Dekordilemma

Die probleem

Karien van den Berg van Potchefstroom skryf Ons huis uit die 1980’s het ’n ingangsportaal met ’n ekstrahoë plafon; die mure het heelwat tekstuur (grofgepleister, sowel as rou bakstene wat gesaksmeer is). Danksy hoë vensters is daar ’n oorvloed natuurlike lig wat my plante laat floreer. Daar is ook ’n ingeboude plantbak waarop ’n boekrak tans rus. Dis prakties, maar nie juis iets vir die oog nie. Die plante bo-op die rak staan hier omdat dit eintlik al plek is waar dit floreer.

Die natuurlike lig het hier ’n geel toon en die muurlig bo die boekrak verskaf die enigste kunsmatige lig. Tans weerspieël dié hoekie nie ons persoonlike styl nie. Hoe kan ek dit inrig in ’n moderne, praktiese ruimte met karakter?

Die oplossing

Shelly Bergh, ’n gereelde Tuis-medewerker, antwoord Dié hoekie kry wonderlike lig; ek stel voor jy benut dit so goed moontlik. Die geel lig kom van geel glas in party van die vensters; vervang dié panele eenvoudig met gewone glas.

Hier is nog ontwerp-idees:

1 KONSTRUKSIE

As julle nie die ingeboude plantbak gebruik nie, breek dit uit en sit die boekrak op die vloer. Die oppervlak is klein genoeg dat die vloer ook maklik vernuwe kan word met ’n sement-afvlaklaag of pragtige terrazzo-teëls.

2 VERF

Omdat dit ’n redelik lang, smal area is, stel ek voor dat julle al die mure en die plafon wit verf. Die afgewitte steenmuur sal baie mooi lyk in ’n sagte mentgroen skakering; dit sal steeds die tekstuur wys, maar nie so besig wees nie. Dis die eerste ding wat jy met die intrapslag sien en kan gerus in ’n fokuspunt omskep word. Die voordeur en muur daarrondom kan ook aandag trek met ’n leksel verf. Oorweeg die mentgroen hier op die onderste derde van die muur en verf die boonste deel ’n vuilpienk. Verf die voordeur en sy kosyn in dieselfde pienk en oorweeg dit om dieselfde kleur op die binnedeur wat uit die portaal lei, te herhaal. 

3 STILERING

Aangesien groenigheid hier floreer, hang gerus nog plante van die plafon en teen die mure. Vervang die muurlig met een in ’n meer kontemporêre ontwerp en hang ’n groot spieël in die middel van die mentgroen muur. Sorg dat die boeke in die boekrak netjies gepak is; ’n goeie idee is om jou boeke volgens die kleur op hul rugkante te rangskik. Voltooi die prentjie met ’n mat op die vloer.

KONTAK shellybergh.com

’n Lagie verf

Liezel-Joy Williams van Weltevredenpark in Roodepoort skryf Jenna en Eugene Theron het die dennehoutplafon en die kaggel in hul sitkamer (in die April 2020-uitgawe) so mooi geverf. Hoe moet dié oppervlakke voorberei word, en watter soort verf het hulle gebruik?

Jenna Theron antwoord Begin deur die verniste houtplafon liggies met fyn skuurpapier te skuur om dit skoon te kry en die onderlaag te help klou. Volg dan dié stappe:

Vir die plafon

1 Wend een laag meerdoelige onderlaag aan; ons het Rust-Oleum Zinsser Bulls Eye 1-2-3 Water-Base Primer gebruik.

2 Verf dan met twee lae gewone plafonverf; as jy ’n hoëglans-afwerking (soos dié van vloerlyste) verkies, gebruik ’n hoëglans- drupvrye emaljeverf. Dis wel baie duurder en meer arbeidsintensief.

Vir die kaggel

1 Berei ’n floddermengsel van bindvloeistof (probeer Alcolin Permobond) en sement (selfs teëlsement sal werk as jy net ’n bietjie nodig het) en wend dit met ’n koolborsel of ’n dik sagtehaarkwas aan. Indien jy ’n tekstuurryke afwerking verkies, maak ’n dikker (stewiger) flodder aan.

2 Gee dit sowat 24 uur kans om droog te word en wend dan ’n gewone pleisteronderlaag aan. Laat dit heeltemal droog word voor jy twee lae goeie muurverf aanwend (ons het ’n laeglans-muurverf vir buitegebruik gekies wat maklik is om skoon te maak).