Limoncello-forel met bros vel

“My familie hou van eenvoudige kos sonder fieterjasies, maar ek eksperimenteer graag. Dié gereg is my weergawe van ’n Gin-cured salmon-resep wat ek op Taste.com.au. raakgelees het.

Vir ekstra wa-wa-woem braai ek die vis se velletjie bros in ’n Air Fryer,” sê Jolanda.

Genoeg vir 6 as voorgereg

Bereidingstyd: sowat 6 uur

Gaarmaaktyd: 5 minute

Bestanddele

• sowat 220 g reënboogforel, vel aan, grate verwyder

• 1 groot komkommer, geskil

• 12 radyse

• ’n hand vol vars mentblaartjies

• olyfolie

• vars suurlemoenskyfies (opsioneel)

PEKEL

• 40 ml Maldon-seesoutvlokkies

• 40 ml strooisuiker

• 5 ml reënboogpeperkorrels, gestamp

• 5 ml vinkelsaad, gestamp

• 80 ml Limoncello

• ’n paar suurlemoenblare, gekneus

Só maak jy

1 Meng die pekelbestanddele en sit die helfte daarvan onderin ’n vlak glas- of keramiekbak waarin die vis knus pas. Sit nou die vis met die velkant na onder bo-op die pekel en giet die res van die mengsel bo-oor; maak seker die vis is heeltemal met die pekel bedek. Sit ’n deksel op of maak toe met kleefplastiek en plaas vir 6 uur in die yskas.

Forel is dunner as salm en het daarom minder tyd in die pekel nodig om die geure te laat intrek en die vlees “gaar” te maak. Pekel ’n dik snit tot 12 uur lank.

2 Haal die vis uit die pekel, spoel vinnig af onder koue water en druk droog. Sny nou die vel versigtig af met ’n skerp mes. Jolanda sny die vel in 2 cm-stroke en braai dit vir sowat 5 minute in haar Air Fryer vir ’n bros garnering. Jy kan dit ook diepbraai, of doodgewoon weglaat. Sny die vis in dun skyfies of porsies.

3 Sny die komkommer en radyse in dun skyfies. 4 Om voor te sit, rangskik die vis saam met die slaaibestanddele op ’n dienbord of garneer die porsies vis met van die komkommer, radyse en ment en sit die res apart voor sodat elke gas sy eie “slaai” kan maak. Sprinkel olyfolie oor en garneer met die bros velletjie en vars suurlemoenskyfies indien gebruik.

Hennie se takbokfilet à la Wellington

Baie mense huiwer om wild gaar te maak, maar filet is waarskynlik die maklikste snit om mee te eksperimenteer. Die resep werk ook uitstekend met beesfilet.

Genoeg vir 6

Bereidingstyd: 1 uur, plus marineertyd

Gaarmaaktyd: 25 minute

Oondtemperatuur: 180 °C

Bestanddele

• 1 takbokfilet, oornag in karringmelk gemarineer

• 60 ml knoffelbotter

• 5 ml rooisoetrissie-pesto

• 15 ml brandewyn

• 150 g spekblokkies met redelik vet aan

• 1 klein ui, fyngekap

• 300 g gemengde sampioene, fyngekap

• 30 ml vars platblaarpietersielie, gekap

• sowat 350 g blaardeeg met botter, plus ekstra vir versier

• 15 gedroogde porcini-sampioene

• geklitste eier vir glasering

Só maak jy

1 Haal die filet uit die karringmelk en vee skoon met ’n lappie. Verhit die knoffelbotter en pesto saam in ’n pan en braai die filet vinnig oor redelik hoë hitte tot oraloor goudbruin en geseël; bestryk met die brandewyn en laat vinnig afkoel.

2 Braai nou die spek tot dit begin kleur kry, voeg die ui en sampioene by en braai tot gaar en geurig. Sampioene is geneig om vog in die pan te maak terwyl dit braai; neem maar jou tyd sodat die mengsel droog braai, anders gaan die kors pap word wanneer dit bak. Roer die pietersielie by en geur met sout en peper. Laat heeltemal afkoel.

3 Plaas die blaardeeg op ’n meelbestrooide oppervlak en rol dit uit in ’n dun reghoek, groot genoeg om die vleis en sampioene toe te vou. Skep die helfte van die sampioen-mengsel in die middel van die deegreghoek, plaas die vleis daarop en skep die res van die sampioene bo-oor. Rol nou die deeg om die vleisvulsel in ’n netjiese rol. Knyp die punte toe, sit dit op ’n gesmeerde bakplaat en verf met eier. Versier die kors met sterre uit die oorskietdeeg en verf dié ook met eier. Sit in die yskas terwyl die oond verhit.

