Foto’s Francois Oberholster en verskaf

Hoe besonders is die herfs-ewening van die Suidelike Halfrond nie jaar ná jaar nie. Dis tyd vir feestelikheid en dankbaarheid, vir oeste wat ingesamel is, vrugte wat ryp geword het, geelgoue veldgras, fleurige padrande vol pienk en wit kosmos, en tuine wat hul herfsgewaad begin aantrek terwyl die glorie van die somer kwyn.

In die herfstuin is daar altyd beweging, danksy ’n briesie wat deur die bome beweeg en blare wat grond toe val en ’n tapyt borduur in geel, oranje en rooi. Virginiese en Bostonse klimop skep ’n vlamrooi en goue mosaïek teen tuinmure, terwyl voëls smul aan ’n fees van bessies in struike en heinings.

Hydrangea quercifolia

Daglelie

In randakkers spog rose wat in die somerson verbleik het nou met nuwe kleur, en deel dahlias hul herfsskoonheid net so vrygewig soos in die somer. Die eikvormige blare van Hydrangea quercifolia wys elke dag dieper skakerings van wynrooi en mahonie. Staatmakers soos daglelies, Rudbeckias met hul donker ogies en Gaillardias in geel, oranje en brons maak maats met krisante in pastel- en helder skakerings.

 Gaillardias

Vetkruid (Sedum) se plat blomkoppe verander van dofpienk na maroen, ’n aangename kontras met hul grysgroen vetplantagtige blare, terwyl Eucomis autumnalis met sy pynappelvormige blomme wat weke lank hou, besonders lyk in rotstuine of in groepe geplant.

Kweek jy Plectranthus vir skakerings van pienk, mauve en pers in jou herfstuin? Die blomme maak ’n spoggerige vertoning in die najaar op laaggroeiende, mediumhoë en hoë struike in ligte skaduwee. Nog ’n goeie blomstruik, en een wat hou van die son, is die pragtige lila seeroog-blommetjie (Hypoestes aristata).

Terwyl soveel plante hul blare afgooi, bring die eerste kamelias – die sasanqua met sy immergroen blinkgroen blare – ’n gevoel van bestendigheid na die tuin en verleen hul satynagtige blomme in wit, pienk en rooi ’n tikkie elegansie.

Physostegia

Pastelle is ook dié tyd van die jaar te sien in laventel Caryopteris, ametis Perovskia, mauve Physostegia en sierlike pienk Nerines. Pienk-en-wit Japannese anemone dans in die ligste briesie, en al lyk hul blomme hoe broos, is hulle verbasend sterk – as hulle in ’n skaduryke plek groei en genoeg water kry, sal hulle sommer gou uitsprei.

Japannese anemone

Woel en werskaf
Die herfs is ’n goeie tyd om bome en struike te plant of te skuif, want dan kry dit kans om te vestig wanneer die grond afgekoel het en daar minder hittestres en verdamping is. Kies plante wat gesond en gevestig is met goeie wortelgroei, maar wat nie potvas is nie.