Foto’s Francois Oberholster en verskaf

Feesblomme

Plante wat snyblomme dra, sorg nie net vir ’n fees in jou beddings nie, maar bied jou ook ’n bron van helder kleur waarmee jy elke vertrek in die huis – selfs die stoep – kan verfris. Kies baardangeliere (Dianthus), pronkridderspore (Delphinium), vingerhoedjies (Digitalis), Echinacea, Inkalelies (Alstroemeria) en daglelies (Hemerocallis).

NATMAAKPLANNE
As jy hierdie vakansie weggaan, huur ’n plant-oppasser om jou plante nat te gooi of onthou dat jy jou outomatiese besproeiingstelsel se tydsreëlaar stel. Nog ’n opsie is waterhoudende middels soos Wonder Stockosorb of Starke Ayres Hydrocache wat jy by die grond voeg; dit help dat huis- en tuinplante met minder water kan klaarkom. Kyk uit daarvoor by jou naaste kwekery.

Baardangelier

Daglelie

Vingerhoedjie

Inkalelie

Echinacea

Versier uit die natuur

Vier die feestyd sonder enige vermorsing. Jou tuin is ’n skatkis vol moontlikhede waarmee jy jou ruimte op ’n ekovriendelike manier kan versier: basstukke, ranklote, klippies en saadpeule is uitstekende organiese dekoropsies wat tekstuur en ’n aardsheid inbring.

Gebruik elemente uit die tuin om jou tafel mee te versier, in vase en om bewertjies mee te maak. Skep ’n feesatmosfeer in buiteruimtes met ’n paar olielampe al langs die tuinpaadjies of hang sonkragligte rondom jou onthaalarea.

Lamium maculatum
Lamium maculatum

Maak seker jou skadubeddings lyk op hul mooiste deur Lamium maculatum te plant. Hierdie immergroen, waterwys grondbedekker dra trosse pienk, wit, geel of pers blomme wat heuning- en hommelbye lok – wat op hul beurt weer help om die res van die tuin te bestuif. Met loof in die interessantste teksture en patrone sal hierdie vinnig spreidende grondbedekker sommer gou in jou hart kruip!

KITSTUINE

Jy het waarskynlik nie vanjaar veel tyd gehad om aan die tuin te bestee nie, maar gelukkig is daar ’n oplossing as jy vasdraai. Bedrywige mense kan altyd op ’n potplant staatmaak om nuwe lewe in die tuin of stoep te blaas met hul lieflike blomme en treffende loof. Maak ’n draai by jou gunsteling-kwekery en kyk watter skoonhede nou blom. En moenie vergeet om jou dekor en die ruimte in gedagte te hou wanneer jy potte kies nie.

Ons vakansie-keuse!

Petunias spog vir lang tye met blomme en verfraai hul houers met ’n verskeidenheid patrone en helder kleur one en helder kleure.

Petunia ‘Easy Wave Mix’

SKEP UIT JOU OES

Slaaiflesse wat jy self saamgestel het is ’n besonderse gebaar wat gaste sal waardeer – en gee jou die kans om met jou eie groente te spog! Pak hul gunstelinge laag op laag in middelslag-glasflesse. Nie net sal die aanbieding jou gaste beïndruk nie, hulle sal dit ook geniet om elkeen hul eie slaai op hul bord uit te keer.

Teks verskaf deur Life is a Garden. Sien meer by lifeisagarden.co.za of volg hulle op Facebook en Instagram.