Foto’s Francois Oberholster en verskaf

PLANT ’N PAAR POTTE
Helder jou tuin, stoep en ingang op met kleurryke potplante. Plaas vertikale plante in die middel van die pot met tuimelende plante daarrondom om die rande te versag, en voltooi die prentjie met vuller-plante tussenin. Speel na hartelus met een kleur of gemengde skakerings, of kies kleure wat kontrasteer.

Tuine vir vriendskap

Tuine en tuinmaak het talle voordele, soos om ons liggaamlike en geestelike welstand te verbeter – en wat is nou belangriker in hierdie onseker tye wat ons wêreldwyd beleef? Tuinmaak help ons om sosiale bande en vriendskappe met ander te smee, hetsy deur steggies en plante uit te ruil of by ’n aanlyngemeenskap aan te sluit waar mense hul tuine met ons deel. Hoekom nie die stiller wintermaande gebruik en ’n nuwe sypaadjietuin of ekovriendelike randakker beplan wat jy in die lente kan aanplant nie? Probeer dié idees:

Buurtvriendelike sypaadjies

Wat sê jou sypaadjietuin van jou? Netjiese rande en ’n aantreklike uitleg skep ’n goeie eerste indruk en verbeter die voorkoms van jou eiendom. Wat jy plant, hang af van jou bepaalde ruimte en plaaslike toestande. Verbloem ’n grensmuur met inheemse Kaapse kanferfoelie (Tecomaria capensis), of kies ’n swartoognooi (Thunbergia alata) met haar hartvormige blare en suurlemoengeel, pienk of oranje blomme. Laaggroeiende plante, wat nie jou uitsig sal belemmer nie, is Achillea, Arctotis, agapante, Artemisia, Bulbine, daglelies, Dietes, engelvlerkies, Gazania, Tulbaghia en Verbena. Goeie beligting is belangrik vir veiligheid, en beslis ook waar daar trappe en paadjies is.

Senecio mandraliscae

Watervriende

Vir ’n waterwys tuin moet jy plante kies wat geskik is vir jou streek, hitte kan verduur en min water vra. Probeer spekboom (Portulacaria afra) met sy ongewone rooi stele en vetplantagtige blare, Senecio mandraliscae met sy potloodvormige loof en Cotyledon orbiculata met sy oranjerooi buisvormige blomme en groot grysgroen wasagtige blare. Plante wat blare met ’n klein oppervlakte het, soos Bulbine frutescens, en ander met fyn haartjies, soos Helichrysum petiolare, is goed opgewasse teen droë toestande.

Kies kraalmelkbos (Euphorbia tirucalli), Phormium tenax ‘Flamingo’ en ‘Rainbow Maiden’ vir hul kleur en struktuur, en plant vetplante soos woestynrosies en Sedum by hul voete.

Bring beweging in met Aristida junciformis en die geboë, grasagtige blare en piepklein wit stervormige blomme van Chlorophytum saundersiae. Festuca glauca, met sy silwerblou loof, vorm netjiese polle en is ’n uitstekende grondbedekker in massas geplant.

Foto: Gillian Eva

Nooi die bestuiwers

Maak jou voortuin en buurt vriendeliker teenoor die omgewing, en laat die natuur en woongebiede een word deur dit in ’n stuifmeelryke blomparadys te omskep wat bye, skoenlappers en voëls lok.

Indien jou tuin vyf tot ses uur sonlig op ’n dag kry, die grond goed dreineer en mildelik met kompos verryk word, kan jy enige van ’n groot verskeidenheid plante kies.

Begin met ’n basis wat min onderhoud vra – oorweeg plante soos Euryops-madeliefies, agapante, Anisodontea, Freylinia, Coleonema, laventel, Polygala fruticosa ‘Purple Butterfly’, blou Salvia africana en goue Salvia aurea. Vul dit aan met daglelies, madeliefie-struike, Scabiosa, engelvlerkies en Penstemon in plate en trosse.

Deur Kay Montgomery

Word ’n by-beskermer!

Candide, die gratis tuinmaak-app wat tuiniers die wêreld oor met mekaar verbind, het ’n opwindende nuwe veldtog op Wêreld-byedag (20 Mei) bekend gestel – #PolliNationSA. Dié veldtog mik om teen Maart 2021 minstens 100 000 Suid-Afrikaners te werf om as by-beskermers op te tree.

Só kan jy betrokke raak:

• As jy nie klaar deel is van die Candide-gemeenskap nie, laai die gratis Candide-app af in die Apple App Store of Google Play Store.

• Neem ’n foto van ’n by-vriendelike plant in jou tuin, op jou stoep, vensterbank of balkon.

• Deel die foto op die Candide-app met die hutswoord #PolliNationSA.

• Sodra jy dit geplaas het, sal ’n #PolliNationSA-ikoon op jou Candide-profielfoto verskyn om jou status as by-beskermer te verteenwoordig.

• Jy word ook outomaties aangedui op die veldtog se landkaart wat die verspreiding en reikwydte van dié groeiende beweging uitbeeld. Besoek candide.co.za vir nog inligting.