My vingertjies het natuurlik gejeuk om te tik: Jy kort ’n ligbruin koei (met ’n hartkwaal), maar ek het my natuurlik ingehou want, jy weet, nie almal se sin vir humor is goed ontwikkel nie. Hoe dit ook al sy, kort voor lank was daar natuurlik ’n paar spitsvondige antwoorde, waarvan “Magic! You need magic!” my laat proes het.

Soms is “magic” inderdaad die enigste oplossing, al moet jy dan jou eie “magic” skep. Dis mos waarvoor Tuis-lesers bekend is, en soos ek al telkemale gesê het, dis ook een van die risiko’s van my werk. Daar is net te veel mooi en slim idees, ek ly chronies aan ’n toestand van onbybelse begerigheid as ek so deur die foto’s in die tydskrif werk.

Pas is ek deur ’n regrukprojek by my eie huis, ’n morsige besigheid wat my uiteindelik laat uittrek het, want ’n mens kan ook net soveel verduur – veral as jy onverwags ’n weggooihond in pleegsorg geneem het en dié klein klits net wil weghol elke keer as ’n bouer/teëlaar/verwer/loodgieter/elektrisiën die voorhek oopmaak.

My senuwees was gedaan. Maar die hond was nie die grootste kopseer nie. Dit was die finale besluite oor teëls en verfkleure wat my snags wakker gehou het en uiteindelik die projek met weke vertraag het. Want net as ek dink ek het klaar besluit, is daar nuwe invloede – en toe raak ek so oorstuur dat ek die teëlaar en verwer sommer kanselleer en van vooraf begin soek. As ’n mens geld uitgee, wil jy nie foute maak nie!

Wat my bring by die slaapkamerstorie op bl. 54. Blou is my kleur, en al twee my slaapkamers is blou. Vir my is dit tegelyk ’n warm én koel kleur. Dis rustig op die gemoed, maar maak tog ’n stylstelling. En jy kan feitlik enige ander kleur daarmee saam gebruik. So, blou sou dit wees.

Tot ek toe die groen slaapkamer op bl. 67 sien. En skielik is ek, wel, groen van jaloesie. Gaan ek dan nou weer moet verf? Ek het hoeka ’n ding oor ’n terracotta-potjie met ’n kaktus daarin; kyk net wat sê die ontwerper Juanita Lacock oor hoe mooi groen en terracotta by mekaar pas in haar kenners-kassie op bl. 66. Ek sien sweefrakke van ou steierplanke (o, daai trap op bl. 35!) en ’n nuwe slaapkamer...

Die groen gier het eintlik al begin posvat toe ons aan ons jaarlikse verfgids gewerk het: In Tuis Verf Dit, wat vanjaar fokus op krytverfprojekte en twee gratis hoëgehalte-stensils insluit, is daar ’n laaikas wat Shelly Bergh vir ons versier het met Annie Sloan se Amsterdam Green. Die blik verf staan hier regs van my rekenaarskerm, en ek het net vanoggend Tjhoko Paint se groene ook weer gaan Google. Ek bly wik en weeg. Ek is nogal nie ’n besluitelose mens nie. Maar hierdie Tuis wat jy nou in jou hande vashou, het sowaar ’n dekordilemma onder my eie dak veroorsaak.

Hou ons by blou, of gaan ons vir groen? Ai, net toe ek die verfkwaste wil wegpak…

Twee groot kompetisies is tans aan die gang: ons derde Rookie Stylist-wedstryd saam met Mr Price Home en die jaarlikse Regruk met Flair in vennootskap met JoJo, albei met kontant en koopbewyse op die spel. Wie kan nie doen met ’n lekker pasella nie? Skryf in!