Foto’s Francois Oberholster, Henrique Wilding en Karl Rogers Stilering Marian van Wyk

Die stoel is oorgetrek met Marimekko-lap wat Stefan van Finland af gebring het; die treffende patroon het ook ’n speelse karakter.

Blou om te onthou

Blou is die gewildste kleur in die wêreld. Dis ook een van Stefan Blom en Albie du Toit se gunstelingkleure, daarom was dit ’n voor die hand liggende keuse vir ’n gastekamer in hul huis in Groenpunt. “Blou kom oral in die natuur voor; dink net aan hoe blou die lug lyk wanneer jy op jou rug in die gras lê, of terwyl jy in koel blou water swem … Blou is bekend en vertroostend,” sê Stefan, ’n sielkundige. “Dit voel asof dié kamer jou omhels, en ons gaste is mal daaroor.” Stefan en Albie het blou oral in die kamer gebruik – die mure, vloer, kas, beddegoed én gordyne is alles blou. Vir ’n rustige atmosfeer het hulle drie verskillende skakerings herhaal, maar om seker te maak dit raak nie té eentonig nie, is die agterkant van die deur helderpienk. “Ons verf altyd die gastekamers se deure in ’n kontrasterende kleur vir ’n lekker verrassing,” sê Stefan.

Dié kamer is avontuurlik, speels en dapper – dis glad nie skaam nie! – Stefan

Dit werk, want…

Warm en knus Al word blou gewoonlik as ’n koel kleur beskou, verhoed die blom-lap, weelderige beddegoed en bykomstighede dat die kamer te “koud” voel. Titsels helder kleure soos rooi en oranje bring ook warmte in.

KUNSTIG Kunswerke wat oor die jare versamel is, gee trefkrag. Daar is groot geraamde foto’s, ’n skildery deur Jurgens Walt op hout, verskeie bordjies deur Mervyn Gers en Liesel Trautman, asook ander van plaaslike markte.

Beligting Die ongewone kandelaber is jare gelede in Parys gekoop – dit bly ’n tydlose wenner.

Binne na buite Dubbeldeure wat op die tuin oopmaak, dra by tot die rustige gevoel en bring die natuur binnetoe.  

’n Klein ronde tafel en spieël dien as spieëltafel – met al die natuurlike lig is dit die perfekte plek vir bruide om hul hare en grimering te doen. Staalkaste as bedkassies gee ’n moderne gevoel aan die plaashuis-styl. Foto’s geneem by Fransmanshuijs (082 477 0069)

Kontemporêre plaasstyl

Die plaaslewe bied heelwat geleenthede, soos afgeleefde geboue wat opgeknap kan word vir nuwe nut. Dis presies wat Izette Carinus op die plaas Fransmans-kraal buite Stellenbosch gedoen het toe sy een van die geboue omskep het in ’n gastekothuis, Fransmanshuijs, as uitbreiding van haar trousaak. Die ruim 33 m²-vertrek het ’n vars voorkoms gekry met nuwe vloerplanke en ’n dubbeldeur wat op ’n groot stoep oopmaak. Vir die dekor wou Izette die plaasstyl van die gebou behou, maar met ’n moderne geur. Daarvoor het sy ’n kombinasie van ou en nuwe meubels gebruik. “Ná die opknap was my begroting uitgeput, toe gebruik ek van my skoonma se meubels met net enkele nuwe kopies daarby,” sê Izette.

Dit werk, want…

Kies grys Houtskool bly ’n groot gunsteling vir fokusmure en sal enige ruimte ’n kontemporêre gevoel gee. Danksy tonne natuurlike lig laat die kleur nie die vertrek donker voel nie.

Fokusmuur Plakpapier hoef nie net agter die bed te wees nie; dit kan ’n duur storie raak as die muur baie groot is, soos die een in dié kamer. Izette het daarom ’n kleiner muur naby die en suite geplak om koste te bespaar.

Wenk Izette het die prent aanlyn gekoop en die plakpapier by Studio 22 laat druk.

Lê jou hoof neer Wat is dan nou meer romanties as ’n hemelbed in ’n wittebroodsuite? Izette is geïnspireer deur haar ma se bed, wat oor die 200 jaar oud is, en het ’n moderne weergawe laat maak by Supreme Upholsterers in Stellenbosch.

