Begin die einde van die maand deur saad vir somergewasse in warm, beheerde toestande binnenshuis in bakke of potte te saai. Jou saailinge sal teen die einde van September gereed wees vir uitplant.

Spruitkool

KOMBUISTUIN-TAKE IN JULIE

• Maak plante vroegdag nat sodat dit voor sononder kan droog word. Groente in potte moet een of twee keer per week water kry.

• Gee broccoli, kool, boer- en spruitkool ’n hupstoot met stikstofryke vloeibare bemesting.

• Ondersteun boerbone en spruitkool met stewige stutte.

• In droë winterstreke kan jy jou komposhoop effens klam maak, sonder om dit te deurweek.

• Werk mis by leë beddings in sodat dit kan afbreek voordat jy in Augustus plant.

Koolsaailinge

Só laat jy saad in  die huis ontkiem

• Sit saadbakke of potte op ’n warm plek neer, soos naby ’n venster wat noord front, of verhit dit van onder af op ’n warm skinkbord (op koerantpapier) of elektriese kombers op die laagste verstelling.

• Skep ’n klam mikroklimaat deur die saadbakke met kleefplastiek te bedek.

• As bakke in die huis nie genoeg sonlig kry nie, neem dit bedags buitentoe en bring dit saans in.

• Ná ontkieming: Plaas die saadbakke bedags nader aan ’n sonnige venster (skuif dit saans weg wanneer dit koud raak). Jy kan dit ook buite op ’n warm, beskutte plek neersit en saans weer inbring.

Wenke vir beplanning

• Kies groente wat jou familie sal eet.

• Stel ’n saairooster op wat opeenvolgende aanplantings insluit (saai op wisselende tye sodat alles nie gelyktydig ryp word nie) en teken geskatte oesdatums aan.

• Neem die eerste en laaste datum waarop ryp moontlik kan voorkom, in ag tydens jou beplanning.

Wat om nou te saai

Somerreënstreek Saai nou groenertjies in koeler dele, asook blaarslaai, witwortel, radys, spinasiebeet, tamaties (binnenshuis) en raap in gebiede wat minder ryp kry.  “Bogrondse” gewasse soos kool, pampoen, blaargroente, tamaties, eiervrug, rissies en soetrissies kan jy nou binnenshuis in plantbakke saai. 

Winterreënstreek Saai dieselfde vrugte- draende groente as in die somerreënstreek binnenshuis, asook beet, seldery, groenertjies en radyse; saai rape in situ (waar dit as volwasse plante gaan groei).

Laeveld en KwaZulu-Natalse kus Dis nou die beste tyd om beet, boontjies, eiervrug, rissies, wortels, komkommer, mielies, spanspek, skorsies, pampoen, radyse, spinasiebeet en tamaties te saai.