Speel-speel

Die kleingoed sal dit geniet om kraakvars radyse soos ‘Sparkler’, wat binne 20 dae gereed is, te pluk en te proe. Saai dit dig opmekaar in komposryke grond of in ’n houer. Maak gereeld nat – radyse moet vinnig groei om rond en sappig te wees.

‘Salad Mixed’

Foto Life is a Garden

Sierlike slaaie

Slaai is streng gesproke ’n koueseisoen-gewas, maar jy kan wel ’n someroes kweek in ligte skadu met ’n kort rukkie direkte son, of in stippelskadu heeldag. Losblaar-kultivars waarvan jy keer op keer kan oes, is die mees geskikte keuse vir halfskadu. Die ‘Salad Mixed’-saadmengsel sluit rooi en groen slaai met verskillende blaartipes in; dis nuttig vir mikro-blare of as volgroeide slaai. Pluk die ouer, buitenste blare as jy herhaaldelik wil oes – dit sal aanhou groei van die middel af. Nog ’n kultivar wat geskik is vir halfskadu is ‘Butterhead’-slaaie. Hulle lewer groot, ferm koppe met ’n ronde, effens plat vorm. Die gladde blare het ’n intense groen kleur en ’n subtiele, botterige geur.

KONTAKTE kirchhoffs.co.za; rawliving.co.za

Maak ’n feestelike voorgereg deur stukke murgpampoentjie, soetrissie, wortel, kersietamaties en radyse op ’n stokkie te ryg met pynappel of kiwivrugte tussenin. Sprinkel ’n brandsousie oor vir skop en versier met kruie uit jou tuin.

Het jy geweet?
Epsomsout (gehidrateerde magnesiumsulfaat) moedig ontkieming aan wanneer jy dit by die grond voeg voor jy saai.

Kombuistuin-take

• Maak gereeld nat, selfs daagliks as dit warm en droog is.

• Trek onkruid uit wat met jou groente wedywer om water.

• Roei witvlieg en ander suiggoggas uit deur elke week met ’n organiese insekmiddel te spuit.

• Stut tamatiestele wat swaar dra.

• Bemes vrugdraende gewasse wanneer hulle begin blom en blaargroentes nadat jy gepluk het.

[SAAI NOU]

Somerreënstreke Aspersies, beet, blaarbeet, komkommer, pampoen, radyse, spanspek, stam- en rankboontjies, stam- en rankskorsies, suikermielies, tamaties.

Winterreënstreke Aspersies, kropslaai, radyse, spanspek, stam- en rankboontjies, stam- en rankskorsies, suikermielies en tamaties.

Laeveld en KwaZulu-Natalse kus Soetrissies en alle somergroente, mits dit in halfskadu groei.