Vraag: Waar het die Parkhursts daardie lieflike Persiese mat op die voorblad van Augustus 2020 se uitgawe gekoop? – Martie du Toit via Facebook

Antwoord: Hulle het dié mat by vriende gekry, wat dit ook tweedehands gekoop het. Volgens die eienaar kan jy inloer by Odds & Ends, waar hulle heelwat ander mooigoed gekoop het. Of kyk by Rugs Original vir iets soortgelyks.

Vraag: Het julle enige inligting oor die kunswerk op bladsy 18 van jul Mei 2020-uitgawe? – Sandy Linley, Oos-Londen

Antwoord: Die kunstenaar is Alex Vosloo en hy word verteenwoordig deur Jandre Pieters van die galery Art It Is.

Vraag: Watter vloerbedekking is in die eetkamer op bladsy 40 van Tuis, Oktober 2018, gebruik? Dis asemrowend mooi. – Cherie van Dyk, Oos-Londen

Antwoord: Dit is ’n afgevlakte vloer deur Screedworx, wat vloere in ’n groot verskeidenheid kleure installeer. Volgens die huiseienaar, Trish Wiese, is die kleur iets tussen grys en bruin.

Vraag: Waar het Antoinette Stockley die pragtige leunstoele op bladsy 35 van jul Junie 2020-uitgawe gekoop? – Karlien van Staden, Johannesburg

Antwoord: Die stoele is van Incanda Furniture.

Vraag: Hoe het die regrukspan die vloer op bladsy 83 van jul Augustus 2019-uitgawe gelê? – Danie Kriel, Pretoria

Antwoord: Hulle het eers die ou teëls in die kombuis en oopplan-leefvertrek verwyder en toe ’n nuwe afvlaklaag gegiet. Dis ’n eenvoudige sementmengsel wat oor ’n betonblad (die basis wat jy gewoonlik onder vloerbedekkings soos teëls, volvloermatte of viniel- en gelamineerde vloere kry) aangewend kan word. Toe die afvlaklaag goed droog was, het hulle dit geseël met Woodoc 45 Teël en Sement (woodoc.com).

Vraag: Het julle dalk die naam van die Ikat-materiaal waarmee die strooikussings in die sitkamer op bladsy 31 van Augustus 2020 se Tuis oorgetrek is? – Claudia Williams, Plumstead

Antwoord: Die huiseienaar het die materiaal ’n paar jaar gelede op ’n uitverkoping by Sullies gekoop. Ons het al soortgelyke ontwerpe by Home Fabrics gesien.