Dekordilemma

DIE PROBLEEM

Coba Kellerman van Durbanville skryf Ons hoofslaapkamer is alles behalwe die knus vertrek van my en my man se drome, maar aangesien ons die huis huur, kan ons nie alles verander nie. Ons oorweeg om dit te verfris met krytverf (die eienaar het ingestem). Ons albei hou van grys en olyf skakerings; nie te donker nie, want die vertrek kry nie baie natuurlike lig nie. Ons wil ook liefs pastelle vermy. Help asseblief!

DIE OPLOSSING

Jani Augustyn-Goussard van Paint & Décor antwoord Jy en jou man is in die eerste plek gelukkig dat julle van dieselfde kleurskema hou! Daar’s baie maniere waarop julle olyfkleure in die kamer kan gebruik sonder dat dit die vertrek donker gaan maak. Kom ons kyk na ’n paar:

MURE EN BYKOMSTIGHEDE Begin deur die mure in ’n sagte grys-groen soos Leah’s Green van Paint & Décor te verf. Kies dan ’n donkerder skakering as aksentkleur vir die vloer- en plafonlyste – iets soos Paint & Décor Wild Rosemary of Jonkershoek sal mooi daarby pas. Jy kan ook met ’n rustige grys palet as neutrale basis eksperimenteer; probeer Paint & Décor White Pepper en Raw Cement en voeg dan spatsels van jou gunsteling-groen by in die vorm van jou dekorbykomstighede. Plakpapier is natuurlik nog ’n maklike opsie vir kleur, en moenie van los kussings en bedlampies vergeet nie!

MEUBELS EN GORDYNE Jy kan die mure lig hou en groen as aksentkleur in jou meubels gebruik, byvoorbeeld vir die bedkassies of kopstuk. Krytverf is ideaal vir meubelstukke soos hierdie, en Annie Sloan Chalk Paint in die kleur Olive sal perfek vir die doel wees. Oorweeg dalk ’n stensil in wit of dieselfde sagte groen wat jy op jou mure gebruik het, indien jy die geverfde oppervlakke trefkrag wil gee met tekstuur. Jy kan selfs goedkoop gordyne in wit of ’n linnekleur koop en ’n Franse streep of twee aan die onderkant aanbring met krytverf! Ek sou iets soos Annie Sloan Chateau Grey voorstel. Verdun dit eenvoudig met water (sowat 1 deel water tot 5 dele verf) en verf dit direk op die materiaal. Laat die verf heeltemal droog word en stryk dan die gordyn aan die agterkant sodat die verf in die lap intrek – die hitte werk soos ’n verseëlaar, wat beteken jy kan die gordyne later sonder moeite was.

KASTE Indien die huiseienaar instem dat jy die kaste ook vernuwe, doen dit met ’n leksel verf. Annie Sloan Versailles en Chateau Grey is lieflike opsies om daardie olyfskakerings mee in te bring. Moet ook nie huiwer om pastelkleure te gebruik nie, mits jy skakerings kies wat ’n tikkie grys daarin het. Sulke kleure lyk altyd gesofistikeerd.

KONTAK paintdecordiy.com

Jani se voorstelle vir die kleurskema:

A Paint & Décor Jonkershoek

B Paint & Décor Leah’s Green

C Paint & Décor Wild Rosemary

D Plakpapier van SophiaHelen

E Mandjie en sy-loof van Paint & Décor

F Annie Sloan Paris Grey

A Paint & Décor Kooigoed

B Annie Sloan Chateau Grey

C Paint & Décor Kogelberg

D Paint & Décor Old Stone

A Paint & Décor White Pepper

B Paint & Décor Raw Cement

C Lampkap en strooikussings van SophiaHelen

D Annie Sloan Olive

Voeg nou daarby:  

A Mariana Romance-plakpapier (R600/m), SophiaHelen

B Utility Classic Antique-lamp in koper (52 cm) R899, @home

C Water Hyacinth-mandjie met seegrasdetail (33 x 37 cm) R599, @home

D Fotakis Royal Nomadic-dieppoolmat in Jungle Green (200 x 300 cm) R2499, Superbalist

E Fray Edge-strooikussing in die kleur Sage (50 x 50 cm) R179,99, Mr Price Home

KYK SAAM!
Tuis is die mediavennoot van Pak weg, pak reg op VIA (DStv-kanaal 147). Kyk seisoen 2 van dié reeks met inspirerende regrukprojekte Dinsdae om 16:30; herhalings wys Sondae om 10:30. Volg ons op Facebook vir nog ontrommel-raad deur die kenners Carin Smith en Jani Augustyn-Goussard.

