Dis vanjaar die vyfde jaar wat WegRy sy jaarlikse 4x4 van die Jaar-kategoriewenners aanwys. Ons toekennings is anders as dít wat elders in die bedryf gedoen word en is uniek om die volgende redes:
  1. Ons neem alle voertuie in ag. In gewone Motor van die Jaar-toekennings word daar slegs gekyk na voertuie wat die vorige jaar bekend gestel is. Ons glo dis nie realisties nie, want wanneer ? koper in ? ryding belangstel, kyk hy of sy nie na die heel jongste model nie, maar na alle voertuie in ? gegewe segment, selfs dié wat twee of drie jaar tevore bekendgestel is.
  2. Ons vergelyk appels met appels. Ons dink nie dis reg om byvoorbeeld ? sedan, ? sportnutsvoertuig, ? dubbelkajuitbakkie en ? sportmotor teen mekaar te laat meeding nie, want hulle is op totaal verskillende kopers gerig. Daarom vergelyk ons byvoorbeeld bakkies met bakkies, en sportnutsvoertuie met sportnutsvoertuie.
  3. Ons neem verskeie faktore in ag. Dis een ding om ’n voertuig te bestuur. Maar wat van sy prys, toerustingvlakke, die tegnologie wat hom uniek maak, of sy betroubaarheid?
  4. Ons werk vir ons teikenmark. Ons kyk na voertuie se geskiktheid vir ons lesers en die breër Suid-Afrikaanse publiek.
  5. Ons is onafhanklik. Ons besluite word intern geneem en ons as redaksie het 100% beheer daaroor. 

Nissan X-Trail 1.6 dCI SE AWD


Of ons dit nou wil erken of nie, sagte veldryers – dis nou meestal rygoed sonder laestrek, maar wat tog vierwielaandrywing het – is een van die gewildste segmente ter wêreld, hoofsaaklik ten koste van sedanmotors, waarvan verkope wêreldwyd aanhou daal teen dieselfde tempo as die Suid-Afrikaanse rand.

In die vorige jare het ons 'n interessante paar wenners in hierdie kategorie gehad. Ons dink byvoorbeeld aan die Range Rover Evoque en Land Rover Discovery Sport. Maar so goed soos wat hierdie voertuie is, is hulle ook vrekduur. En in die huidige ekonomiese klimaat raak dit al hoe moeiliker om sulke voertuie as ’n wenner in ’n segment aan te wys, want ’n mens wil graag relevante keuses maak.

Hoewel rygoed soos dié nie regtig gemaak is om in die veld mee te ry nie, is dit tog vir ons belangrik dat hulle enige grondpad met gemak kan hanteer. En baie sogenaamde sportnutsvoertuie het bande van 18 duim en groter – en dis iets wat hulle baie kwesbaar maak vir bandskade.

Een voertuig wat egter regmerke by al die regte boksies kry, is Nissan se X-Trail. As jy die nuwe X-Trail langs een van sy hoekige voorsate gaan staanmaak, sal jy agterkom hoeveel die reeks vooruitgeboer het in terme van stilering.

Ons is veral beïndruk met die 1.6 dCi SE AWD-model. Nie het het hy 17 duim-wiele nie, maar het hy ook ’n verrassend goeie grondvryhoogte van 209mm. Nee, sy nader- en vertrekhoek is nie van só ’n aard dat jy die Namib se duine kan platstorm nie, maar met ’n pens wat op daardie relatief hoë hoogte staan, behoort geen grondpad of redelike paadjie jou sommer te kan stuit nie, veral nie as jy die regte bande opsit en jou gesonde verstand gebruik nie.

Die ander voertuig wat ons gevoel het ’n sterk mededinger is, is die Toyota RAV4 2.2D GX handrat. Hulle is nogal na aan mekaar met spesifikasies, met die Toyota-enjin wat ’n kortkop voorloop: 110kW en 340Nm, teenoor 96kW en 320Nm. As jy kyk na brandstofverbruik, maak Toyota aanspraak op 5,6liter/100km en Nissan op 5,3liter/100km.

Maar die RAV4 se lae grondvryhoogte van 187mm tel weer teen hom. Boonop kos die Toyota R459 000, teenoor die R436 900 van die Nissan.

Die Nissan wen ook met klein bietjie meer luukses. Waar die intreevlak-RAV4 se stuurwiel en ratkierie van kaal plastiek is, is die Nissan s’n met leer oorgetrek.

Hoe sê hulle nou weer?Jy kan met ’n Nissan.” Veral as dit ’n X-Trail is.


* Onthou: Hierdie is 'n lys van wat ons dink die beste voertuie in hulle onderskeie segmente is. Dit beteken nie dat die ander voertuie in hierdie segmente gemors is nie. In sommige segmente – en hier dink ons veral aan dubbelkajuitbakkies – is die verskil 'n polonieskildikte (tydens 'n depressie en 'n droogte) en moes ons hare kloof om 'n wenner aan te wys.

Hou ons webwerf en Facebook-blad dop vir die ander segmente se wenners.