Foto’s Dirk Pieters | Produksie Marian van Wyk
Enkele dae voordat alle vlugte uit Suid-Afrika in 2020 opgeskort is, het Jodi Lawrence na Bali in Indonesië vertrek in ’n poging om haar onderneming, wat meubels en dekorware invoer, te red. Min het sy geweet sy sou die volgende twee jaar tydens die Covid-19-pandemie daar deurbring.
Jodi en haar seun, Levi (13), het die luilekker eilandleefstyl terdeë geniet, maar sy het ook soveel moontlik (soos toegelaat deur die Covid-beperkings) saam met die Indonesiese vervaardigers vir haar aanlyn winkel, Eight Degrees South, gewerk en geleer. Intussen het haar vennoot en beste vriendin, Lola Casey, die fort gehou by hul basis in Kaapstad.
