Kekerertjiesop-met-dukkah-nuusbrief

Genoeg vir: 6-8

Bereidingstyd: 20 minute

Gaarmaaktyd: 1 uur en 10 minute

  • 500 g droë keker-ertjies, oornag geweek in koue water
  • 1 ui, gekap
  • 2 wortels, gekap
  • 2 selderystele, gekap
  • 2 knoffelhuisies, gekneus
  • 60 ml olyfolie
  • 2 roosmaryntakkies
  • 1 heel rooi brandrissie
  • 200 g spinasie, fyn gekap
  • 1 x 400 g-blik gekapte tamaties
  • olyfolie (vir voorsit)
  • dukkah (vir voorsit)
  • vars koljanderblare (vir garnering)

1. Dreiner die keker-ertjies en gooi dit saam met sowat 3,5 liter koue water en die ui, wortel en seldery in ’n kastrol. Verhit tot kookpunt, maar moenie sout bygooi nie, anders sal die keker-ertjies nie sag kook nie. Skep enige skuim af wat op die oppervlak vorm en prut dit tot die keker-ertjies sag is – dit sal omtrent ’n uur neem. Gooi die sout die laaste halfuur van die kooktyd by. Puree twee derdes van die keker-ertjies saam met die kookvloeistof tot glad en hou die res heel.

2. Verhit die olyfolie in dieselfde kastrol waarin die keker-ertjies gekook het en soteer die knoffel, roosmaryntakkies en brandrissie. Gooi die spinasie by sodra die geure begin ontwikkel. Roerbraai die spinasie tot sag en gooi die tamaties by. Geur na smaak met sout en swartpeper. Haal die roosmaryntakkies uit en gooi die keker-ertjiepuree en heel kekerertjies by. Verhit tot kookpunt en proe weer vir geur.

Om voor te sit: Skep die sop in bakkies en drup olyfolie oor. Strooi laastens dukkah en vars koljanderblare oor.