Soldate, brandbestryders, vlieëniers en chirurge ervaar glo die meeste spanning in hulle beroepe. Jou lewe én die van ander is in gedrang. Ek wil nog ’n beroep byvoeg: Busbestuurder!

As kind het ek partykeer in Kaapstad op een van City Tramways se dubbeldekkerbusse gery. Die lomp en pynlik stadige Leyland het deur die stad se smal strate gewieg met ’n swetende en swetsende bestuurder wat die groot stuurwiel met groot moeite getol het – amper soos die stuurman van ’n seilskip op die stormsee.

Ek het toe vroeg op my lewens- reis twee besluite geneem: Daar moet ’n makliker manier wees om geld te verdien; en ek wil nooit ’n bus bestuur nie.

My eerste ordentlike werk was as misdaadverslaggewer wat my vinnig tot die ontnugterende besef gebring het daar bestaan nie iets soos om maklik geld te maak nie. Maar ten minste hoef ek nooit bus te bestuur nie!

Dit blyk nou busbestuur, ten minste in ’n wa soos die moderne Ford Tourneo, is doodmaklik en stresvry. Dis goeie nuus vir die eienaars van klein ondernemings, mense soos toeroperateurs wat tot sewe passasiers gemaklik oor lang afstande moet rondry. En as jy ’n groot gesin het, of baie ruimte nodig het vir branderplanke, fietse of kamptoerusting, maak iets soos die Tourneo skielik sin.

Hierdie wa is al ’n geruime tyd op die mark, maar Ford het hom nou verbeter met ’n outomatiese sesspoed-ratkas en dieselfde ywerige 2.0-literturbodieselenjin wat jy in die Ford Ranger en Everest kry. Ek en my vrou, Ronel, het onlangs in die 136 kW Limited (die duurste Tourneo) gaan langnaweek hou in Paternoster.

Agter is ses sitplekke wat in verskeie gedaantes gegroepeer kan word. Al die sitplekke kan vorentoe wys, of jy kan drie omswaai sodat passasiers mekaar in die oë kan kyk as hulle gesels. Jy kan sitplekke op verskillende maniere platslaan om tafeltjies te skep of jy kan hulle apart uithaal as jy ruimte nodig het.

Ons het al die sitplekke ingehou, en daar was steeds hope ruimte beskikbaar nadat ons die fietse en toerusting ingepak het.

Daar is niks vreesaanjaend daaraan om die Tourneo te bestuur nie. Dit ry soos ’n groterige motor, en het al die luukshede wat jy in ’n gewone passasiersvoertuig sal vind. Op ons Limited-model sluit dit Ford se SYNC3-bedryfstelsel in wat ’n raakskerm gebruik om maklik met Android Auto en Apple CarPlay te werk. Die agterste passasiers word ook nie afgeskeep as jy langpad moet ry nie. Daar is verstelbare lugverkoeling agter en agt USB-laaigleuwe om selfone en tablette aan die lewe te hou.

Die Tourneo toer gemaklik teen 120 km/h en daar is genoeg ekstra woema as jy iets moet verbysteek. Jy gaan nie in iets soos die Piekenierskloof se draaie jou gewig rondgooi nie, maar die beskaafde bestuurder word beloon met fieterjasielose rygenot. Ons brandstofverbruik vir ons naweek het nooit bo 9 l per 100 km geklim nie.

Dis ook die eerste Ford in die land om AdBlue-tegnologie in te span. ’n Bymiddel word bygevoeg tot ’n aparte 21 l-tenk, wat help om die stikstofoksied-uitlaatgasse tot skadelose stikstof en water om te skakel. Jy word aangeraai om ’n houer met ureumwater saam te ry aangesien die Tourneo nie gaan aanskakel as die AdBlue-tenk leeg is nie, maar dis net elke 10 000 km of wat nodig.

As jy ’n groot gesin het en jou jongste twee skop ’n kabaal op elke keer as jy hulle in die klein sitplekke agter in jou sportnutsvoertuig wil inprop, gaan die Tourneo dalk meer sin maak.

FORD TOURNEO CUSTOM LIMITED
FORD TOURNEO CUSTOM LIMITED

Word deel van die Weg-wêreld
Teken in op ons nuusbrief en ontvang elke week lekker leesstories, resepte en inligting oor ons nuutste toere en slypskole in jou inboks. Volg ons op die YouTube-kanaal WegTV (kyk ons nuutste video's eerste!), asook Instagram en Facebook