4 Voorverhit die oond (of span die pizza-oond in) en bak die pastei vir sowat 20 minute of tot goudbruin. Dis belangrik dat die deeg gaar is (en dit is hoekom dit liefs dun uitgerol moet word) terwyl die vleis nie sy blos verloor nie. Laat rus ’n paar minute voor jy dit in dik skywe voorsit met vleissous en ’n soetigheid soos ingelegde pere of kwepers.

Die grootste sonde wanneer dit by wild kom, is om die vleis oorgaar te maak. – Hennie

Jolanda se wilde koolslaai

Jolanda pas gereeld die bestanddele aan na gelang van wat in haar yskas is. Die brosgebakte kitsnoedels gee die allerlekkerste knars en is aansienlik goedkoper as neute. “Ek hou altyd ’n bakkie op my spensrak.”

Genoeg vir 6 as bygereg

Bereidingstyd: 20 minute, plus oornag

Bestanddele

• ’n halwe kop rooi kool, fyngesnipper

• ’n hand vol elk rosyne en gedroogde bosbessies

• 60 ml makadamia-olie

• 30 ml balsemiekasyn

• 1 duim vars gemmer, geskil en fyngerasper

• 30 ml sesamsaad, gerooster

• 1 pakkie kitsnoedels

• ’n ruim knypie Himalaja-sout

• ’n knippie komyn

• 125 ml mentblaartjies, stingels verwyder

• 60 ml granaatpitte

Só maak jy

1 Meng die kool, rosyne, bosbessies, olie, balsemiekasyn, gemmer en sesamsaad en laat die slaai oornag in die yskas marineer.

2 Breek die noedels in klein stukkies en sprei dit oop op ’n bakplaat. Rooster vir ’n paar minute teen 200 °C tot ligbruin en bros. Laat afkoel en meng met die sout en komyn. Jy kan natuurlik hier speserye na smaak byvoeg as jy wil. Hou in ’n lugdigte houer.

3 Om voor te sit, rangskik die koolslaai op ’n mooi dienbord en strooi ’n dik laag van die noedels oor. Garneer met vars mentblare en granaatpitte.

Jana se sout-aartappels

Jana stel net so graag soos haar ma nuwe resepte op die proef; dis een van haar gunsteling-geregte om te maak én te eet.

Genoeg vir 6

Bereidingstyd: 10 minute

Gaarmaaktyd: 1 uur

Oondtemperatuur: 200 °C

Bestanddele

• 24 klein rooi baba-aartappels

• sowat 80 ml olyfolie

• sowat 25 ml seesoutvlokkies

• 30 ml geroomde peperwortel

• 10 ml korrelmosterd

• 250 ml suurroom

• ’n paar grasuie, gesnipper

Só maak jy 

1 Skrop die aartappels goed en maak droog met ’n vadoek; laat dan heeltemal droog word.

2 Voorverhit die oond. Prik elk van die droë aartappels twee keer met ’n vurk, vryf oraloor met geoliede hande en doop die aartappels een vir een in die sout sodat dit ’n ligte lagie reg rondom kry.

3 Rangskik die sout-aartappeltjies knus langs mekaar in ’n oondbak en bak vir sowat 1 uur of tot bros buite en smeltsag binne.

4 Meng die peperwortel, mosterd en suurroom. Sny ’n kruisie in elke gaar aartappel en druk van onder dat die sagte binneste oppof. Rangskik op ’n mooi bord en skep van die peperwortelsous oor elkeen. Strooi grasuie bo-oor. Sit die ekstra sous in ’n bakkie voor – dit smaak ook heerlik saam met die filet.

Yanke se wortelkoek

“Die wortelkoek is gebaseer op ’n Jenny Morris-resep wat ons gereeld bak met allerhande variasies,” vertel Jolanda. Dié een het sesamolie en swart sesamsaad vir ’n spesiale Kerskinkel.

