Foto’s Francois Oberholster | Stilering Kim Bougaardt

Projekgids
  • Harde werk 6/10
  • Vaardigheidsvlak 6/10
  • Tyd nodig 1 - 2 dae

WAT JY NODIG HET

INKOPIELYS

  • paletplanke
  • 3–4 dennehoutstroke (20 x 50 mm), 1,6 m lank
  • oorskietverf
  • sowat agttien 70mmankerskroewe en muurproppe
  • 20–30 paneelspykers (50 mm) of ’n kramgeweer
  • string feetjieliggies (opsioneel)

GEREEDSKAP

  • potlood, skêr, papier, aftrekpapier
  • figuursaag
  • sponsroller, kwas, verfpan
  • 60- en 80-grint-skuurpapier
  • waterpas
  • maatband
  • elektriese boor
  • hamer
  • skroewedraaier

So maak jy...

1. Kies genoeg planke dat hul gesamentlike breedte, wanneer hulle vertikaal langs mekaar staan, genoeg sal wees om as kopstuk vir jou bed te dien. Maak seker die planke is reguit. Van ons planke was reeds geverf. Teken verskillende profiele van wolkekrabbers op papier en trek die profiele dan met aftrekpapier op een punt van elke plank af. 

2. Saag die profiele uit met jou figuursaag. Vir die vensters, boor ’n gat waardeur jou  figuursaag se lem kan gaan en saag dan die openinge vierkantig uit. Skuur die saagrande netjies met growwe 60-grint-skuurpapier. 

3. Gebruik ’n verfroller en verfdie planke met oorskietverf in die kleure van jou keuse. Jy het bitter min verf nodig en jy kan dit ook verdun om ’n kleurwaseffek te kry. Hou gerus ook van die planke ongeverf vir interessante afwisseling; skuur die hout net effens gladder met 80-grint-skuurpapier.

WENK Gebruik ’n sponsroller vir die beste resultate.

4. Skroef 3 tot 4 dennehout- stroke horisontaal bo mekaar teen die muur vas. Dit vorm die basis waarteen jy jou “wolkekrabbers” gaan monteer. Spasieer die sporte so dat wolkekrabbers wat uit meer as een plank bestaan, genoeg ondersteuning en vasskroefplek het. 

5. Monteer nou die paletplanke teen die houtstroke met paneelspykers (of gebruik ’n kramgeweer). Wissel die verskillende kleure en rou hout af en kombineer die verskillende profiele langs mekaar na jou smaak. 

Oulik! Feetjieliggies in die lengte oor die boonste sport agter die profiele gee ekstra trefkrag. Die dikte van die houtstroke (20 mm) waarteen die profiele gemonteer word, laat net genoeg spasie daarvoor.
Projeknotas
  • Ons het die muur agter die bed eers in ’n donkerder kleur as die res van die kamer geverf met Dulux Rich Symphony 1.
  • Moenie streef na perfeksie nie. ’n Effense skewe venster of torinkie dra alles by tot die voorkoms.
  • Jy kan planke van verskillende breedtes gebruik, party planke in twee of drie lengtes verdeel en selfs in verskillende kleure verf vir ’n nog meer rustieke voorkoms.