TULIBLOK, BOTSWANA

Vriende van ons nooi my en my vrou een of twee keer ’n jaar na die Tuliblok. Ons is gewoonlik ’n groep van tien mense en hierdie keer het ons by die Sethora Game Lodge in die Mashatu-wildreservaat gebly.

Ons het op ’n laatmiddagwildrit gegaan en toe ’n jagluiperdwyfie en haar welpies ’n rukkie lank gevolg. Die ma het in ’n stadium gaan lê om te rus terwyl die kleingoed in die bome geklim en gespeel het. Daar was heelwat ander diere in die ronde, maar niks om te vreet nie – of só het ons gedink.

Een van die welpies het skielik opgespring en ’n sebra wat sowat 300 m verder gewei het, begin jaag. Die trop sebras het in alle rigtings gespat, met die jong jagluiperd kort op ’n paar van hulle se hakke. Ek was nie seker dat die kat sou weet wát om met ’n sebra aan te vang indien hy een sou platgetrek kry nie!

My kamera was op motor drive en ek het aanhou skiet. Ek gebruik ’n Canon EOS 7D Mk. II met ’n Canon 300 mm- f2.8-lens. Ek hou my kamera altyd op die motor drive-verstelling en ’n hoë sluiterspoed wanneer ek naby roofdiere of voëls kom – ingeval iets opwindends skielik gebeur.

Die sebra het teen ’n hoogtetjie uitgehardloop  en weggekom. Die jong jagluiperd het ’n rukkie later weer by sy gesin aangesluit en hy was nie ’n bietjie trots op die feit dat hy iets gejaag het nie!  

Demi Toontas, Benoni

“Die verblyf, personeel en geriewe by die Sethora Game Lodge is uitstekend en die veldwagter, Edward, is kundig en kon áltyd vir ons iets in die veld opspoor om te sien.

“Omdat dit ’n private reservaat is, kom ’n mens selde ander voertuie teë wanneer jy op ’n wildrit gaan en die diere is ook nie so skrikkerig soos dié in jagreservate nie.

“Ek is al van kindsbeen af lief vir die natuur. Ek het op ’n plaas grootgeword en was altyd omring deur diere. Sedert ’n besoek aan die Karibameer in Zimbabwe is ek ook deesdae ’n kranige voëlkyker – dit gee ’n ander dimensie aan wildkyk!”

WAT HET JY AL MET JOU EIE OË GESIEN?
Stuur jou vertelling en reeks foto’s van iets ongewoons wat jy in die natuur gesien het na toast@weg.co.za.