Verf maar weer

Madeleine Woodward van Woodstock, Kaapstad skryf My man was ’n bietjie oorhaastig en het ons badkamerteëls geverf sonder om ’n onderlaag aan te wend, en nou dop dit plek-plek af. Moet ons die ou verf verwyder en oorverf, of kan ’n mens onderlaag en verf bo-oor die ou verf aanwend?

Nonkululeko Mcunu, bemarkingsbestuurder by Dulux, antwoord Jy sal die ou verf moet afhaal voor jy weer verf, want die toestand van die teëls bepaal hoe krapbestand die nuwe verflaag gaan wees, asook hoe goed dit sal kleef. Indien jy ’n verf met ’n oplosmiddel-basis gebruik het, sal verfstroper goed werk. As dit ’n waterbasis het, kan jy Dulux Sugar Soap Powder met warm kraanwater meng en die teëls met ’n skuurspons skrop. Werk dit nie, moet jy die teëls afskuur.

Nadat al die verf afgeskuur is, was jy die teëls met Dulux Brush Cleaner Degreaser of ’n wateroplosbare huishoudelike vetverwyderaar. Spoel daarna deeglik af met water. Enige los voegbry moet ook vervang word voor jy kan begin verf; dit moet agt uur staan om droog te word.

Wend nou twee lae Dulux Supergrip aan; elke laag het 12 uur droogtyd nodig. Rond dan af met twee lae Dulux Water-Based Pearlglo en wag vier uur tussen lae. Beperk stoom, nattigheid en die gebruik van skoonmaakmiddels tot ’n minimum gedurende die eerste sewe dae daarna.

• Let wel: Dié proses is nie geskik vir vloerteëls nie.

KONTAK dulux.co.za

Die Tuis-medewerker Shelly Bergh antwoord Ek stel voor jy verwyder die ou verf met verfstroper en maak dan die teëls met suikerseep skoon. Wend ’n onderlaag aan – Plascon se Tile & Melamine Primer werk baie goed. Daarna kan jy twee lae waterbasis-emaljeverf in die kleur van jou keuse aanwend.

KONTAK shellybergh@gmail.com