Snoeiwenke 

Claude Scott van Johannesburg skryf Ek het ’n paar ‘Arianna’-rose wat ek moet snoei. Sover my kennis strek, moet ’n mens rose terugsnoei tot ’n ogie wat na buite wys en ’n skuins snit maak. Is dit reg?

Ludwig antwoord Vroeër jare het tuiners hul rose so gesnoei omdat hulle geglo het dit sal die nuwe stele mooi buitentoe laat groei. Maar ons het gevind dat ’n roos groei soos hy wil en by die ogie uitloop wat hy dink die sterkste is.

Al wat belangrik is, is dat jy ’n roos wat hoog groei terugsnoei tot 90 cm, ’n mediumhoë struik tot 70 cm en ’n lae roos – soos ‘Arianna’ – tot 50 cm. 

Sny dooie hout of ou stele (met bruin dorings), asook stele wat oorkruis groei, uit en sny die swakker arm van vertakte stele af. Ek beveel ’n reguit snit ’n entjie bo die ogie aan, sodat nuwe stele by die ogie kan uitloop. Die rede vir ’n skuins snit net bo die ogie is dat water van die wond af kan wegloop, maar in ons klimaat is dit nie nodig nie. So ’n skuins snit kan trouens probleme veroorsaak: Indien dit gelyk met die ogie is, sal die steel waarskynlik uitdroog en nie nuwe groei ontwikkel nie. ’n Reguit snit is veel beter.

KONTAK ludwigsroses.co.za