Jy het 5 dinge nodig vir die dis:

1 ’n Stuk varkboud van 3 kg

Vra jou slagter met sy lekker skerp messe om die vleisstuk te ontbeen en die vel te verwyder.

2 Groente

Die klassieke kombinasie van uie, wortels en seldery staan bekend as ’n mirepoix in Frans en is die geurbasis van ’n heerlike pansous. Kap die groente grof en gebruik een of al drie van die klassieke trio, afhangend van wat in jou groentemandjie of yskas is.

3 Kruie

Gebruik ’n bos stewige gemengde kruie, soos tiemie, lourier, roosmaryn en pietersielie, of kies jou gunsteling.

4 30 ml meel

’n Sprinkel meel help dat die souse in die baksakkie sy ding doen en is altyd ’n goeie idee, ongeag wat jy in die oond druk.

5 500 ml gemmerlim of aftreksel

Die vloeistof wat jy kies, geur die vleis en is ook die basis van jou pansous. Jy kan water gebruik, maar jy kan ekstra geur byvoeg met gemmerlim, vrugtesap of aftreksel.

1 Voorverhit die oond tot 170 °C. Maak fyn insnydings in die vetkant van die vleis en vryf in met jou gunsteling-speserye. Ons het growwe sout, swartpeper, vinkelsaad, koljander en komyn gebruik. Rol die vleis netjies op en maak dit vas met kombuistou. Braai die vleis oraloor bruin in ’n pan oor hoë hitte.

2 Maak ’n groot baksak oop en sit dit in ’n oondpan. Sit die meel, groente, bruingebraaide vleis, kruie en kookvloeistof binne-in. Verseël die sak en prik sowat vyf keer met ’n skerp skêr of mes. Rooster dit nou sowat 1 uur per kilogram vleis. Omdat die vleis effens gebraai is en ek dol is oor sappige vleis, het ek dié pragstuk net 2½ uur lank gerooster.

3 Knip die sak oop en haal die vleis uit. Bedek die boud met foelie en laat dit rus terwyl jy die sous maak.

Jy het nog 5 goed nodig vir die sous:

1 Die sappe uit die baksak

Dié vloeistof waarin die vleis gekook het, sal ’n lieflike geur hê danksy die gemmerlim en groente. Gooi dit deur ’n sif, en hou die groente eenkant – dis die perfekte begin vir jou pansous.

2 ’n Mengsel van 30 ml meel en 125 ml aftreksel

Meng die twee tot ’n gladde pasta. Dit sal help keer dat die pansous klonte kry.

3 10 ml Dijonmosterd

Mosterd sal die sous warmte, diepte en geur gee.

4 ’n Skeut soet sjerrie

Hoekom nie?

5 ’n Lepel of twee room

Room gee die sous ’n ryk tekstuur en sal die soet geure in die sous komplimenteer nadat die inkookproses dit verskerp het.

1 Giet die pansap deur ’n sif, en kook dit in die oondbak op die stoof, of gooi dit oor in ’n pot.

2 Klits die meelmengsel by en kook ’n paar minute tot die sous effens verdik.

3 Geur die sous met die mosterd en sjerrie, en geur met sout en peper na smaak. Laat dit afkook tot dit ’n luukse tekstuur het.

4 Voeg die room by, meng deur en proe vir ’n laaste keer vir sout en peper. 5 Sny die vleis dun – ’n goeie wenk met ’n droër snit soos die boud is om in dun skyfies met lekker baie sous te bedien. Pak die vleis op ’n mooi dienbord saam met die groente uit die baksak, en drup die sous rojaal oor. Sit voor saam met jou gunsteling-bykosse, soos braai-aartappels of rys.