Foto’s Elza Cooper l Stilering Amanda van Wyngaardt
Voor die Coopers Engeland toe getrek het, was dié stoep, wat uit die sitkamer loop, hul gunsteling-kuierplek. Elza en Robert het ook dié baksteenmuur afgewit met ’n mengsel van wit verf en water, maar hier het hulle dit sommer ’n paar minute later met ’n tuinslang afgespuit totdat hulle tevrede was met die voorkoms! Strooikussings van Mr Price Home; buitemat van Skinny Cow
Deur haar kameralens het die Tuis-fotograaf Elza Cooper nie net met talle interessante, kunstige mense kennis gemaak nie, maar ook met hul huise – elkeen só besonders en mooi dat dit ’n blywende indruk gemaak het. “Ek het van die mooiste tuine en huise in die land gesien,” vertel sy. “Dit het my hope inspirasie gegee en ek het heelwat idees ‘gesteel’. Ek is mal oor dekor, ’n lekker storie en geskiedenis; ek’s ook ’n bietjie kunssinnig – en báie sentimenteel.”
