1 Verf vier ramekins met ’n dik laaggesmelte botter (nie olie nie) en besprinkel dit dan mildelik met genoeg parmesaankaas om ’n lagie te vorm. Bêre dit in die yskas.

2 Voorverhit die oond tot 180oC. Smelt die botter in’n klein kastrol, verwyder dit van die hitte, voeg die meel by en roer dit tot glad. Roer die melk bietjies-bietjies by tot glad en sit die kastrol terug op die plaat. Roer aanhoudend tot die mengsel verdik en ’n dik witsous vorm. Laat die sous vir 1–2 minute prut en sit dit vir 5 minute eenkant om effens af te koel. Voeg dan die orige gerasperde parmesaan- en gruyèrekaas by, asook die biltong en eiergele. Roer tot goed gemeng en geurmet varsgemaalde swartpeper. (Die kaas en biltong sal waarskynlik genoeg sout verskaf.) 

Klits die eierwitte in ’n silwerskoon droë mengbak van glas of aluminium totdat dit sagte punte vorm. Moenie te veel meng nie. Gebruik ’n groot metaallepel om die eierwitte versigtig by die biltongmengsel in te vou.

4 Skep die mengsel in die voorbereide ramekins, pak dit in ’n diep oondpan en vul die oondpan halfpad met kookwater. Bak dit vir 25 minute of totdat die soufflés goed uitgerys is. Haal die ramekins uit die oond en laat dit vir 5 minute eenkant staan.

Gebruik die staantyd om ’n bakplaat in die oond te verhit. Keer die soufflés uit op die warm bakplaat en skep ’n lepel room bo-op elkeen, gevolg deur ’n takkie origanum en ’n bietjie parmesaankaas. Bak die soufflés vir 5–10 minute en bedien dadelik. 

Wenke

• Sit al die bestanddele en toerusting reg voordat jy begin en maak seker alles is by kamertemperatuur.

• Die gruyère- en parmesaankaas in die mengsel kan met gekrummelde bloukaas vervang word. 

• Die soufflémengsel kan tot voor stap 3 gemaak word en dan vir twee uur staan voordat jy die eierwitte invou. Die klaargebakte soufflés kan weer vir tot ’n uur staan voordat dit die tweede keer oond toe gaan.