Anthea Lloyd van Pietermaritzburg skryf: Ek het ’n paar antieke meubelstukke by my ma geërf en dit pas nie regtig by my dekor nie. Hoewel ek gewoonlik nie huiwer om hout te verf nie, voel ek hierdie keer anders, want van die stukke is nogal waardevol en dan is daar natuurlik ook die sentimentele waarde. Moet ek verf of nie?
Jo-Marie Rabe van Piér Rabe Antiques antwoord: Vir oudhedehandelaars soos ek is dit altyd ’n groot “nee”. Maar die wêreld bestaan natuurlik nie net uit handelaars nie, daar is baie mense wat van die geverfde voorkoms hou.
Ou meubels is gewoonlik meer “formeel” en pas dikwels nie in kontemporêre ruimtes nie. Of soms hou mense maar net van geverfde meubels en gee nie eintlik om of dit oud of nuut is nie. Om meubels te verf is niks nuuts nie, dit word al eeue lank gedoen!
