Stof tot nadenke

Al is sy op pad na die boeredans, bly die kamera van Mari Marais van Leniesdeel in Noordwes nie tuis nie.

“Ek het dié foto geneem op pad na ’n boeredans tussen Leniesdeel en Piet Plessis. Ons het voor ons vriende op die grondpad gery en afgetrek om na die sonsondergang te kyk. Die bries het die stof na die een kant toe gewaai en dit was net die regte oomblik vir ’n mooi foto met ons vriende wat voor die stof aangery kom.”

Dis voorwaar ’n besonderse oomblik wat Mari vasgevang het, en ’n mens sien dadelik die kar. En al is dit die kar wat ry, is dit eerder die stofwolke wat die foto ’n gevoel van beweging gee. ’n Mens sien sommer voor jou geestesoog hoe die stof soos ’n misbank laag en stadig eenkant toe trek terwyl die kar na jou toe aangestorm kom.

Jou oog dwaal volgende tussen die bome en die stofwolke rond, maar dan sien jy die foto het ook ’n ander helfte. Regs van die pad is ’n oop stuk veld met ’n klompie beeste wat wei; buiten die heiningdraad is hier nie veel ander detail nie. Dit vorm dus ’n netjiese ewewig tussen die dele weerskante van die pad.

Hier is ook slim komposisie, iets wat jy nie dadelik besef nie, maar wat die foto ekstra lewe gee. Die pad loop links – en in die hoek – uit die raam en jy kan byna voel hoe die bakkie oomblikke later verby Mari gaan ry.


Trek ’n streep (rondom)

Sy hou van natuurtonele en eksperimenteer graag met die raampies rondom haar foto, sê Madelein Marais van George.

Huawei P20 Lite

“Ek is baie lief vir foto’s en hou veral van natuurtonele. Ek speel ook graag met verskillende soorte raampies om my foto’s, soos dié een wat ek op Wildernis se strand geneem het.”

Die raam om ’n foto kan ’n baie belangrike rol speel, soveel so dat dit omtrent deel word van die komposisie.

Madelein se foto is ’n goeie voorbeeld hiervan. Sonder die raam sou die foto minder aandag getrek het. As jy van ver af kyk, is dít omtrent die eerste wat jy raaksien; dit werk amper soos ’n fokus om jou aandag na die inhoud van die foto te lei. As ’n mens dan nader staan, sien jy ’n paartjie se silhoeëtte op die agtergrond, en dít is wat die foto se fokuspunt vorm.

Omdat die raampie ook swart is (net soos die figure en die rotsgedeeltes), spring jou oog gedurig tussen die drie elemente terwyl jy verder in die foto rondkyk en die res van die detail geniet.


Kul jou hier, kul jou daar...

Samsung A20

Wanneer hy gaan stap, hou Devon Bruiners van Kuilsrivier nie net sy oë oop vir die groot goed soos bome en rivier en die berge nie. Hy sien klein goedjies raak, soos ’n gekamoefleerde akkedis op die grond.

“Ek en ’n vriend van my het in die Jonkershoek-reservaat digby Stellenbosch gaan stap. Reg teen die einde sien ek toe ’n skielike beweging by my voete. Ek het gaan stilstaan en my een voet stadig beweeg... en op daardie oomblik sien ek ’n akkedis hardloop. Kort daarna het hy op ’n rots gaan staan waar ek hom hom toe kon afneem.”

’n Mens moet omtrent mooi kyk om die outjie op die foto raak te sien – hy smelt só goed saam met die rots waarop hy staan dat hy omtrent ’n verlenging daarvan word.

Die bruin agtergrond en die groen deel regs agter trek wel ’n mens se aandag af, terwyl dit nie regtig tot die foto bydra nie. Maar as jy die foto se raampie nader om die akkedis trek, voel dit of jy na ’n klein dinosourus kyk wat verstok staan op ’n rots, en dit voel omtrent of sy klein oog déúr jou kyk. Dis iets wat verlore raak op die groter foto.


Venstermaats

iPhone XR

Die koue bring Hein le Hanie van Centurion nie van stryk nie, veral as hy vroegoggend die geleentheid kry om ’n foto van sy twee seuns te steel.

“Ons was die wintervakansie Clarens toe, en dié oggend was dit só koud die kamer se venster was toegewasem. Ek het opgestaan om koffie te maak toe ek omdraai en sien my twee seuns, Joah en Logan, is besig om patrone op die glas te trek. My foon was langs die bed en ek kon vinnig die oomblik vasvang. Ek het die foto ná die tyd na swart-wit verander.”

Dis in gevalle soos dié waar foto’s onskatbare waarde kry, want jy vang ’n spontane oomblik tussen twee mense vas waarheen jy telkemale sal terugblaai in jou album.

Die fokuspunt is uiteraard die twee figure, maar Logan se hand verbind die twee sodat dit ’n eenheid vorm. Die twee kyk ook weg van jou af. Dit is wanneer jy nader staan dat jy die werklike fokus van die foto sien: Agter Joah se kop teken hy met sy hand op die glas.

Die swart-wit sorg natuurlik vir meer atmosfeer, maar ’n mens kan ook van die res van die detail in die donker dele ontslae raak sodat die foto nóg meer trefkrag kan kry. Ook die wit dele kan effens verdof word. Sodoende word meer detail uitgelig, spesifiek die vingermerke op die ruit tussen die twee.

Stuur jou foto vir ons en ons plaas dit dalk hier.
 Ons soek nie die tradisionele “kompetisiewenners” nie; net doodgewone foto’s wat vir jou mooi is. Van ’n foto wat jy dadelik as jou nuwe tuisbladfoto op Facebook gebruik regdeur tot kinders wat in die swembad plas. Of dit met ’n gróót kamera of jou selfoon geneem is, dit maak nie saak nie. Mari MARAIS wen ’n Weg Ry & Sleep-kamerasak ter waarde van R520 met haar foto – veels geluk! Stuur jou foto’s na  leon.botha@media24.com