Sappige slaaie

Slaaigroente hou van die koeler weer; dit is wel nie rypbestand nie en moet van einde Mei af teen ryp beskerm word. In koue tuine is dit die moeite werd om jou slaai elke aand met rypdoek te bedek en dit die volgende oggend af te haal, want dit beteken jy sal reg deur die winter aan jou gunstelinge kan smul.

Al hoe meer slaaikultivars is deesdae in saailingvorm beskikbaar, maar jy kan nog in Mei slaaisaad in die warmer dele van die Hoëveld, die winterreën- en subtropiese streke saai.

KWEEKWENKE

• Plant slaai in die winter in volson in komposverrykte grond wat goed dreineer.

• Maak die saadbakkies nat voor jy jou saailinge uitplant sodat die grond om die wortels klam is.

• Gee saailinge ’n goeie hupstoot deur dit met ’n vloeibare bemesting te voed sodra dit uitgeplant is.

• Spasieer slaaiplantjies 30 cm van mekaar.

• Maak gereeld nat – slaai wat uitdroog, is bitter.

[PROBEER DIÉ SOORTE]

1 Eazyleaf ‘Ezmina’ (hooffoto) is ’n Lollo-slaai met rooi blare. Dis ’n lywige plant en ou staatmaker in Suid-Afrika, wat baie blare produseer waarvan jy keer op keer kan pluk. Sny die buitenste blare af en los die binneste blare om te groei.

2 Iceberg ‘Botiola’ is ’n ferm slaai met bros groen buiteblare wat goed vaar reg deur die winter. Oes dit wanneer die slaaikop ferm is.

3 ‘Tatienne’ is ’n baie mooi rooi-engroen botterslaai waarvan die blare se buiterande dieprooi verkleur namate dit volwasse raak. ’n Goeie pasmaat vir ‘Tatienne’ is die groen botterslaai ‘Analora’; laasgenoemde vorm gou ’n groot kop en spog met aantreklike donkergroen blare.

4 Romaine of langblaarslaai het ’n digte, regop vorm met bros, ligte blare binne en donkerder groen blare aan die buitekant. ‘Xanadu’ is ’n mini-kultivar met uiters smaaklike blink donkergroen blare. Dit vorm ’n geel kern en hou baie goed in die yskas. ‘Moonred’ is ’n buitengewone rooi mini-botterslaai wat ’n goeie pasmaat vir ‘Xanadu’ is.

Het jy geweet?
Kropslaai gee jou ’n langdurige oes en een kropslaai neem net soveel plek in beslag soos ses losblaar-slaaikultivars. Plant albei soorte, dan kan jy ’n verskeidenheid op verskillende tye oes.

[KOMBUISTUINTAKE]

• Maak jou groentetuin minstens een keer per week nat – plante in klam grond is meer kouebestand.

• Stut boerbone en spruitkool. Erd die grond rondom kool- en blomkoolplante op.

• Voed plante in die koolfamilie een keer per maand met ’n stikstofryke bemesting.

• Hou dop vir plantluise, veral by die koolfamilie, en spuit met ’n organiese insekdoder.

[SAAI NOU DIÉ GROENTE]

Somerreënstreke Boerbone, koolraap, radys, slaai (Mei), asook tuinertjies in dele wat minder ryp kry (tot in Junie).

Winterreënstreke Boerbone, seldery, slaai, preie, uie, tuinertjies, radys, spinasie en raap.

Subtropiese streke Stam- en rankboontjies, beet, eiervrug, kool, wortels, spanspek, komkommer, tuinertjies, pampoen en ander skorsies, radys, spinasie, blaarbeet, tamaties, raap.