1. Maak die hoenderlewertjies skoon en meng dit in ’n vlak bak met die port, brandewyn, sjerrie en neutmuskaat. Bedek en marineer die lewer in die yskas vir minstens 2 uur (verkieslik oornag, as jy genoeg tyd het). 

2. Braai die sampioene in die helfte van die botter in ’n braaipan oor hoë hitte terwyl jy dit roer. Geur die sampioene met sout en swartpeper en skep dit uit op ’n bord.

3. Dreineer die hoenderlewertjies en druk dit droog op kombuispapier. Verhit die oorblywende botter in die braaipan en braai die hoenderlewertjies tot goudbruin aan alle kante, maar nog pienk aan die binnekant. Skep dit uit op ’n bord.

4. Braai die salotte in dieselfde pan terwyl jy aanhoudend roer. Voeg die witwyn by en skraap die bodem skoon. Giet die room of jogurt by en verhit stadig. (Let wel: As jy jogurt gebruik, moet dit nie kook nie, want dit sal skif.) Geur met sout, swartpeperen neutmuskaat. Skep die sampioeneen hoenderlewertjies terug in die sous en verhit tot deurwarm. Roer die kruie by en sit voor op pasta. Sit gerasperde parmesaankaas daarmee saam voor.