Mason van Niekerk van Bellville skryf Ek het geen planne om honde te teel nie en daar is nie ’n teef op my werf nie; hoekom dan my reuns laat regmaak?

Dr. Denver Mudie van die Suid-Afrikaanse Veterinêre Vereniging antwoord Elke jaar moet duisende honde en katte uitgesit word weens ongewenste werpsels wat nie huise kry nie. Die goeie nuus is dat diere-eienaars ’n verskil kan maak, want met elke hond of kat wat gesteriliseer word, sal minder ongewenste diere gebore word.

Honde en katte bereik volwassenheid tussen ses en nege maande. Wanneer teefhonde op hitte kom, swel hul vagina en kry hulle vir twee tot drie weke ’n bloederige afskeiding. Tewe wat nie gesteriliseer is nie, skei feromone af wat reuns tot 5 km ver kan waarneem en agter die reuk aan laat ontsnap.

Wyfiekatte het nie ’n afskeiding nie, maar hul gedrag verander – hulle kan kerm, kreun en oormatig liefderik wees, die agterlyf lig met die stert in die lug terwyl hulle die borskas teen die grond druk. Dis in dié tyd dat jou troeteldier kan dragtig raak.

Reunhonde en mannetjieskatte sal gewoonlik oral in die huis hul gebied merk met urine wat ’n skerp reuk het. Hulle sal ook uit die erf probeer ontsnap op soek na ’n maat. Boonop is daar ’n kans dat reuns wat soek na ’n teef op hitte, aggressief kan raak.

Voordele van sterilisering

Hoewel die hoofoogmerk getallebeheer is, hou die prosedure ook mediese voordele in. Gesteriliseerde mannetjies kan nie testikulêre kanker kry nie en het ’n kleiner kans op hormoongedrewe prostaatkanker; by wyfies verdwyn die gevaar vir baarmoeder-infeksie (piometra) en die risiko vir borskanker daal dramaties indien hulle voor hul derde siklus gesteriliseer word. Dit verbeter gesondheid in die lang termyn, voorkom ongewenste werpsels en skakel talle gedragsprobleme uit wat met die paringsinstink gepaard gaan. Sterilisasie verswak die paringsdrang by mannetjieskatte en reunhonde, en het ’n kalmerende effek wat hulle minder geneig maak om rond te loop.

Jy kan ’n hond of kat op amper enige ouderdom chirurgies laat steriliseer, maar dit word gewoonlik op ses maande gedoen. Dit het geen uitwerking op hul leer-, speel-, werk- of jagvermoë nie, en sal nie jou troeteldier vet maak nie. Gesteriliseerde diere se energievereistes kan met tot 30% afneem en hulle sal net gewig aansit as jy hulle te veel kos of te min oefening gee.

KONTAK sava.co.za