Knus binnehof ontwerp op drie vlakke

Foto’s Francois Oberholster

Die tuin word as ’n verlengstuk van die huis beskou en kan vanuit die hoofhuis sowel as die kothuis benut word. Met die groot skuifdeure wyd oop vorm die huis en tuin ’n eenheid. Plante van Cape Garden; dekke en prieel deur Leisure Living

As ’n mens van ’n groot tropiese tuin in KwaZulu-Natal na ’n Kaapse eiendom met min plek verhuis, wil jy steeds so veel moontlik groen sien. “My kliënt se grootste behoefte was ’n lowergroen tuin, al is dit klein,” vertel Petro Jacobs van Petro Landscaping, wat die tuin ontwerp het.

“Hulle wou ook die meeste ruimte moontlik vir ’n tuin benut en met plante privaatheid skep. Die trampolien moes bly vir hul seun en die buitestoele moes ’n staanplek kry.”

Die stukkie tuin is tussen die hoofhuis en ’n nuwe kothuis daaragter, met ’n swembad tussenin. Petro se grootste uitdaging was die beperkte ruimte en die baie skaduwee in dié deel van die erf. Die aansig van die kothuis was baie hard en die vloervlak daarvan hoër as die bestaande vlak rondom die swembad. Sy moes ’n plan bedink om die vloei vanaf die kothuis na die tuin te verbeter en om die ruimte tussen die huis, die swembad en die kothuis so goed moontlik te benut. 

Wat Petro gedoen het:

1 Die ruimte is ten beste benut deur die ontwerp so ongekompliseerd moontlik te hou met skoon lyne en herhalende aan-plantings. Petro verduidelik: “’n Basiese beginsel wanneer jy met klein ruimtes werk, is om aanplantings en tuinmeubels eenvoudig te hou. Daarom werk ek met plantkombinasies wat herhaal en sorg ek ook dat kleurkontraste subtiel is om rustigheid te skep.”

2 Die bestaande waterpere wat aan weerskante teen die grensmure groei, skep privaatheid. Die stamme is tot op ’n sekere hoogte oopgesnoei en die krone geknip om die gevoel van ’n deurvlegte heining te gee. Houtskerms verskaf meer privaatheid waar nodig. Op die boonste vlak aan weerskante van die kothuis is Viburnum sinensis-struike geplant om die grensmure weg te steek. 

3 Met al die skaduwee was gras buite die kwessie – dit sou nooit behoorlik groei met so min son nie. Petro het sintetiese gras van Easigrass (30 mm-Kensington) aan weerskante van die swembad en op die effens hoër vlak aan albei kante van die kothuis laat lê. Saam met die sintetiese gras langs die kothuis is groot Kent-plaveiblokke (1 200 x 600 mm) gelê om nog ’n tekstuur-element in te bring en die moderne gevoel van die ontwerp te versterk. 

4 Die vlakverskil voor die kothuis is oorbrug met ’n dek van garapa-hout; dit vertoon pragtig saam met die prieel van dieselfde hout. Die verskil in hoogte het ook die geleentheid geskep om meervlakkigheid as ontwerpelement in te span. Petro het ’n trap oor die breedte van die tuin aan weerskante van die swembad laat bou en dit afgerond met Devon Wall-dekteëls (700 x 280 x 100 mm), wat dit ’n stylvolle en moderne voorkoms gee. 

5 Weens die min ruimte is die beddings taamlik smal. Petro het gegalvaniseerde plantkabels teen die mure gespan in ’n oorkruispatroon. Hierteen rank sterjasmyn, wat sagte, groen hoogte skep sonder om diepte te verloor. In dié beddings groei daar ook Liriope met lintvormige blare en gewone buksbome as heiningplant. Die beddings is omraam met smal houtskoolkleurige Viking-steentjies (225 x 60 x 50 mm) wat kop aan kop gelê is. Dit dra ook by tot die moderne voorkoms van die tuin.