Vars idees vir bêre en uitstal

Foto’s Francois Oberholster  

Kaskenades

Die treffende laaikas in Janine O’Grady se huis in die Paarl is nie net praktiese bêreplek vir serpe, belde, handsakke en tydskrifte nie, maar saam met die rakke en kunswerke omskep dit die gang as’t ware in ’n galery.

“Ek hou eintlik niks van gange nie,” vertel Janine. “As kind het ons ’n lang gang gehad waar my broer ons altyd iewers agter ’n meubelstuk ingewag en skrikgemaak het. “Gelukkig is dié gang kort en breed, wat die ruimte soveel meer nut gee.”

Die kas het voorheen in ’n motorwerktuigkundige se werkswinkel gestaan.

“Die laaie was swart van die olie,” onthou Janine, eienaar van Makietie Linne. “Ek het hulle afgeskuur, die pote geverf en die houtblad vervang met glas, en siedaar!” Sy het die rakkies teen die muur gekies omdat sy minder gate in die muur wou boor pleks van een vir elke kunswerk en foto. “Nou kan ek gereeld skuif en byvoeg soos ek lus kry.”

Wys jou staal

Vince en Ronelle Muir, eienaars van Holly Wood Kitchens & Furniture, het in die grendeltyd met agt mense in die huis skielik ’n ekstra tuiskantoor in hul oopplanleefruimte nodig gehad.

Hul dekor het ’n Skandinawiese gevoel met wit mure en eenvoudige meubels – ’n donker, beknopte werkspasie sou beslis nie deug nie! Dié veeldoelige boekrak (een van Vince se eie ontwerpe) uit sagte staal met rakke van berke-laaghout wat maklik kan skuif, kon vinnig in ’n lessenaar omskep word.

“Die rak vorm die perfekte werkblad en lyk altyd mooi, selfs met jou skootrekenaar daarop. Ek is lief vir plante en het prente en ornamente bygevoeg vir ’n tikkie huislikheid,” sê Ronelle.

“Dis ’n heerlike stilword-plekkie wat my altyd goed laat voel omdat dit so lig en helder is.”

Lessenaar en rak van Pedersen + Lennard l Stilering Nelia Andrag

Gebou om te hou

Armin Wessels is ’n aktiewe tiener met ’n vol program, daarom is sy kamer minimalisties ingerig met net die nodige lessenaar en ’n smal boekrak vir snuisterye. “Ons het in tydlose stukke met persoonlikheid belê,” vertel sy ma, Lochie. Die kamer is ’n toevlugsoord sonder ’n rekenaar of ander tegnologie, en ’n ruimte waar hy net kan ontspan ná sy bedrywige dag.

Droomland toe

Die uitstalrak met plante bo Maryke en Clifford Roberts se bed in hul huis in die Strand span as’t ware ’n groen kroon bo hul bed. “Dis die perfekte oplossing om plante in ons kamer te bring sonder dat dit te veel plek in beslag neem,” vertel Maryke. Haar pa het die hake en rakkie gemaak, asook die houtvoëltjie. “Ek het hom vertel van so ’n voëltjie wat ek in Brasilië gesien het, toe maak hy dit vir my.” Die beeldhouwerk is deur Evette Weyers.

Besonderse bedliggies bo die kopstuk is ’n slim atmosfeerskepper wat ook meer plek op die bedkassies laat. “Ons het die bedliggies van Bed, Bath & Beyond in Amerika aanlyn gekoop. Dis ideaal vir lees, want dit gooi lig op jou boek; boonop pas dit by die bed se styl.”