1. Maak die karamelstroop Giet die suiker en water in ’n swaarboompan en verhit dit oor matige hitte tot die suiker gesmelt het. Skud die kastrol om die suiker eweredig te laat smelt en was die kristalle wat aan die kant vorm met ’n nat kwassie af. Roer die kremetart by en hou die pan op die plaat tot die suiker ’n vloeistof met ’n goue karamelkleur vorm. Haal die pan van die plaat af – wees versigtig om dit nie vir te lank op die plaat te hou nie, anders sal dit te donker word en ’n slegte, bitter smaak ontwikkel.

2. Giet die karamelstroop in die ramekins en maak seker die bodem van elkeen word heeltemal bedek. Laat die vormpies eenkant staan om af te koel. Voorverhit die oond.

3. Maak die vla Klits die eiers, eiergele en suiker tot lig en romerig.

4. Sny die vanieljepeul in die lengte oop, skraap die saadjies uit en gooi dit by die melk.

5. Verhit die melk, room en vanieljesaadjies tot net onder kookpunt. Skink die melkmengsel baie stadig by die geklitste eiers terwyl jy dit aanhoudend klop. Giet die vla deur ’n sif in ’n groot maatbeker. Skep enige skuim af.

6. Vul die ramekins met die vla en pak dit in ’n oondroosterpan. Vul die oondpan met warm water sodat dit halfpad teen die kante van die ramekins opkom. Bak dit vir 20–25 minute in ’n voorverhitte oond (150°C) tot die vla gestol het – die baktyd sal deur die grootte van die ramekins bepaal word. Toets die crème caramel met ’n toetspen – dit moet skoon uitkom. Onthou,die vla sal dalk nie gestol lyk wanneer dit uit die oond kom nie; dit sal wel stol namate dit afkoel. Verwyder die ramekins uit die waterbad en laat dit heeltemal afkoel voordat jy dit vir minstens twee uur, maar verkieslik oornag, in die yskas sit.

Sit dit voor Keer die crème caramel op borde uit. Dis veel makliker as jy elke ramekin eers vinnig in ’n bietjie kookwater druk om die karamel op die bodem te smelt. Gebruik dan ’n mes om die vla aan die kante los te sny. 

Wenk Werk so vinnig moontlik sodra die karamel gereed is – dit word redelik gou hard.