Genoeg vir ’n 23 cm-dubbellaagkoek

Bereidingstyd: 30 minute

Baktyd: sowat 1 uur

Oondtemperatuur: 180 °C

Bestanddele

• 280 g (500 ml) koekmeel

• ’n knippie sout

• 10 ml bakpoeier

• 7 ml koeksoda

• 400 g (500 ml) suiker

• 4 eiers, geklits

• 250 ml olie

• 125 ml sesamolie

• 500 ml fyngerasperde wortel

• 250 ml geblikte fyn pynappel, gedreineer

• 250 ml grofgekapte gemengde neute

• 250 ml klapper

• 125 ml swart sesamsaad

VERSIERSEL

• 125 ml botter by kamertemperatuur

• 230 g (1 houertjie) mediumvet-roomkaas, saggemaak

• 5 ml vanieljegeursel

• sowat 750 ml versiersuiker

Só maak jy 

1 Voorverhit die oond. Meng die meel, sout bakpoeier en koeksoda in ’n mengbak. Voeg die suiker, eiers en olies by en meng goed. Roer nou die res van die bestanddele by en skep in twee gesmeerde 23 cm-koekpanne wat met bakpapier uitgevoer is. Bak vir sowat 50 minute tot 1 uur tot gaar en uitgerys. Gebruik ’n toetspen om seker te maak die koek is gaar. Keer die koeke uit op ’n draadrakkie en laat heeltemal afkoel.

2 Maak die versiersel Klits die botter met ’n elektriese klitser tot lig. Voeg die roomkaas, vanielje en 500 ml van die suiker by en klits tot lig en romerig. Oordeel self of nog suiker nodig is na aanleiding van die soetheid en smeerbaarheid van die versiersel.

3 Sit die eerste laag koek op ’n mooi staander en smeer ’n dik laag versiersel daarop. Sit die tweede koeklaag bo-op en smeer oraloor met die versiersel. Skraap die kante sodat die koek deur die versiersel loer en sprinkel jou keuse van ekstra neute en sade oor. ’n Takkie of twee roosmaryn rond die prentjie mooi af.

Mila se Margherita

Mila volg ’n veganistiese dieet en gebruik ’n suiwelvrye wit kaas vir haar pizza.

Genoeg vir 6

Bereidingstyd: 20 minute

Gaarmaaktyd: 30 minute

Bestanddele

• 6 klaar bereide pizzabasisse

• 200 g Dairy Free Greek White Cheese (kry dit by woolworths.co.za)

• vars basilieblare

TAMATIESOUS

• 1 kg kersietamaties

• 60 ml olyfolie

• 45 ml balsemiekasyn

• 2 takkies origanum

Só maak jy 

1 Voorverhit die pizza-oond deur ’n klein vuur agterin of teen die kant van die oond te maak; voeg hout by soos nodig om die vuurtjie net-net aan die gang te hou. Onthou, dit neem tyd om ’n pizza-oond te verhit – sowat 2–3 uur, afhangend van die grootte. Dit moet tussen 300 °C en 400 °C wees vir pizza. Met ’n infrarooi-termometer (beskikbaar by yuppiechef.com) kan jy sonder kontak bepaal wat die temperatuur in die oond is.

2 Maak die sous Sit die tamaties in ’n groot vuurvaste oondpan en drup die olyfolie en asyn oor. Strooi die kruie oor en geur met sout en varsgemaalde swartpeper. As die pizza-oond klaar warm is, bak dit sommer in dié oond vir sowat 30 minute of tot die tamaties gebars en kleur gekry het. As jy ’n gewone oond gebruik, voorverhit dit tot 200 ºC.

3 Druk die tamaties met ’n aartappeldrukker om die sous effens fyner te maak. Smeer ’n laag van die tamatiesous oor elke pizzabasis, rangskik blokkies kaas bo-op en skuif dit op ’n pizzaspaan in die oond.

4 Bak vir ’n paar minute tot goudbruin en borrelend – hou maar dop, dis ’n vinnige proses en jy sal dalk die pizza halfpad deur moet draai. Sodra dit warm uit die oond kom, strooi vars basilie oor en smul terwyl dit warm is.

Wenk
Plaas vars vyekwarte saam met die tamatiesous en feta op die pizza voor dit oond toe gaan. Wanneer dit uit die oond kom, garneer met pistasieneute, granaatpitte, vars ment en ’n paar druppels granaatkonsentraat vir ’n Midde-Oosterse kinkel. Gewone mozzarella trou ook uitstekend met die tuisgemaakte tamatiesous.

Linne-voorskoot in die ontwerp Olives van Tokara Deli

Ons spreek seën teenoor mekaar uit en ontspan ná ete met bordspeletjies terwyl die kinders musiek speel. – Jolanda