON HIER?

Carla en Charles Duckitt

WAAR Voëlklip, Hermanus

GROOTTE 340 m²

“Al die padtekens is wettig bekom – nie een is gesteel nie!” verseker Carla. “Toe ons in Houston, Texas, gebly het was die Round Top Antiques Fair naby Austin ’n ongelooflike ervaring; dis waar ek die geel padteken met die skoolkinders op gekoop het. Die geel skoolbusse was oral te sien en by elke bushalte was daar gewoonlik so ’n teken.” Die nommerplate dien as ’n soort poskaart van al die dorpe waar die Duckitts al gewoon het – van Sasolburg tot Hamburg. Geel trommel van Walker Bay Recycling

Hermanus het nog altyd spesiale herinneringe gehad vir Carla en Charles Duckitt. Hier het Charles se familie jare lank vakansie gehou, en die rustige atmosfeer van die buurt Voëlklip was perfek om die toevlug te skep waarheen hul studentekinders kon ontsnap terwyl die paartjie self nog in die buiteland gewoon het.

Carla was uit die staanspoor oortuig dat hulle dié effens afgeleefde huis moet koop toe sy dit op ’n eiendomswebblad raaksien, maar Charles glad nie. “Hy het twee máánde lank daaroor gedink – ’n leeftyd wanneer mens ’n aanbod moet maak,” onthou Carla.

“Uit die bloute een oggend sê Charles toe dis reg, ek moet die eiendomsagent bel.” Uiteindelik het die tydsberekening in hul guns getel, want weens ’n insinking in die eiendomsmark kon hulle die huis teen ’n winskoop kry. Dit was in 2013, toe die paartjie nog in Hamburg, Duitsland, gewoon het waar Charles as ingenieur gewerk het. Eers met sy aftrede in 2017, nadat hulle weer in Johannesburg en daarna ’n ruk in Houston, Texas, gewoon het, het hulle hier by die see kom nesskop.

In die eerste net meer as drie jaar nadat hulle gekoop het, het die huis onveranderd gebly, vertel Carla. “Dit was maar donker en benoud – veral onder, waar daar heelwat waterdigtings-probleme was. En die afwerkings was oudmodies.”

Ek het al letterlik op skrootwerwe rondgeklouter om goed te kry wat ek wou hê.
– Carla

Die Duckitts kuier heerlik op dié toegeboude stoep, ongeag die weer. Omdat die braaiplek deel is van die leefvertrek, het hulle besluit om ’n suigwaaier te laat inbou ter wille van vars lug. Eetkamertafel en bankies van Sevens

Sink en sement

Toe Carla eindelik die kans kry om haar eie stempel op die huis af te druk, het sy reeds ’n duidelike prentjie in haar kop gehad: ’n oopplan-leefruimte, sementvloere, eenvoudige, praktiese afwerkings en byderwetse sinkbekleding reg rondom die huis.

Nadat sy in die Maart 2016-uitgawe van Tuis die “sinkhuisie” gesien het wat Marcus Smit van Marcus Smit Jacobs Architects vir sy pa gebou het, was Carla vasbeslote dat hy moes help om haar idee van ’n “blikhuis” werklikheid te maak. Hulle het aanvanklik ’n ander argitek genader, maar dié verhouding was gou op die rotse. Oor die verhouding tussen haar en Marcus, sê Carla: “Dit was ’n match made in heaven. Ons het baie koppe gestamp, maar nou is ons groot vriende.”

Die opknapwerk het in Januarie 2017 begin, en in Mei 2018 was die prentjie voltooi. Een van die grootste veranderinge was om die balkon aan die oostekant op die boonste verdieping toe te bou en daarvan ’n braaistoep te maak. Die hele huis het nuwe sementvloere gekry en die kombuis en badkamers het nou trendy sementblaaie. “Die huis het nou ’n heerlike vloei,” sê Carla. “Daar is altyd ’n kol waar ’n mens kan sit en kuier, ongeag die wind en weer. En ons is dol oor die berg-uitsig van die boonste verdieping af.”

