Eksperimenteer gerus met jou gunsteling- vars vulselbestanddele soos julienne-groente, gepluisde gaar vark of hoender, kruie en sade vir variasie. Moenie die doopsous vergeet nie!

1 Kry al die vulselbestanddele gereed voor jy begin rol: Week die noedels in water volgens die anwysings op die pakkie; sny die steurgarnale in die lengte deur en maak seker al die harde stukkies dop is verwyder; sit ook die edamameboontjies, aarbeie, avokado en blare reg vir gebruik.

2 Om die ryspapier sag te kry, week die velletjies een vir een vir sowat 15–20 sekondes in louwarm water. Verwyder versigtig sonder dat dit frommel of vou en sit dadelik plat neer op ’n klam vadoek. Werk dan met een op ’n slag.

Rangskik drie steurgarnale met die ongesnyde buitekant na onder in die middel an die velletjie. Voeg ’n paar edamame-boontjies, aarbeiskyfies en kruieblaartjies by. Sit volgende ’n bondeltjie noedels, ’n skyfie avokado en ’n stuk bros blaarslaai bo-op. Vou die ryspapier oor die twee vulsel-ente en rol op in ’n sigaarvorm – so maklik soos dit! Herhaal met al ses en sit binne ’n uur of twee voor met ’n doopsous. (Die rolletjies is geneig om taai te raak as dit te lank staan.)

Doopsous

Kies ’n sousie wat jou vulsel komplementeer. Die rolletjie se vars vulselkombinasie het baie skoon smake bymekaar en is nog ongegeur, daarom sal ’n pikante sousie met byt soos soetrissie of lekker soet pruimsous met ’n skeutjie sout sojasous en ’n paar druppels vissous baie goed werk. ’n Ander gunsteling is ’n grondboontjiesous met rissie, en skeutjies sesam-olie, sojasous en hoisinsous.