Familiesaak

Linda Pietersen van Kaapstad skryf Ek wil graag meer weet oor dié beker, en ook of dit iets werd is. Kan julle help?

Ainsley Taylor van Stephan Welz & Co. antwoord Moorcroft-pottebakkersware is al sedert 1897 wêreldwyd in aanvraag. Dit was die jaar waarin William Moorcroft, die ontwerper van kunstige pottebakkersware by die Britse firma Macintyre’s, se eerste artikels vir toonaangewende winkels soos Harrods, Liberty of London en Tiffany’s in New York vervaardig is.

Nadat Moorcroft in 1904 ’n goue medalje by die St Louis Exhibition gewen het vir sy “Florian Ware” in die Art Nouveau-styl, het verkope van sy ware aansienlik toegeneem. In 1913 stig hy sy eie firma met die ondersteuning van Liberty. Dié maatskappy se reputasie het selfs meer aansien gekry toe hy in 1928 as die firma se “pottebakker vir HM die Koningin” aangestel is.

Een kenmerk van Moorcroft-ware – buiten die ryk kleure en aantreklike ontwerpe – is dat elke item geheel en al met die hand versier is deur middel van “tubelining” – ’n hoogs gespesialiseerde en arbeidsintensiewe tegniek wat die patroon met vloeibare klei op die ongebakte item omlyn, waarna lae kleur aangeverf is voordat dit in die oond gebak is. Moorcroft het ook elke stuk met sy handtekening of voorletters gemerk.

Ná William se dood in 1945 het sy seun Walter as enigste ontwerper sy pa se tradisie voortgesit, maar ook nuwe eksotiese blompatrone ontwerp. Dié hibiskus-vaas is ’n voorbeeld van sy werk uit die sestigerjare. Walter het ook elke artikel gemerk met ’n handtekening wat amper identies aan sy pa s’n is – iets wat hedendaagse versamelaars kan verwar. Al haal William Moorcroft se pottebakkersware hoër pryse, kan dié Walter Moorcroft-vaas ook gesog wees.

OUDERDOM 1960’s

WAARDE Tussen R3 000 en R5 000 (met die veronderstelling dit is sowat 30 cm hoog)

KONTAK swelco.co.za