Ons kombuishelde!

In Julie 2020 het ons ons derde Kitchen Heroes-kompetisie in samewerking met Milestone Kitchens aangebied, waartydens een leser ’n nuwe kombuis ter waarde van R50 000 kon wen. Die gelukkige wenners is Adri en Vincent Boulle van Memel in die Vrystaat. Hul gunsteling-item? Die mini-eiland op wiele.

Die probleem

Adri en Vincent se oudmodiese kombuis het gesmeek om vernuwing en hulle wou graag die uitleg in ’n moderne, oop plan verander. Die ou kaste was gedaan, maar die paartjie se begroting het hulle nie toegelaat om alles op een slag te vervang nie. “Ons wil graag ’n kombuis hê waar ons vriende en familie kan saamkuier terwyl ons kosmaak,” vertel Adri.

Die oplossing

Jou droomkombuis hoef nie eensklaps te gebeur nie, sê Sabrina Miles, besturende direkteur van Milestone Kitchens. “Met losstaande kaste kan jy die ruimte stuk-stuk vernuwe namate jou begroting dit toelaat.

Milestone-eenhede is beskikbaar in drie style: African Allure, French Flair en Swedish Style. Ons het ’n plan opgetrek met Swedish Style-kaste wat sal verseker dat die hart van die Boulles se huis prakties én mooi is in elke stadium van hul vernuwing.”

1 VLOEI

Daar is tans ’n muur wat die kombuis van die spens skei. Indien hulle dié muur afbreek, sal die kombuisruimte aansienlik oper voel. Hulle kan steeds onooglike toestelle soos die skottelgoedwasser, wasmasjien en yskas in ’n aparte “yskasvertrek” wegsteek.

Aangesien dit nie tans moontlik is om enige breekwerk te doen nie, het ons die paartjie se gunsteling-item, die mini-eiland op wiele, voor dié muur geplaas.

Waar daar ’n muur tussen ’n kombuis en ’n ander vertrek uitgebreek word, kan ’n kombuiseiland die twee ruimtes perfek bymekaarbring. Wanneer die Boulles later wel die geleentheid kry om hul muur te verwyder, kan hulle die mini-eiland 90° draai en na die middel van die vertrek skuif; dit sal goeie vloei tussen die twee dele bewerkstellig. Eilande kan natuurlik ook as verdeler tussen twee ruimtes in dieselfde vertrek, byvoorbeeld ’n oopplankombuis-en-sitkamer, ingespan word.

2 FUNKSIE

Dis ’n goeie plan om ’n koffiekas naby die mini-eiland te plaas, dan is alles wat nodig is vir ’n koppie koffie saam met vriende gerieflik bymekaar.

3 HOOGTE

Hoë kaste soos die losstaande Deluxe-kruidenierskas benut vertikale ruimte baie goed. Twee of drie van hierdie kaste, wat ideaal is vir jou spensvoorraad, voeg hoogte by die kombuis en skep die illusie van meer ruimte. ’n Opknap kan alles tegelyk of een deel op ’n slag geskied. Adri en Vincent kan eers op die kombuis fokus, en daarna op die opwasdeel en uitbreek van die muur.

1 Speseryrak

2 Tweedeur-kombuisgereedskapkas

3 Potlaaie

4 Oondkas met plek vir mikrogolfoond

Gereed vir regruk!

Vincent en Adri in hul kombuis.

5 Vierlaaikas

6 Hoekkas

7 Resepteboekrak

8 Koffiekas

9 Mini-eiland op wiele

10 Swartbord

11 Kombuisstoel in Ash

KONTAK milestonekitchens.co.za