Jane Meneses van Edgemead skryf Hierdié lieflike ou Royal Doulton-vase met Charles Dickens-karakters is al jare lank in my familie. Het dit enige waarde?

Kayleen Wrigley van Walker Scott Art Advisory antwoord Die Doulton-fabriek is in 1815 in Lambeth, Suid-Londen, gestig deur John Doulton (1793–1873), wat voorheen by Fulham Pottery gewerk het. Sy eerste produksielyne het bestaan uit praktiese en dekoratiewe erdeware, van bottels tot rioolpype, als gemaak in sy klein fabriek. 

In 1835 het John se seun Henry (1820–1897) by die besigheid aangesluit en toesig gehou oor die vervaardiging van erdeware-produkte, wat nou uitgebrei het tot laboratorium-artikels, sanitêre ware en dreineringspype, wat wêreldwyd verkoop is. In die middel-1850’s het John Doulton begin eksperimenteer met die meer dekoratiewe pottebakkersware waarvoor die firma later bekend sou word. 

Doulton het in 1901 die koninklike bevelskrif by koning Edward VII gekry. Die gedagte van Doulton Series Ware het by Charles Noke, die versierder, ontwerper en artistieke direkteur van Royal Doulton, ontstaan. Dié reeksware het alledaagse breekware ingesluit en is versier met karakters uit legendes, musiek, die letterkunde en geskiedenis. Die Dickens-reeks, wat karakters uit Dickens-romans uitbeeld, het een van Royal Doulton se gewildstes geword.

Dickens-ware is tussen 1922 en 1983 vervaardig. In die 60 jaar van produksie was daar ’n groot verskeidenheid style, tegnieke en produksie-metodes, asook verskillende rugstempels, wat versamelaars al dekades lank boei. Die rugstempel op jou vase dateer uit die tydperk 1931–1951.

OUDERDOM 1931–1951

WAARDE Tussen R1 000 en R1 500 stuk op ’n veiling

KONTAK walkerscott.co.za