Vraag: Waar het Mariëtte en Pieter Bouwer die koperborde en -skinkborde teen hul stoepmuur op bladsy 13 van die Julie 2020- uitgawe gekry? En hoe is dit vasgesit? – Els Jacobs, Johannesburg

Antwoord: Hulle het die borde oor jare by antiekwinkels en vlooimarkte gekoop; ander het hulle geërf. Mariëtte plak metaalhake aan die agterkant van die borde en hang dit dan aan spykers in die muur

Vraag: Wie het daardie lieflike badkamerkas in die Frasco’s se huis op bladsy 72 van jul Mei 2020-uitgawe gemaak? – Liza du Plessis, Somerset-Wes

Antwoord: Die eienaars het dit self ontwerp en laat maak by Dynamic Furniture Contracts in Soutrivier, Kaapstad.

Vraag: Ek is mal oor die engeltjie-en-rose-lap in Galashiels Lodge op bladsy 16 en 17 van September 2020 se Tuis. Watter soort materiaal is dit? – Yvette East, Kaapstad

Antwoord: Dit is linne wat die eienaar, Rosalind Nale, ’n paar jaar gelede by Amulet in Hermanus gekoop het.

Vraag: Die tong-en-groef-houtbekleding in die plaasstyl-badkamer op bladsy 24 van jul Februarie 2012-uitgawe is vir my so mooi. Waar kan ek so iets kry, en word dit vooraf gesaag? – Erika Honiball, Vanderbijlpark

Antwoord: Die meeste houtverskaffers en ysterwarewinkels verkoop ’n verskeidenheid tong-en-groefplanke. Gaan na ’n winkel wat ’n saagdiens aanbied sodat hulle dit volgens jou mate kan saag; probeer BUCO, Builders of Leroy Merlin.

Op die stoep

Elize Perrin van Victoria-Wes skryf Die stoep van ons Karoo-plaashuis uit 1850 gee my hoofbrekens: Die vloer dop gedurig af. Ek het dit nou al op verskeie maniere probeer regmaak, maar sonder sukses. Hoe kan ek die probleem eens en vir altyd oplos, en onderhoud beperk?

Joanne Sykes van Cemcrete antwoord Jou eerste stap is om die verf te stroop. Vog het waarskynlik jou stoep binnegedring en dit keer dat enige verf daar sal hou. Volg dié stappe nadat jy die verf verwyder en minstens 3mm van die betonbasis weggeskuur het:

1 Maak die betonblad klam en wend Cemcrete Permastop, ’n vogdigte membraan, aan. Wag 20 minute.

2 Bedek dit dan met genoeg afvlakmengsel om 20 mm dik te lê; kompakteer die laag met ’n afvlakstamper.

3 Verf Permastop-vlodder aan en lê CemForce-lap in die vlodder; sorg dat die lap met 50 mm oorvleuel. Deurweek die CemForce dan met nog ’n dik laag Permastop-vlodder.

4 Lê nog ’n 20 mm-afvlaklaag (gebruik Cemcrete Water Repellent Cement in die mengsel) en kompakteer dit.

5 Wend Cemcrete Colour Hardener oor die klam afvlaklaag aan. Gee drie dae kans om te verhard en benat dit in dié tyd gereeld met ’n fyn watersproei.

6 Wag tot die afvlaklaag heeltemal hard en droog is; seël dit dan met Cemcrete Colour Hardener Sealer.

KONTAK cemcrete.co.za