Vars idees: Slim planne met tekstuur

Foto’s Francois Oberholster en Johané Neilson Stilering Marian van Wyk

Op sy eentjie

Minder kan soms meer wees wanneer dit kom by teksture byvoeg en afwerkings kies. Langs dié lieflike ingang staan ’n enkele dekoratiewe teël pragtig uit teen die sagte terracotta agtergrond, asook die vintage-deur omraam met klompie-stene. Dié speelse element het ons beslis twee keer laat kyk!

Moenie teleurgesteld wees as jy net ’n paar teëls in jou gunsteling-ontwerp of selfs een met defekte kry nie. Gee sulke spesiale vondste die ereplek – iewers waar dit iemand gaan verras.

Puik skuif!

Tydens die opknap van hul huis in Vishoek, Kaapstad, het Kelly en Jonathan Croeser die kombuis in die hoofslaapkamer verander. Pleks van die kragboks en koopkragmeter te skuif, het hulle ’n pasgemaakte “skuif-kopstuk” gemaak van ’n eenvoudige reghoekige houtraam en ’n standaard-skuifdeurmeganisme. Kelly het die hout met verdunde roomkleurige akrielverf geverf en toe lap daaraan vasgekram. Wanneer hulle by die boks moet uitkom, skuif hulle eenvoudig die oorgroot kopstuk na regs, maar andersins skep dit ’n pragtige fokuspunt agter die vintage-houtbed.

Wasbak van herwinde dwarslêers ontwerp deur Andre Otto van Green Cube Design; stortgordyn van H&M Home; ronde spieël met houtraam van Coricraft; grys en wit metroteëls van Tile House; ronde mosaïekteëls van Douglas Jones 

Op ’n streep

Die binneontwerper Nikki Zigras van Studio do Cabo het dié badkamer ’n funky styl gegee – én dit boonop ruimer laat voel – deur by ’n neutrale palet te hou en horisontale lyne in die metroteëls en stortgordyn in te span. “Ek wou ’n besonderse ontwerp hê en dié klein badkamer breër laat lyk, daarom het ek grys en wit teëls in horisontale bane laat lê,” sê sy.

Nikki het elke sentimeter in dié knap ruimte benut deur ’n wasbak op ’n houtblad onder die venster te plaas en ’n groot ronde spieël oorkant die stort te hang. Vir dié wat wil nader kyk wanneer hulle tande borsel of skeer, het sy ’n uittrekbare spieël teen die muur gemonteer.