Groen is my gunstelingkleur en ek kombineer dit graag met grys. – Izette

Swart op wit

Geruite plakpapier maak ’n treffende stelling in dié sonnige gastekamer in Port Elizabeth. Die binneontwerper Brigitte Hills vertel: “Ek is mal oor ’n ruitpatroon – dis tydloos! Met die swart en grys skakerings kan die basiese meubels neutraal bly en kan jy die kleurskema maklik verander as dit tyd raak vir iets nuuts.” Brigitte beskryf die kamer as helder en opgewek. “Ek kan nie sê dit het ’n bepaalde styl nie. Dis ’n mengsel van oud en nuut – die ou bedkassies is groen gespuitverf vir ’n vars voorkoms, en die lampe bring ietwat van ’n industriële styl in,” sê sy. Die kamer kyk uit op die swembad en kry heelwat natuurlike lig. Die vernaamste aksentkleure is groen en geel, wat die helder, oop gevoel van die kamer versterk.Mooi gestreepte gordyn!

Dit werk, want…

Warmte en tekstuur ’n Funky mat anker die ruimte, terwyl die kombers, kwilt, kussings, gestoffeerde kopstuk en perkal-beddegoed warmte verskaf. ’n Rottang-ottoman bring tekstuur in.

Op 'n streep Jy kan nie ’n fout maak met ’n eenvoudige streep nie! Die gordyne skakel in by die monochroom kleurskema, maar gee die kamer ook ’n bietjie oemf.

Nuwe nut Met die regte verfkleur kan ’n ou meubelstuk weer splinternuut lyk. Die opgeknapte bedkassies in ’n lieflike groen staan uit teen die swart, grys en wit en herhaal van die kleur in die strooikussings.

Kundige raad

Die binneontwerper Brigitte Hills deel haar top-wenke:

1 Oorweeg jou beligting mooi. Die styl en proporsies van jou bedlampies is belangrik, maar dit moet ook goeie leeslig verskaf.

2 Dié styl is oulik vir ’n gastekamer omdat mense net ’n kort ruk daar oorbly. Dink mooi na oor watter kleure vir jou kalmerend is; jou slaapkamer is jou toevlug en dis belangrik dat jy ’n goeie nagrus kry.

3 Maak minder! Sorg vir genoeg pakplek sodat jou kamer ’n rustige ruimte bly.

4 Goeie beddegoed, soos katoenperkal, is ’n moet.

5 Gebruik komberse en dekens laag op laag vir ekstra snoesigheid.

KONTAK 083 652 9895, brigittehills.co.za

Plafonlig van Weylandts; blou kussings van MRP Home

Sag en romanties

Met massiewe sagtepienk blomme wat lyk asof hulle uit die plafon tuimel, is Ivor en Roxy Jones se slaapkamer in hul huis in Plumstead die toonbeeld van romanse.

Stacey Russell van House2homesa het hand bygesit met die dekor. “Dis sag en romanties, maar daar is steeds ’n goeie balans tussen manlik en vroulik, danksy die kombinasie van grys en pienk skakerings. Dis die perfekte middelgrond vir ’n paartjie.”

Die pasgemaakte plakpapier deur Cara Saven is ’n apploustrekker, terwyl die kontemporêre vinielvloer met ’n houtvoorkoms warm onder die voete is, maklik is om skoon te maak en weelderig lyk.

Dit werk, want…

Al die aandag Die paartjie het teen ’n kopstuk besluit sodat die pragtige fokusmuur die apploustrekker kon wees.

Meng en pas Bedkassies hoef nie eenders te wees nie; ’n kombinasie van verskillende soorte meubels in verskillende groottes kan groot trefkrag hê.

Kontras ’n Moderne sytafeltjie, vloerlamp en plafonlamp bring die industriële styl in en gee balans tussen al die sagte, romantiese kleure. kundige raad

Wonder jy watter kleur vir ’n bepaalde voorkoms sal werk? Lien Potgieter, ’n kreatiwiteitskonsultant, deel haar idees:

1 Enige skakering van pienk sal werk vir ’n romantiese atmosfeer – van ligpienk tot ’n meer dramatiese dofpienk. Kombineer dit met sagte gryse om ’n intieme, kalm atmosfeer te skep.

2 As jy graag iets meer dramaties wil hê, kies ’n helder kleur soos blou. Dit het ’n kalmerende uitwerking en laat ’n vertrek ruimer voel.

