Foto's Greg Cox

Dubbeldoor  

Die kunstenaar Olivia Botha van Swellendam en haar man, Karel, skrik nie vir verandering óf vir kleur nie. Dié twee kreatiewe selfdoeners ruil gereeld vertrekke en skuif meubels rond om hul dekor vars te hou. 

Hul seuns, Le Mar (4) en Tre Monne (2), is beste maats. Toe Olivia op ’n dag die beddens met hul huisie-kopstukke (Karel se handewerk) na die kinders se TV-kamer skuif en boonop só plaas dat die twee oor en weer kan kruip, was die koeël deur die kerk: Hulle sou voortaan net hier slaap. 

Amper elke artikel in die kamer is handgemaak en vertel ’n storie – soos die fotoblokkies teen die muur, wat van hul kosbaarste herinneringe vasvang. “Ons het seker 20 000 foto’s van die kinders, en dit was moeilik om net ’n paar te kies!” verduidelik Olivia met ’n glimlag. 

[Detail wat tel]

Die kinders se bedkassies het elk net vier laaie, maar is met agt verskillend geverfde Supawood-panele versier voor die handvatsels aangebring is. Elke kind het ook sy eie leunstoel, oorgetrek in hul ma se eie Art de Olivia-lap. 

Tweedehandse staalkaste bied tans bêreplek vir alles van speelgoed en boeke tot skoene, maar dié veelsydige meubels was al in die badkamer, waskamer en kombuis, vertel Olivia. “Ons het hulle sommer met Rustoleum-spuitverf bygedam.” Sy glo die houtblindings op ’n skuifspoor voor die groot venster werk beter as gordyne. “Dit hou die kamer goed donker snags, maar laat bedags die maksimum lig in. Boonop hou die seuns van die plaasvoorkoms wat dit aan hul kamer gee.”