Vir kleur in die lente en veral vroeë somer, plant ’n bedding vol baardirisse (Iris-kultivars). Dié meerjarige is in ’n verskeidenheid kleure beskikbaar – skakerings van blou, oranje, wynrooi, pers, geel, brons en ook in wit. Sommige is selfs tweekleurig.

Baardirisse lyk mooi as hulle in ’n groot groep van dieselfde kleur bymekaar groei of wanneer hulle al met ’n paadjie langs blom. In ’n gemengde blombedding lyk dit pragtig saam met onder meer ridderspore, vingerhoedjies, stokrose en rose. Of plant heuningblommetjies en petunias tussenin vir somerkleur, en gesiggies en feetjieprimulas vir die winter.

Baardirisse blom op stele wat bo die blare uitgroei. Selfs wanneer hulle nie blom nie, maak die grysgroen lintvormige blare ’n mooi vertoning. Plant die irisse in goed gedreineerde, komposryke grond – maar hulle is nie te vol fiemies wat grond betref nie.

Die beste tyd om baardirisse te plant is tussen November en April. Plaas die risoom so dat die wortels bedek word deur grond, maar sowat die helfte van die risoom self moet bo die grond en aan die son blootgestel wees om mooi te blom. As dit te diep geplant word, sal dit nie blom nie.

Die polle word met verloop van tyd oorgroei en moet sowat elke drie tot vyf jaar verdeel word. Doen dit ná blomtyd en plant dadelik weer.

Baardirisse floreer veral in somer-reënstreke, maar groei ook goed in ander dele van die land – behalwe in té warm, vogtige dele. Hou dit nat in droë tye in die somer en beskerm teen wind. Die plante het nie veel las van tuinplae nie.

Plantgids
  • Volson
  • Rypbestand
  • Gemiddelde waterbehoeftes
  • Hoogte 25–75cm
Bronne
  • Gardening with Keith Kirsten deur Keith Kirsten
  • Reader’s Digest A South African Garden for All Seasons met hoofmedewerker Jennifer Godbold-Simpson