Romantiese leserhuis versier met kuns en blomme

Ek is mal oor tuisgemaakte meringues. ’n Skeppie pienk koskleursel in elk laat hulle kompleet soos rose lyk! – Kim

Kim Black se huis is haar trots. “Ek het nog altyd belanggestel in dekor,” sê sy. “As kind het ek my kamer seker ’n miljoen keer rondgeskuif en wanneer ek by mense kuier, herrangskik ek hulle vertrekke in my kop!”

Kim, ’n kunstenaar, hou veral van kleur en kombineer dit graag met verskillende ontwerpe en besonderse optelgoed.

Die tweede leefarea is ’n dramatiese diepblou: Dulux Cashmere Matt in Urban Rock.

Dié groen stoel in die tweede leefarea het Brendan by sy oupa Les Gardner geërf; die stoel en die Persiese mat kontrasteer pragtig met die blou muur en die oorgroot rooi leeslamp.

“My grootste wens is dat mense welkom moet voel in my huis.” En wat is dan nou meer innemend as ’n huis vol blomme? Regdeur die huis is Kim se liefde vir blomme sigbaar – van skilderye en stoffering tot muurbehangsels en mooi kombuistoebehore is alles oortrek met blomme.

Blomme het my nog altyd aangetrek. Dis vir my ’n uitdrukking van die lewe se prag; dit kan ’n vertrek ’n energie-inspuiting en terselfdertyd ’n rustige gevoel gee. – Kim

“My heel eerste olieskildery was van rose. En al het ek nou al verskillende onderwerpe geskilder, veral binneruimtes, het blomme nog altyd vir my ’n bekoring ingehou,” sê Kim.

Nadat hulle sewe jaar in Nottingham, Engeland, gewoon het, het die Black-gesin Vishoek toe verhuis. Hulle het op dié dorp besluit omdat dit na aan die kus, skole en treinstasie is.

Kim en Olivia het die huis vroeg in 2015 kom besigtig, en die baie ruimte het hulle verbaas. “Die verskillende leefareas is regtig perfek vir ons leefstyl. Die eiendom is ook lekker privaat met sy eie geheime tuintjie knus onder die berg,” sê Kim.

’n Spieël werk goed as spatplaat in die kombuis, en skep boonop die illusie van meer ruimte. Sweefrakke hou alledaagse benodigdhede byderhand en dien as uitstalplek vir mooigoed wat Kim meestal op kattebakverkopings gekoop het.

Die huis het eintlik bitter min werk gekort: “Die vorige eienaar het ’n ongelooflike visie vir hierdie doodgewone huis gehad.”

Met die volmuur-glasdeure in die sitkamer vloei binne- en buiteruimtes naatloos ineen, terwyl natuurlike lig by die dakvensters in die badkamers en gang instroom. Kim en haar man, Brendan, het besluit om ’n bietjie plek by een van die badkamers te “steel” vir ’n gang na die tweede leefarea.

Die muurbehangsel in die hoof-leefarea was eens ’n tafeldoek vir ’n Kersfeesviering; die kleure staan lieflik uit teen die muur geverf in Paris Paving van Dulux. ’n Stel sagte pienk fluweelkussings wat Kim onlangs gekoop het, komplementeer die grys rusbank. Muurbehangsel van Babylonstoren; voëlkussing van Biggie Best

Toe die Blacks hul vorige huis in Nottingham, Engeland, gekoop het, was twee vleuelrugstoele “deel van die pakket”. Kim kon nie daarvan afskeid neem nie en het dit Suid-Afrika toe laat verskeep. Die glasrakke in die eetkamer is perfek om kosbare, sentimentele skatte uit te stal. Groen vaas van Plan B Vintage

Met droëmure en ’n ou hortjiesdeur het hulle toe ook ’n ekstra slaapkamer geskep. “Al is Brendan nie ’n kranige selfdoener nie, het hy gehelp verf en gesorg dat my kunswerke die regte hangplek kry. Ek kan nuwe skilderye verf, veral van my geliefde blomme, en dit na hartelus rondskuif!”

Die hoofslaapkamer loop uit op ’n private tuintjie met ’n kafeetafeltjie vir oggendtee. Reghoekige kussings van MRP Home; groot kussings van Plan B Vintage

Isabella se kamer is geverf in ’n “Franse grysblou” wat Kim van potjies oorskietverf gemeng het.

Olivia se kamer is geverf in ’n vars wit; Kim se skoonma, Diana, het die kleurvolle kombers gehekel.

Een van Kim se kunswerke pryk teen die badkamermuur

Daar is blokkiesvloer in die voorste sitkamer en eetarea, die gang en meisies se kamers.

“Die hoof-leefarea en eetkamer is ook heerlik vir onthaal – ons kan die glas-stapeldeure oopmaak en deel voel met die natuur. Besoekers sê dikwels dis soos ’n geheime tuin, ’n stil oase weggesteek in die hart van ’n klein woonbuurt.”

Die chaise longue was ’n geskenk van Brendan. “Dis nou nogal afgeleef omdat dit in ’n sonkol staan waar ek graag ontspan en lees; ek gooi maar ’n skaapvel oor om dit te beskerm,” sê Kim. Kussings van Biggie Best

’n Voorliefde vir dekor

Terwyl sy in Engeland gewoon het, het Kim ’n interieurontwerp-slypskool by die ontwerper Abigail Ahern se huis in Londen bygewoon. “Dit was so inspirerend! Al haar mure is met diep kleure geverf, wat die verskillende teksture en unieke dekoritems pragtig laat uitstaan,” verduidelik sy.

Kim is self vol planne en idees. “Solank ek bly belangstel in die lewe en mense om my, sal ek altyd uit ongewone oorde inspirasie put. Ek verander gereeld my strooikussings en skuif kunswerke rond, maar verkies dat my mure en grootste meubels ’n neutrale agtergrond vorm. Ek sal altyd aan die verander wees.

“My huis is beslis ’n uitbreiding van my persoonlikheid; as mense hier tuis voel, is ek tevrede.”