3 Wit of neutrale skakerings bly gewild in ’n slaapkamer waar rus en vrede belangrik is, maar onthou, dié palet moet warm wees. Bring ’n tikkie weelde in met metale soos brons, koper en roosgoud.

4 Vir ’n meer manlike of dramatiese effek, hou by modieuse houtskoolskakerings. Dit gee ’n gevoel van stabiliteit en jy kan balans skep met ’n vrolike aksentkleur soos geel of oranje.

5 Probeer ook skakerings van groen vir ’n rustige atmosfeer. Min dinge kan jou ná ’n lang werkdag verkwik soos ’n palet wat deur die natuur geïnspireer is.

KONTAK 083 691 3569, lienpotgieter.co.za

Blou kussings en tafeldoek van MRP Home

Kalmte in kleur

Vir die kunstenaar Kim Black was gedempte neutrale kleure die ooglopende keuse vir die hoofslaapkamer in haar huis in Vishoek in die Kaapse Skiereiland. Eerstens wou sy nie hê die kamer moet te vroulik voel vir manlief Brendan nie. Tweedens werk sy elke dag met sterk, lewendige kleure, daarom sou ’n sagte palet ’n beter keuse vir haar toevlug wees.

“Ek wou ’n vreedsame, rustige ruimte skep waar ons ná ’n besige dag kan uitspan,” sê Kim. Maar moenie dink die slaapkamer is kleurloos en saai nie – dit spog met ’n verskeidenheid ryk kleure en teksture. 

Ek is mal oor ons slaapkamer; dis in ’n stil deel van die huis waarheen ek kan ontsnap as ek wil lees, in my dagboek wil skryf of, belangriker nog, wil slaap! – Kim

Die doek agter die bed, wat Kim self geskilder het, is ’n pragtige fokuspunt en speel ’n groot rol in die vertrek se atmosfeer. Groen linne-kussingoortreksels van Weylandts

Dit werk, want…

Verlei die oog Kim het ’n groot stuk seil – wat sy in gedempte bloue en gryse geverf het – teen die muur gehang om die bed groter en deftiger te laat voel en ’n neutrale dog interessante agtergrond te skep.

Veeldoelige meubels Brendan bêre sy T-hemde en onderklere in die tweedehandse laaikas aan sy kant van die bed. Kim het die laaikas aan haar kant van die bed geverf met Annie Sloan Paris Grey en afgerond met was. Die wit bed in die Franse styl kom uit die Verenigde Koninkryk.

Persoonlikheid Kim wissel die kussings af en gebruik tekstuurryke dekens wanneer sy die styl wil verfris. Dis maklik, want die res van die kamer is grootliks neutraal. 

Elegansie in eenvoud

Toe John en Pippa Walls die binneontwerper Salomé Gunter vra om hul nuwe huis op Koringberg te help mooimaak, het daar vir haar ’n taamlike taak voorgelê: Die klein gastekamer se mure was groen, en in die sitkamer langsaan was daar ’n lelike ou staalkaggel! Die vorige eienaars het die vertrekke as selfsorg-blyplek verhuur, maar nou moes dit slaapplek vir tieners verskaf. “Ons het die kamer van die sitkamer geskei met ’n groot swart boekrak en ’n skerm vir privaatheid,” sê Salomé. Sy beskryf die dekor as eenvoudig: Die hemelbed met sy gordyne pas perfek by die huis se styl en ’n deur wat op die stoep oopmaak, is kenmerkend van die plattelandse lewe.

Dit werk, want…

Hergebruik Die bed en laaikas kom van die huiseienaars se vorige huis in Fresnaye, Kaapstad. Salomé het strepe oor die laaie geverf vir ’n vars voorkoms.

Uit die natuur ’n Houtstomp dien as bedtafeltjie. Die swart staal-hemelbed is romanties en tydloos, terwyl die ragfyn gordyne sorg vir tekstuur en sagtheid.

VERSKAFFERS

Cara Saven Wallpaper 082 953 6246

House2homesa 082 765 0487

Jurgens Walt 082 928 8757

Kim Black Art 060 464 2562

Liesel Trautman Ceramics 021 447 2029

Mervyn Gers Ceramics 021 510 2385

MRP Home 0800 212 535

Popstrukt

Salomé Gunter 073 145 7170

Studio 22 021 525 3740

Supreme Upholsterers 021 887 2756

Weylandts 0860 103 400