Terwyl die Duckitts in Hamburg gebly het, het Carla en twee vriendinne spesiaal na die distrik Boleslawietsj in Pole gery vir dié breekware. Met Kerstyd word die beeldjie ’n Duitse engel wanneer Carla haar vlerke aansit.

[Hier koop Carla graag]

Op Hermanus

• Over and Over

• Snuffels

• Romantiques

In Johannesburg

• Oudhedewinkels in Long Street, Albertville/ Newlands

• Orejen, Linden

'n Knus sitkamer digby die nuwe braaistoep en oopplankombuis verskaf gemaklike sitplek.

Dié kassie was ’n vonds by Orejen in Linden. Die kunswerke het Carla as kunsstudent in ruil vir haar erdewerk gekry.

Van ashoop tot skatkis

Carla het nog nooit dinge volgens die boek gedoen nie en haar dekorstyl weerspieël haar tong-in-die-kies-benadering tot die lewe. “Dis vir my lekker om mense te laat lag, en ek glo dekor kan ook speels wees,” vertel sy. Sy beskryf haar styl as eklekties en ingeleef. “Ek hou van die idee dat meubels ’n storie moet kan vertel.” En amper elke dekorstuk in haar huis hét sy staaltjie: Baie kan getuig van hul vorige lewe op ’n skrootwerf, of was ’n winskoop op Facebook Marketplace.

“My ma is baie lief vir oudhede en sy het die mooiste goed. Maar ek hou letterlik van junk! Ek geniet dit om artikels wat dalk nie tradisioneel ‘dekor’ is nie, op ’n kreatiewe manier in te span.” Die ou uitstalkas in die oopplan-kombuis is byvoorbeeld pakplek vir tafellinne en messegoed. Carla het dit jare gelede vir R250 gekoop toe ’n breiwinkel op Sasolburg toegemaak het; dit het net ’n nuwe blad gekry. Die spatpaneel agter die stoof is nog ’n skrootwerf-vonds wat Carla se prettige styl vasvang.

“ ’n Mens moet tuis voel in jou eie huis,” glo sy.

Carla wou baie graag ’n rooi stoof hê en het dié Elba-stoof by Kloppers in Bloemfontein raakgeloop.

Sinkhouers van Koöperasie Stories

Die spens word netjies toegemaak met die huis se oorspronklike agterdeur wat die Duckitts nuwe nut gegee het. Ou steierplanke is as rakke ingespan.

Die ou skaal kom ook van ’n ashoop en staan op ’n kas met ’n marmerblad wat Carla as “vuurmaakhout” by die ou Carlton Hotel in Johannesburg gekry het.

Die plafon in die hoofslaapkamer en suite het ’n interessante tekstuur danksy die houtbekisting wat tydens die bouwerk gebruik is. Carla het so baie van die voorkoms gehou dat sy besluit het om dit net so te los. Die deken was haar ouma se handewerk.

Carla is dol oor die voorkoms van sementoppervlakke, daarom het die ingeboude bad dieselfde afwerking as die res van die badkamer. Die spieël bo die wasbak was deel van ’n ou spieëltafel. Handdoeke van Barrydale Hand Weavers

’n Ou veermatras se raamwerk hang bo die bed in die gastekamer. Muurbehangsel van Koöperasie Stories; bedkassie van Ikea

Tydens die opknap het die Duckitts besluit om die vyfde slaapkamer in ’n ateljee te omskep waar Carla weer pottebakkery kan beoefen en deesdae ook lesse daarin aanbied vir ’n klein groep studente. Teëls van Veelvlak Signature Surfaces

VERSKAFFERS

Barrydale Hand Weavers 028 572 1488

Kloppers 051 400 5500

Koöperasie Stories 076 303 9336

Marcus Smit Jacobs Architects 021 852 1362

Orejen 083 303 3063

Over and Over 028 312 3307

Romantiques 028 312 4226

Sevens 010 040 7828

Snuffels 028 312 1802

Veelvlak Signature Surfaces 028 316 3296

Walker Bay Recycling 028 312 2035