Wondersoete slaap

Jana van der Merwe van Bellville skryf Noudat werk van die huis af die “nuwe normaal” is, moet ek weer my slaapkamer opeis as ’n werkvrye sone ná ure. Hoe skep ek ’n volkome ontspanne ruimte wat ’n goeie nagrus sal verseker? 

Greg Smart, uitvoerende hoof van Vencasa, antwoord As jy jou slaapkamer ook as werkplek gebruik, moet jy dit saans weer in ’n plek van rus omskep. Hier is ’n paar wenke:

Verminder skerp lig (elektries sowel as LUD) Dit is raadsaam om die hele nag in diep donkerte deur te bring. Verdof die ligte en verban toestelle snags uit jou kamer. Spandeer minder tyd voor ’n skerm of laai ’n app af wat die skadelike blou lig op jou selfoon, tablet of skoot-rekenaar “filtreer”. Apps soos Night Shift, Twilight, Darker, Night Owl en Blue Light Filter sal die skerpte van jou skerm versag; party toestelle word verkoop met so ’n app klaar geïnstalleer.

Temperatuur Die hormoon melatonien is belangrik vir ’n goeie nagrus. Spat water oor jou gesig – dit stuur ’n boodskap aan jou liggaam om melatonien vry te stel en terwyl dit van jou vel verdamp, koel dit ook jou liggaamskern af. Die aanbevole temperatuur vir ’n slaapkamer is sowat 18°C. Neem andersins ’n warm bad voor jy in die bed klim. Dit sal jou help ontspan, en die daling in jou liggaamstemperatuur ná die bad kan jou lomerig maak.

Ontwerp die optimale slaap-ekostelsel vir jou Dit behels die korrekte keuse van die volgende elemente: ’n matras, kussing, bedbasis en bedraam, beddegoed, beligting en temperatuur. Vencasa beveel ’n verstelbare bedbasis aan. Daar is reeds bewys dat dit voordele inhou om jou skouers en voete te lig terwyl jy rus. Indien jy jou bed met die druk van ’n knoppie kan verstel, is dit maklik om die perfekte slaapposisie te vind wat enige stremming op jou liggaam, asook druk op jou hart, sal verlig en sirkulasie sal verbeter.

KONTAK vencasa.co.za

Daar’s water

Darelle McArthur van Nuweland, Kaapstad, skryf Ek is besig om my stort oor te teël en wil die bestaande stortbasis gebruik. Hoe kan ek seker maak dat die stort nooit weer lek nie? 

Celeste Margo le Roux van React24 antwoord Ongelukkig is daar geen waarborg dat jou stort nie weer sal lek nie, maar voorkoming is altyd beter as genesing. Die volgende maatreëls sal potensiële waterlekke en -indringing in jou stort beperk:

1 Stortmure moet waterdig gemaak word voordat jy dit teël. Voeg ’n waterdigtingsagens of -katalisator by die sementmengsel waarmee die stortmure gepleister word. Sodra die mure droog is, kan jy nog ’n vloeibare waterdigtingslaag aanwend. Daar is verskeie produkte beskikbaar; probeer Coprox of Sika.

2 Teëlwerk Wanneer die muur- en vloerteëls gelê word, moet daar ’n waterdigtingsagens of -katalisator by die teëlgom gevoeg word; maak ook seker dat die teëls behoorlik bind. Voeg ’n waterdigtingsagens, byvoorbeeld ’n bindvloeistof (probeer Alcolin Permabond), by die voegbrymengsel voordat jy dit begin aanwend.

3 Stortbasis of -vloer Sorg dat die stortvloer korrek voorberei word: Plaas ’n waterdigtingslaag of soortgelyke isoleringsmembraan op die rou substraat van die stortvloer. Wanneer die boonste betonlaag op die stortvloer gegiet word, moet die hele oppervlakte waterdig gemaak word. Die vloer moet boonop ’n gepaste helling oor ’n afstand van minstens 300mm na die uitlaatpunt hê. Sodra die stortvloer droog is, is dit raadsaam om nog ’n laag bindingsmiddel aan te wend. Vermy ’n PVC-stortbak, aangesien dit geneig is om probleme te skep indien dit nie perfek geïnstalleer is nie.

KONTAK react24.co.za

Foutiewe teëlvloer

Sina Mhinga van Giyani, Limpopo, skryf Hoe kan ek voegbrylyne opknap sodat dit glad en gelyk met my porseleinvloerteëls is? Die teëls is swak gelê en my begroting laat my nie toe om dit te vervang nie. Ek wil graag ’n naatlose afwerking oor die hele vloer hê.

Nicole Russel van Italtile antwoord Nuwe voegbry sal nie noodwendig die oppervlak gelyk maak nie. Dit mag dalk die algehele voorkoms verbeter, maar indien die teëls nie korrek gelê is nie, kan daar steeds rande of hoeke wees wat effens uitstaan. Volg hierdie stappe indien jy wel die voegbry vervang:

1 Verwyder die boonste 3–4 mm van die voegbry; gebruik ’n bry-skraper vir die doel en nie ’n slypmasjien nie. 

2 Maak dan die voeë tussen die teëls deeglik skoon.

3 Meng die voegbry tot baie glad voordat dit oor die hele geteëlde oppervlak aangewend word. Maak seker die teëllêer volg die aanwysings op die verpakking of op ons webblad. Indien jy ’n perfek naatlose afwerking verlang, is die beste uitweg ongelukkig dat jy al die teëls opkap en ’n gekwalifiseerde teëllêer aanstel om die hele vloer oor te teël. 

KONTAK italtile.co.za