Varklies, twee keer in die pot

Bereidingstyd: 50 minute, plus verkoeltyd oornag
Porsies: 4-6
Gaarmaaktyd: 3½ uur
Bestanddele
  • 1,5 kg - ontbeende varklies, vel verwyder (sien kassie)
  • sowat 15 ml - olyfolie
  • - KOOKVLOEISTOF
  • 1 - klein ui, grofgekap
  • 3 - knoffelhuisies, gekneus
  • 5 ml - elk vinkel- en koljandersaad, gerooster
  • 3 - takkies origanum
  • ’n knyp - rissievlokkies
  • 500 ml - natuurlike soet wyn
  • 100 ml - wit balsemiekasyn
  • - GLASEERSEL
  • 250 ml - kookvloeistof
  • 30 ml - heuning
  • 15 ml - worcestersous
  • ’n skeut - vissous (opsioneel)
Metode
Sit die taai varklies voor met knoffel-kapokaartappels, brosgebraaide kekerertjies en growwe tzatziki met pitabrood vir ’n Griekse fees. Of kies jou gunsteling-stysel.

1 Voorverhit die oond tot 160 °C. Sny die varklies in kwarte en pak knus in ’n oondpan. Voeg die kookvloeistof-bestanddele by, maak toe met ’n deksel of foelie en rooster vir 3 uur.

2 Haal die varkvleis uit die oond en laat dit afkoel. Lig die vleis uit die kookvloeistof (dié gooi jy deur ’n sif en hou eenkant) en sit dit op ’n bord wat met kleefplastiek uitgevoer is. Bedek met nog ’n laag kleefplastiek en sit nog ’n bord of ’n kapplank bo-op; druk dit verder plat met blikkieskos. Verkoel dié stapel oornag.

3 Maak die glaseersel Meng al die bestanddele in ’n klein kastrol en laat dit kook oor hoë hitte; roer totdat dit met die helfte ingekook het.

4 Glaseer die varkvleis Sny elke platgedrukte vleiskwart in drie stukke sodat jy 12 stukke het. Verhit die olie in ’n swaarboompan en braai die varkvleis tot oraloor bruin. Smeer met die glaseersel en soteer tot gekaramelliseer.

[BROS KRAKELING]
Vra jou slagter om die varklies se vel te verwyder. Vir heerlike krakeling knip jy die vel in repe met ’n skerp kombuisskêr. Strooi sout oor en sit dit net so in die yskas vir sowat ’n uur, of selfs oornag. Dit dehidreer die krakeling sodat dit heerlik bros raak. Wanneer jy dit wil gaarmaak, pak die repe op ’n bakplaat en bak teen 200 °C tot goudbruin en bros.

Jongste uitgawe

Julie 2022

Jongste uitgawe
Kry jou praktiese, inspirerende gids vir die huis en tuin nou as ’n e-tydskrif.
Begin lees
Jongste uitgawe

WERF 2021

Jongste uitgawe
Kry jou praktiese, inspirerende gids vir jou werf nou as ’n e-tydskrif.
Begin lees