’n Vloer van bakstene

Matty Strydom van Vanwyksdorp skryf Ons is besig om ’n plaasstyl-huis in die Klein-Karoo te bou en wil graag bakstene of klompies vir die vloere gebruik omdat dit min onderhoud verg. Wat beveel julle aan, en hoe moet ’n mens dit verseël? Word die stene op ’n sementvloer gelê of op sand, soos plaveistene? En is dit ’n goedkoper alternatief vir byvoorbeeld teëls?

Melanie van Staden, verkoopskonsultant by Revelstone, antwoord Aangesien julle van nuuts af bou, sal julle ’n betonvloer moet giet, net soos vir ’n teëlvloer. ’n Afvlaklaag bo-op is nie nodig nie. Jy kan klompiestene in enige vertrek gebruik, maar hou hul hoogte in gedagte – die steentjies is 30–35 mm dik, terwyl ander teëls veel dunner is.

Klompie-“teëls” word binnenshuis gelê met ’n teëlgom wat binne ses uur droog word. Die gom moet verkieslik oor die vloer aangewend en soos botter aan die stene se onderkant gesmeer word. Ons beveel aan jy lê die stene met ’n spasie van 8–10mm tussenin, en met die voeglyne 1 of 2mm laer as die stene. Indien jy klompies in die huis gebruik, verseël dit met ’n waterbasis-verseëlaar wat skoonmaak vergemaklik – iets soos Nanoproof se onsigbare akrielseëlaar wat ’n fluweelagtige afwerking gee.

Klompies is nie altyd jou goedkoopste opsie nie, maar dis ’n gehalteproduk van sement, klip, water, kleuroksied en ’n chemiese bymiddel wat water uithou. Revelstone se klompie-reeks (vanaf R414/m²) kom in verskillende kleure en twee groottes, waarvan die dikker een (75 mm) geskik is vir buitegebruik. Dis maklik om skoon te hou en heeltemal glyvas – jy kan dit selfs in jou stort gebruik.

KONTAK revelstone.co.za

Ken jou beddegoed

Leana Smit van Pretoria skryf Ek wil nuwe beddegoed koop maar voel oorweldig deur die groot verskeidenheid en al die terme. Wat is die verskil tussen 100% katoen, polikatoen en katoen-perkal? En waarvoor moet ek uitkyk as dit by draadtelling kom?

Belinda Franklin van Room Service antwoord Jy’s reg, daar is deesdae soveel opsies beskikbaar, maar inkopies vir nuwe beddegoed behoort altyd ’n lekker ervaring te wees. Hou die volgende in gedagte wanneer jy moet besluit wat die beste nagrus vir jou sal verseker:

• Die samestelling (“composition”) verwys na die draad waarvan dit geweef is. Polikatoen is ’n kombinasie van poliëster- en katoendraad (gewoonlik 50% elk). Die mengsel verminder jou strykwerk omdat die poliëster-inhoud dit minder laat kreukel as suiwer katoen. Polikatoen is duursaam en bekostigbaar. Suiwer katoen word van 100%-katoendraad geweef. Dit is volkome natuurlik en hipo-allergenies (veroorsaak nie allergiese reaksies nie). Dit absorbeer ook enige vog wat jou vel afskei, wat dan verdamp sodat jou liggaam natuurlik kan asemhaal.

Struktuur (“construction”) verwys na hoe die linne geweef is. Die algemeenste patroon is ’n effebinding met ’n 1-oor-1-struktuur wat ’n sterk, duursame materiaal vorm – soos perkal. ’n Satynbinding het ’n 4-oor-1-struktuur, wat glans en sagtheid aan die lap gee.

Draadtelling (“thread count”) verwys na die aantal drade, horisontaal of vertikaal, per duim (2,5 cm) materiaal. Indien jy bekostigbare beddegoed vir alledaagse gebruik wil koop, kies ’n draadtelling van 144. Dit is polikatoen in ’n effebinding, en die meeste handelaars hou dit aan in ’n groot reeks kleure. Dié duursame beddegoed is puik vir kinderkamers.

Perkal het ’n hoër draadtelling, van 180 tot in die 1 000’e. Aangesien dit ’n effebinding en hoë draaddigtheid het, is dit uiters duursaam en voel dit sag, vars en koel – dis juis die eerste keuse vir hotelle. Vir ’n weelderige gevoel in jou eie kamer sou ek suiwer katoenperkal met ’n draadtelling van 200 aanbeveel. Maar as jy beslis nie wil stryk nie, is polikatoen altyd ’n opsie! 

KONTAK roomservicehomeware.co.za