Nissan Patrol: Bullebak in ’n snyerspak

Die nuwe Patrol is verlede jaar gedurende die nasionale Covid-19-inperking aanlyn bekend gestel, wat beteken ’n klomp motorskrywers moes droëbek na foto’s op hulle rekenaar kyk pleks daarvan om agter die stuur in te skuif.

’n Mens voel jammer vir hulle, want jy kan in jou wildste drome nie die krag (én klank) van daardie 5,6 l-V8-enjin beleef op ’n YouTube-video nie. Nee, daarvoor moet jy hom ry.

Toe ons dus die kans kry, het ons die hele hand pleks van die pinkie gegryp, ’n dakrak opgesit en ’n klomp jerrykanne op die dak vasgestrop – en ’n tog Namibië toe van amper 6 000 km aangedurf waar ons op teer, grondpad én dae aaneen in die duine gery het.

Wat het ons hier?

As jy in die mark is vir ’n nuwe Patrol, is jou keuse van watter een nie moeilik nie: Dis óf die Nissan Patrol 5.6 V8 LE óf ’n tweedehandse model.

Ja, net die een model is hier beskikbaar, maar dit is al die sewende geslag van die Patrol, en Nissan bou die kar al langer as 50 jaar.

Die nuwe model is die beste weergawe van dié betroubare ryding tot nog toe.

Jy kan wel besluit in watter kleur jy hom wil hê. Die sewe kleure waaruit jy kan kies, is swart, wit, donkerbruin en silwer, en dan jou meer eksotiese Desert Dune, Gun Metallic en Titanium.

Die Patrol is groot – teen 5 165 mm lank, 1 995 mm breed en 1 940 mm hoog sommer báie groot. Dit beteken jy sit breed in die pad en kyk die bestuurders van klein vragmotors so te sê in die oë.

Binne en buite

Kom ons verduidelik dit só: Saam met die Patrol het daar ook ’n Nissan Navara-dubbelkajuitbakkie gery, en wanneer jy (effens teësinnig) vir ’n ander bestuurder moes kans gee in die Patrol en in die Navara klim, was die verskil in ruimte só opmerklik dit het amper gevoel of jy nou in ’n Micra sit.

Dan is die binneruim ook so luuks soos kan kom. Leersitplekke (waarvan die voorste twee warmer of koeler gestel kan word en tot drie van jou gunstelingposisies kan onthou), netjiese afwerking, lugreëling vir die voorste én agterste passasiers, ’n inligting-en-vermaakstelsel met enigiets van Bluetooth, USB-sokke en satellietnavigasie tot ’n banddrukmonitor, brandstofverbruikrekenaar en selfs ’n yskassie tussen die voorste twee sitplekke waar jy tot ses halfliterbottels kan koud hou. Wat ’n mond vol.

Ons het ook baie gehou van die Bose-klankstelsel, veral omdat daar nog plek is waar jy jou CD’s kan laai. Jy gebruik dié gleuf ook vir die DVD wat aan die agterkant van die voorsitplekke se kopstutte op 8”-skerms wys.

Padgeraas is verbasend min – al wat jy regtig hoor, is die enjin wat grom as jy voet neersit.

Wat katoeters betref, het die Patrol alles. In die middelkonsole is ’n ronde knop waar jy kan kies tussen verskillende ritmodusse – pad, klip, sneeu of sand – jy hoef nie enige dinkwerk te doen nie.

Die ontrimpeling buitelangs is stylvol, met net genoeg chroomafwerking, dagryligte en ’n aggressiewe sierrooster.

Onder die enjinkap

Die Patrol gebruik ’n 5,6 l-V8- petrolenjin en outomatiese sewespoedratkas.

En kom ons praat sommer nou hieroor, want dit was die tweede vraag wat almal ons langs die pad gevra het... Ja, hy is dors.

Op die ooppad – met 140 l petrol in die tenk én nog soveel op die dakrak, drie passasiers en al hulle bagasie vir ’n week – het hy ons teen ’n gemiddelde spoed van 130 km/h ’n verbruiksyfer van 16,5 l/100 km gegee.

In die duine was dit ’n ander storie: Hier het die brandstofverbruiknaald deurgaans vol op 30 l/ 100 km gestaan.

Maar daarvoor word jy beloon met ’n ooraanbod van krag onder die enjnkap, en ’n ratkas wat moeiteloos elke keer raakvat, in enige gegewe situasie. Terloops, die eerste vraag wat almal gevra het, was wat hy kos...

Hoe ry hy?

Die Patrol vreet die kilometers op. Al die pad van Humansdorp in die Oos-Kaap af tot by die grens, deur die Namib tot by Meobbaai, standlangs tot in Walvisbaai en Solitaire om terug... en nie een keer het iemand in die kar gekla dat hulle nie meer kan sit nie.

Ons het op die reis ook van die tegnologie voorlangs getoets, veral die aanpasbare kruisspoedbeheer.

Dit is eintlik verstommend hoe goed dit werk en hoe die motor homself rem wanneer daar stadiger verkeer voor jou is – en dan weer versnel wanneer jy jou baan verlaat om verby te steek.

Wat die ratkas betref, is daar geen klagtes nie, maar daar is ’n handratmodus wat jy kan aanskakel as jy eerder self na die toere wil omsien.

Op die sand ken die Patrol nie sy gelyke nie. Sit hom in sandmodus en skakel vastrapbeheer af, en jy ry soos ’n ou veteraan op en af met die duine.

Al hoe jy dié ervaring dalk beter kan maak, is met namarkse voor- en agterbuffers wat jou ’n effense beter nader- en vertrekhoek by van die steiler duine en slipfaces sal gee.

Mededingers

Luukse sportnutsvoertuie vir mense met ’n stewige bankbalans

Mercedes-Benz G400d (R2 892 840)

As jy móét ry in die toonbeeld van ’n Duitse sportnuts, met al wat ’n katoeter is, moet jy bereid wees om R1,3 miljoen meer te hoes.

Land Rover Discovery R-Dynamic SE (R1 561 200)

Vir sowat R10 000 goekoper kan jy hierdie blink Discovery aanskaf. Dis nou as sy nuwe ontwerp by jou byval vind.

Toyota Land Cruiser LC200 4.5D V8 VX-(R R1 606 600)

Dié topmodel in die 200-reeks is die Patrol se naaste mededinger op alle vlakke, maar hy is wel ’n bietjie duurder.

Slotsom

Die Patrol is ’n soos goeie versnitwyn waarin presies die regte kombinasie elemente saamgevoeg is vir iets wat jou hart ’n bietjie vinniger laat klop.

Nissan het hier ’n ryding waarin die tegnologie, rygenot, weelde en betroubaarheid uitstekend saamwerk. En het ons al gepraat oor daai enjin...

Natuurlik hoef niemand die Patrol-brigade te oortuig nie, maar dalk laat draai dié model ’n klompie nuwe koppe.